ខេត្តកំពត ៖ អ្នកស្រុកនៅភូមិព្រៃកឹក និងភូមិភ្នំខ្យង ក្នុងឃុំប្រាសាទភ្នំខ្យង ស្រុកកំពង់ត្រាច បានបង្ហាញនូវការព្រួយបារម្ភនិងភ័យខ្លាចផងដែរ ដោយសារពស់ថ្លាន់ធំៗមកដេញចាប់មាន់សុីទាំងថ្ងៃទាំងយប់ ធ្វើឱ្យពួកគាត់ដែលមានលំនៅឋានក្បែរជើងភ្នំក្រពើ មិនអាចរារាំងបានដោយសារតែម្នាក់ៗភ័យខ្លាចមិនហ៊ានសម្លាប់ពស់ទាំងនោះទេ…
ខេត្តកំពត ៖ អ្នកស្រុកនៅភូមិព្រៃកឹក និងភូមិភ្នំខ្យង ក្នុងឃុំប្រាសាទភ្នំខ្យង ស្រុកកំពង់ត្រាច បានបង្ហាញនូវការព្រួយបារម្ភនិងភ័យខ្លាចផងដែរ ដោយសារពស់ថ្លាន់ធំៗមកដេញចាប់មាន់សុីទាំងថ្ងៃទាំងយប់ ធ្វើឱ្យពួកគាត់ដែលមានលំនៅឋានក្បែរជើងភ្នំក្រពើ មិនអាចរារាំងបានដោយសារតែម្នាក់ៗភ័យខ្លាចមិនហ៊ានសម្លាប់ពស់ទាំងនោះទេ ព្រោះតែមានជំនឿថា ខ្លាចដាក់ «រាសីធ្លាក់ចុះ» ឬត្រូវប្រឈមនឹងជំងឺព្យាបាលមិនជា
ដោយសារតែមានជំនឿបែបនេះទើបម្នាក់ៗមិនហ៊ាននាំគ្នាវាយសម្លាប់ពស់ថ្លាន់ទាំងនោះដោយផ្ទាល់ទេ តែបានធ្វើសកម្មភាពដោយប្រយោល បានខ្លះៗដូចជាច្រកទឹកថ្នាំជក់ (ថ្នាំខ្លាំង) ដែលច្របាច់យកទឹកច្រកចូលមាត់ពស់ ឬចាក់ប្រេងពីលើហើយដុត ដែលការសម្លាប់បែបនេះ ងាប់ពស់ថ្លាន់អស់៥ក្បាលមកហើយ ដើម្បីការពារមាន់និងខ្លាចឆាឆៅដល់មនុស្សដោយការលូនចូលមកនៅក្នុងផ្ទះ ។
អ្នកភូមិម្នាក់ឈ្មោះ គង់ វន ភេទប្រុស អាយុ៥២ឆាំ្ន នៅភូមិព្រៃកឹក បាននិយាយប្រាប់ឱ្យដឹងកាលពីព្រឹកថ្ងៃទី១០ ខែកញ្ញាថា សំបូរណាស់ពស់ថ្លាន់ធំៗដេញចាប់មាន់អ្នកភូមិសុីទាំងថ្ងៃ បើតាមដឹងគ្រាន់តែពស់ថ្លាន់ចូលសុីមាន់អ្នកភូមិស្ទើរតែពាយទៅហើយ គឺហ្វូងពស់ថ្លាន់ទាំងនេះវាលូនចុះពីភ្នំក្រពើ ។
