សហរដ្ឋអាមេរិក-អាហ្វហ្គានីស្ថាន ៖ អ្នកនាំពាក្យម្នាក់របស់ក្រសួងមហាផ្ទៃអាហ្វហ្គានីស្ថាន ក្នុងសេចក្ដីប្រកាសមួយនិយាយថា គ្រាប់រ៉ុក្កែត១គ្រាប់ កាលពីថ្ងៃទី១១កញ្ញាជាថ្ងៃខួបលើកទី១៨នៃការវាយប្រហារភេរវកម្មនៅអាមេរិក បានធ្លាក់ចំជញ្ជាំងនៃក្រសួងការពារប្រទេសអាហ្វហ្គានីស្ថានក្រុងកាប៊ុល ក្បែរស្ថានទូតសហរដ្ឋអាមេរិកតែមិនបណ្ដាលឲ្យមានជនរងគ្រោះឡើយ។ ការវាយប្រហារនោះកើតមានក្រោយពាក់កណ្ដាលយប់បន្តិច។
នេះជាលើកទីមួយដែលរដ្ឋធានីអាហ្វហ្គានីស្ថាន រងការវាយប្រហារចាប់តាំងពីប្រធានាធិបតីអាមេរិកលោកដូណាល់ត្រាំ ប្រកាសកាលពីថ្ងៃទី៧កញ្ញា បញ្ចប់ការចរចាស្ដីពីការដកកងទ័ពអាមេរិកជាមួយពួកតាលីបង់មក។ ពួកតាលីបង់នាថ្ងៃទី១០កញ្ញាបានព្រមានថា ប្រសិនបើសហរដ្ឋអាមេរិកបោះបង់ចោលការចរចា នោះគេនឹងមានការសោកស្ដាយក្នុងពេលដ៏ឆាប់។
ការវាយប្រហារភេរវកម្មថ្ងៃទី១១កញ្ញាឆ្នាំ២០០១ នៅក្រុងញូវយ៉កនិងនៅផេនស៊ីលវេនៀ នាំឲ្យមានអន្តរាគមន៍របស់កងទ័ពអាមេរិក នៅអាហ្វហ្គានីស្ថាន ប្រឆាំងពួកអាល់កៃដាដឹកនាំដោយអូសាម៉ាប៊ីលឡាដេន ដែលមានមូលដ្ឋានក្នុងប្រទេសនះ និងពួកតាលីបង់ដែលកាន់អំណាចនៅក្រុងកាប៊ុល។ រដ្ឋធានីអាហ្វហ្គានីស្ថាន កាលពីសប្ដាហ៍មុន ជាគោលដៅនៃការវាយប្រហារភេរវកម្ម២ ប្រកាសទទួលខុសត្រូវដោយពួកតាលីបង់ ដែលបណ្ដាលឲ្យមានជនរងគ្រោះជាច្រើននាក់៕ (កែសម្រួលដោយ ៖ បុប្ផា)
ចែករំលែកព័តមាននេះ