ខេត្តព្រះវិហារ ៖ មន្ទីរកសិកម្ម រុក្ខាប្រមាញ់ និងនេសាទខេត្ត បានសហការជាមួយអាជ្ញាធរស្រុកត្បែងមានជ័យ ជួយសង្គ្រោះសត្វជ្រូកប្រមាណជាង៣ពាន់ក្បាល នៅក្នុងកសិដ្ឋានមួយឋិតក្នុងភូមិស្រែព្រាង ឃុំប្រមេរ ស្រុកត្បែងមានជ័យ ដែលកំពុងរងការលិចលង់ដោយជំនន់ទឹកស្ទឹងសែន នាំទៅកាន់ទីទួលសុវត្ថិ ភាពជាបណ្តោះអាសន្ន ។
ថ្លែងប្រាប់អ្នកសារព័ត៌មាន នៅព្រឹកថ្ងៃទី១១ កញ្ញា លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារបានឲ្យដឹងថា រយៈពេល២ថ្ងៃនេះ មន្ទីរជំនាញបានសហការជាមួយកងកម្លាំងសមត្ថកិច្ច និងអាជ្ញាធរស្រុកត្បែងមានជ័យ ជួយសង្គ្រោះភ្លាមៗដល់កសិដ្ឋាន ចិញ្ចឹមជ្រូកមួយកន្លែង ស្ថិតក្នុងភូមិស្រែព្រាង ឃុំប្រមេរ ស្រុកត្បែងមានជ័យ គិតមកដល់ថ្ងៃទី១០ កញ្ញា សត្វជ្រូកចំនួនជាង២ពាន់ក្បាល ដែលរងការលិចលង់ដោយជំនន់ទឹកស្ទឹងសែនថ្មីៗនេះ បានជួយសង្គ្រោះមកកាន់ទីសុវត្ថិភាព នឹងសត្វជ្រូកមួយចំនួនទៀត បានដឹកទៅចែកចាយតាមបណ្តាខេត្ត តាមទីសត្តឃាតផ្សេងៗ ។
តែទោះជាបែបនេះក្តី លោកថា ជ្រូកមួយចំនួនត្រូវបានបាត់ទៅតាមទឹក ខណៈពេលដែលក្រុមការងារ
ជួយសង្គ្រោះដឹកតាមទូក មកកាន់ទីសុវត្ថិភាព មានជ្រូកខ្លះ បានលោតចុះពីលើទូកអណ្តែតទៅតាមទឹក
មួយចំនួន ។ លោកបានបញ្ជាក់ថា នៅសល់ជ្រូក២រោងទៀតមានចំនួន១២០០ក្បាល ក្នុងកសិដ្ឋាន ដដែល មិនទាន់បានសង្គ្រោះនោះទេ ព្រោះទឹកពុំទាន់លិចដល់រោងនៅឡើយ តែលោកថា គិតមកដល់ពេលនេះទឹកបានស្រកបន្តិចម្តងៗហើយ ។
មកដល់ព្រឹកថ្ងៃទី១១ កញ្ញា មិនទាន់ដឹងពីចំនួនជ្រូកពិតប្រាកដដែលបាត់ពីកសិដ្ឋាននៅឡើយទេ ។ អាចមានបាត់បង់ខ្លះ ដែលវាងាប់ដោយឈ្លក់ទឹក និងលោតចេញពីទូកអណ្តែតទៅតាមទឹក ប៉ុន្តែមិនច្រើនពេក
ទេ ។
លោក នន់ វណ្ណី ជាម្ចាស់កសិដ្ឋានចិញ្ចឹមជ្រូក បានសម្តែងការរីករាយ និងអរគុណដល់មន្ទីរជំនាញ និងអាជ្ញាធរស្រុកត្បែងមានជ័យ ដែលបានជួយអន្តរាគមន៍សង្គ្រោះ សត្វជ្រូករបស់គាត់ទាន់ពេលវេលា ឲ្យរួចផុតពីការលិចលង់ដោយមហន្តរាយទឹកជំនន់នេះ ជាពិសេសចៀសផុតពីការខាតបង់ដ៏ធ្ងន់ធ្ងរ ។
សូមបញ្ជាក់ថា គិតមកដល់ថ្ងៃទី១១ កញ្ញា នេះ កម្ពស់ទឹកស្ទឹងសែនបានស្រកចុះមកត្រឹម១៤,០៨ម៉ែត្រ ។ ដោយឡែក ទឹកដែលបែកវាលបានជន់លិចលង់ស្រូវស្រែចម្ការ ផ្ទះសម្បែងប្រជាពលរដ្ឋក៏កំពុងស្រកចុះជាបណ្តើៗហើយ ប្រសិនអាកាសធាតុ មិនមានភ្លៀងធ្លាក់បន្តទៀត ទឹកនឹងស្រកទៅវិញឆាប់ៗនេះ ៕ (សម្រួលដោយ៖ ស្រីណា)
ចែករំលែកព័តមាននេះ