គង់ វន និយាយប្រាប់បន្តថា កាលពីយប់ថ្ងៃទី៤ ខែកញ្ញា ពស់ថ្លាន់មួយក្បាលត្រូវបានអ្នកភូមិចាប់ ច្រកទឹកថ្នាំខ្លាំងសម្លាប់ចោលមួយក្បាល ខណៈពេលមករកសុីមាន់ទាំងយប់ ដូចចោរលួចស៊ីមាន់មិនព្រមចេញទៅណា ។ អ្នកស្រុកថា ពេលឃើញពស់លូនចូលមកក្នុងភូមិ គេនាំគ្នាបង្អើលដេញដែរ ប៉ុន្តែអត់ព្រមវារទៅណាទេ ។ម្ល៉ោះហើយក៏នាំគ្នាសម្លាប់ចោលទៅ ។
គង់ វន និយាយថា បើតាមដឹងពស់ថ្លាន់ដែលត្រូវអ្នកភូមិសម្លាប់បន្តបន្ទាប់៥ក្បាលហើយនៅថ្ងៃផ្សេងៗគ្នា ។ គាត់បានបន្តថា អ្នកភូមិក៏ដូចជារូបគាត់ចង់បានអង្គការណាមួយនៅកៀកកិតជាមួយពលរដ្ឋ បើអ្នកភូមិប្រទះឃើញពស់ថ្លាន់ឬពស់ថ្លាន់មករកសុីមាន់ ជួយមានវិធីចាប់យកទៅលែងនៅសួនសត្វវិញ ចៀសវាងអ្នកភូមិវាយសម្លាប់ចោល ។
ពលរដ្ឋម្នាក់ទៀតឈ្មោះ ចែមួយ អាយុ៥១ឆាំ្ន នៅភូមិភ្នំខ្យង បាននិយាយប្រាប់ឱ្យដឹងកាលពីព្រឹកថ្ងៃទី១០ កញ្ញាថា ពស់ថ្លាន់ពិតជាសម្បូរណាស់នៅតំបន់នោះ ។ កន្លងមកពស់ថ្លាន់បានមកអុកឡុកខាំឆ្មាចាប់មាន់-ទាលេបរហូតដល់ឆ្កែទៀត ។ ពលរដ្ឋរូបនេះ និយាយមិនលាក់បាំងប្រាប់ថា ពស់ថ្លាន់មួយក្បាលមានទម្ងន់ប្រហែល១០គីឡូក្រាម ។
ពេលដេញវាមិនចេញក៏ត្រូវក្រុមអ្នកភូមិ យកប្រេងសាំង២លីត្រចាក់ពីលើរួចដុតនៅពេលយប់កន្លងមក ខណៈដែលពស់ថ្លាន់នោះបានចូលរកលេបកូនជ្រូករបស់គាត់នៅក្នុងទ្រុង ។ ប៉ុន្តែការចាក់ប្រេងសាំងដុតពស់ថ្លាន់នោះវាមិនងាប់ទេ ទាល់តែអ្នកភូមិឯទៀតៗចាប់ទាក់.កព្យួរទើបងាប់។
ព្រះចៅអធិការវត្តប្រជាសង្គមភ្នំក្រពើមានថេរដីកាថា ពស់ថ្លាន់ដែលព្រះសង្ឃក្នុងវត្តជួយចាប់ ពេលអ្នកភូមិប្រទះឃើញមានប្រមាណ២០ក្បាលមកហើយ និងបានយកទៅលែងនៅក្នុងរូងភ្នំ និងនៅលើភ្នំក្រពើនេះ តែប្រហែលជាមិនមានចំណីគ្រប់គ្រាន់ទើបវាលូនចូលភូមិលេបមាន់-ទាអ្នកស្រុក ទើបញ៉ាមមកទៀត។ ព្រះចៅអធិការមិនគាំទ្រឱ្យមានការវាយសម្លាប់ពស់ទាំងនេះទេ គប្បីអភិរក្សហើយក៏បានអំពាវនាវដល់មន្ត្រីជំនាញនានារិះរកវិធីក្នុងការអភិរក្សពស់ថ្លាន់ទាំងនោះផង ៕ (សម្រួលដោយ៖ ស្រីណា)
ចែករំលែកព័តមាននេះ