រាជធានីភ្នំពេញ ៖ អ្នកនាំពាក្យក្រសួងអប់រំយុវជន និងកីឡា លោករស់ សុវាចា បានបញ្ជាក់ថា ក្រសួងមិនមានគោលការណ៍បើកចំហជូនបេក្ខជនដូចឆ្នាំ២០១៨ទេ ចំពោះការតវ៉ារបស់បេក្ខជនប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៩នេះ ។ ការបញ្ជាក់របស់អ្នកនាំពាក្យក្រសួងអប់រំ គឺក្រោយពីមានបេក្ខជនប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)មួយចំនួននៅរាជធានីភ្នំពេញ បានផ្ទុះការតវ៉ាកាលពីព្រឹកថ្ងៃទី១១ ខែកញ្ញា ចំពោះពិន្ទុរបស់ពួកគេដោយសង្ស័យថា មិនត្រឹមត្រូវ ។ ការតវ៉ានានានេះ គឺផ្ទុះឡើងនៅមុខទីស្តីការក្រសួងងប់រំ ដោយទាមទារឲ្យមានការផ្ទៀងផ្ទាត់លើវិញ្ញាសាសរសេររបស់បេក្ខជនមួយចំនួន ដែលខ្លះមានការសង្ស័យចំពោះពិន្ទុរបស់ខ្លួន ។
លោក រស់ សុវាចា បានឲ្យដឹងថា «ក្រសួងមិនមានគោលការណ៍បើកចំហជូនបេក្ខជនដូចឆ្នាំ២០១៨ទេ ។ ក្រសួងយល់ពីមនោសញ្ចេតនារបស់បេក្ខជន និងក្រុមគ្រួសារ ក្រោយពីទទួលលទ្ធផលប្រឡងសញ្ញាបត្រមធ្យមសិក្សាទុតិយភូមិនីមួយៗ» ។ ជាទូទៅ ក្រសួងអប់រំស្វាគមន៍មតិរិះគន់ស្ថាបនា និងឆ្លើយតបតាមភាពចាំបាច់ និងតាមគោលការណ៍ច្បាប់ យុត្តិធម៌ តម្លាភាព និងលទ្ធផលអាចទទួលយកបាន ។ លោកថ្លែងថា សុក្រឹតភាពនិងប្រសិទ្ធភាពនៃគ្រប់ដំណាក់កាលប្រឡងឆ្នាំនេះ បានមកពីកិច្ចសហការរបស់គ្រប់ភាគីពាក់ ព័ន្ធ ជាពិសេសក្រុមការងារកំណែក្រដាសកិច្ចការបេក្ខជនក្រុមការងារស្រង់បូកពិន្ទុដោយកុំព្យូទ័រ និងពិនិត្យផ្ទៀងផ្ទាត់ពិន្ទុ។
អ្នកនាំពាក្យរូបនេះបានសង្កត់ធ្ងន់ថា ដូច៥ឆ្នាំកន្លងមក ក្រសួងក៏បានទទួលកិច្ចសហការពីអង្គភាពប្រឆាំងអំពើពុករលួយ ក្រសួងមហាផ្ទៃ សហភាពសហព័ន្ធយុវជនកម្ពុជា និងក្រសួង-ស្ថាប័ននានា ដើម្បីឲ្យដំណើរការប្រឡងប្រព្រឹត្តទៅដោយរលូន ។ បេក្ខជនម្នាក់ក្នុងចំណោមជាច្រើននាក់ដែលមកតវ៉ានេះនិយាយថា មុខវិជ្ជាខ្លះរូបគេធ្វើបានល្អស្ទើរតែទាំងអស់ ហើយនិទ្ទេសបានសុទ្ធតែEតែលទ្ធផលបែរជាធ្លាក់ទៅវិញ។
បេក្ខនារីម្នាក់ឈ្មោះ ងិន សុភីយ៉ា រៀននៅវិទ្យាល័យព្រះស៊ីសុវត្ថិនិយាយថា ការដែលនាំគ្នាមកនេះគឺដើម្បីតវ៉ាចំពោះលទ្ធផលប្រឡងបាក់ឌុបកាលពីថ្ងៃទី១៩-២០ ខែសីហា ដោយសារប្រឡងធ្លាក់ ។
នាងបញ្ជាក់ថា ៖ «ពួកខ្ញុំមិនសុខចិត្ត ដោយសារមុខវិជ្ជាដែលពួកខ្ញុំធ្វើបានតែធ្លាក់(F) ខណៈពួកខ្ញុំធ្វើបានស្ទើគ្រប់សំណួរ តែអ្នកដែលធ្វើមិនបានបែរជាបាននិទ្ទេសB ។ មុខវិជ្ជាគណិតវិទ្យា និងប្រវត្តិវិទ្យា ពួកខ្ញុំធ្វើបានច្រើនជាងគេ» ។ បេក្ខនារីរូបនេះនិយាយទៀតថា ការមកនេះដើម្បីឲ្យក្រសួងពិនិត្យពិន្ទុររបស់នាងឡើងវិញ ព្រោះថាលទ្ធផលដែលទទួលបាននោះមិនសមនឹងអ្វីដែលនាងទទួលបាននោះទេ ។ ចំណែកបេក្ខ ជនម្នាក់ទៀតនិយាយថា នាងប្រឡងផ្នែកវិទ្យាសាស្ត្រ ធ្វើបានល្អស្ទើរគ្រប់មុខវិជ្ជា បែរជាទទួលនិទ្ទេសធ្លាក់(F)។
សូមជម្រាបថា កាលពីឆ្នាំ២០១៨ ក៏មានបេក្ខជនប្រឡងជាប់មកតវ៉ាផងដែរ ទាក់ទងនឹងពិន្ទុមានការ
ស្រង់បូកខុស ហើយក្រសួងក៏បានយល់ព្រមធ្វើការបូកសរុបសាជាថ្មី ។កាលណោះ ក្រសួងអប់រំ យុវជន និងកីឡា បានបកស្រាយកំហុសបច្ចេកទេសកាលពីឆ្នាំ២០១៨ថា ការស្រង់ពិន្ទុខុសនេះដោយសារបញ្ហាបច្ចេកទេសកុំព្យូរទ័រ ។ ប៉ុន្តែឆ្នាំ២០១៩នេះ បើតាមលោក ហង់ ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា អះអាងថា ដោយសារមានបទពិសោធន៍បូកពិន្ទុខុសកាលពីឆ្នាំ២០១៨នោះ លោកបានប្តេជ្ញាមុនការប្រឡងនៅឆ្នាំនេះថា មិនឲ្យមានកំហុសដូចឆ្នាំ២០១៨ទេ ព្រោះមានការសម្រិតសម្រាំងយ៉ាងច្បាស់លាស់ ។
សូមបញ្ជាក់ថា លទ្ធផលប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៩ ត្រូវបានក្រសួងអប់រំ យុវជន និងកីឡា ប្រកាសកាលពីថ្ងៃទី៩-១០ខែកញ្ញាកន្លងមកនេះ ដែលបេក្ខជនប្រឡងជាប់មានចំនួន៧៩.០៥២នាក់ ត្រូវជា៦៨,៦២% (បើប្រៀបធៀបនឹងឆ្នាំ២០១៨ បេក្ខជនប្រឡងជាប់មាន ៦៧,០៧%) ៕ (សម្រួលដោយ៖ ស្រីណា)
ចែករំលែកព័តមាននេះ