រាជធានីភ្នំពេញ ៖ ដីកាកោះហៅត្រូវបានបញ្ជូនទៅនគរបាលយុត្តិធ៌ម នារសៀលថ្ងៃទី១១ ខែកញ្ញា ឆ្នាំ២០១៩ ទៅកាន់ជនជាប់ចោទលោក សម រង្ស៊ី និងជនសង្ស័យ៤នាក់ផ្សេងទៀតឱ្យចូលតុលាការនៅព្រឹកថ្ងៃទី០២…
រាជធានីភ្នំពេញ ៖ ដីកាកោះហៅត្រូវបានបញ្ជូនទៅនគរបាលយុត្តិធ៌ម នារសៀលថ្ងៃទី១១ ខែកញ្ញា ឆ្នាំ២០១៩ ទៅកាន់ជនជាប់ចោទលោក សម រង្ស៊ី និងជនសង្ស័យ៤នាក់ផ្សេងទៀតឱ្យចូលតុលាការនៅព្រឹកថ្ងៃទី០២ ខែតុលា ឆ្នាំ២០១៩ ដើម្បីចូលរួមសវនាការពីបទ «ផ្ដើមគំនិតក្នុងអំពើប្រមាថ និងញុះញង់ឱ្យប្រព្រឹត្តបទឧក្រិដ្ឋជាអាទ៍» ។
តាមដីកាកោះ ជនជាប់ចោទទាំង៤នាក់ ត្រូវបានតុលាការចោទពីបទ«ផ្ដើមគំនិតក្នុងអំពើប្រមាថ និងញុះញង់ឱ្យប្រព្រឹត្តបទឧក្រិដ្ឋជាអាទ៍ ប្រព្រឹត្តនៅចំណុចរាជធានីភ្នំពេញ កាលពីអំឡុងខែមេសា ដល់ខែតុលា ឆ្នាំ២០១៨ តាមមាត្រា២០ មាត្រា៤៩៥ និងមាត្រា ៥០២នៃក្រមព្រហ្មទណ្ឌ ។
ចំពោះសិទ្ធិរបស់ជនជាប់ចោទ ក្នងរឿងក្ដីរួមមានសិទ្ធិ ៖ សិទ្ធិទទួលដឹងពីការចោទប្រកាន់ទោស និងដីកាកោះឱ្យចូលខ្លួន ។ សិទ្ធិបង្ហាញភស្តុតាង សំអាងសាក្សី និងសំណូមពរផ្សេងៗ ។ តុលាការបន្តថា ជនជាប់ចោទមានសិទ្ធិប្ដឹងចៅក្រមជំនុំជំរះ មានសិទ្ធិការពារខ្លួនដោយខ្លួនឯង ឬសុំមេធាវីជួយការពារ ឬពឹងអ្នកដទៃឱ្យការពារខ្លួន និងសិទ្ធនិយាយសំដីចុងក្រោយបង្អស់ ។
សូមជម្រាបថា កាលពីថ្ងៃទី១៤ ខែមករា ឆ្នាំ២០១៩ កន្លងទៅ លោក កែវ សុធា ព្រះរាជអាជ្ញា អមសាលាដំបូងរាជធានីភ្នំពេញ បានចេញដីកាបញ្ជាឲ្យបុគ្គល គង់ ម៉ាស់ បង្ហាញខ្លួន នៅនាយកដ្ឋាន សន្ដិសុខផ្ទៃក្នុងនៃក្រសួងមហាផ្ទៃ ឲ្យបានមុនថ្ងៃទី១៤ ខែកុម្ភៈ ឆ្នាំ២០១៩ ដើម្បីសាកសួរលើបណ្ដឹងព្រហ្មទណ្ឌពីបទ ៖ ធ្វើសកម្មភាពប្រមាថប្រមុខរាជរដ្ឋាភិបាល និងញុះញង់ដោយប្រើខ្សែអាត់វីដេអូផ្សព្វផ្សាយកន្លងមក តាមប្រព័ន្ធហ្វេសប៊ុកក្នុងគោលបំណងឲ្យសាធារណជន និងប្រជាពលរដ្ឋទូទៅមានការស្អប់ខ្ពើមបង្កជាភាពចលាចល អសន្ដិសុខក្នុងប្រទេស ចំពោះរាជរដ្ឋាភិបាលដែលដឹកនាំដោយសម្ដេចតេជោ ហ៊ុន សែន ។ សមត្ថកិច្ចបានរកឃើញភស្តុតាងទាំងនេះនៅក្នុងឯកសារនានារបស់ជនត្រូវចោទក្រោមការបញ្ជាពីលោក សម រង្ស៊ី លោក ហូរ វ៉ាន់ លោក កាក់ កុម្ភៈ ជាដើម ៕
កែសម្រួលដោយ ៖ សំណាង
ចែករំលែកព័តមាននេះ