ខេត្តព្រះសីហនុ ៖ គណៈបញ្ជាការឯកភាពខេត្តព្រះសីហនុបានដាក់ចេញនៅវិធានការមួយចំនួនដល់កងកម្លាំងឯកភាពដោយធ្វើរដ្ឋបាលចំហតាមផ្ទះសំណាក់សណ្ឋាគារកាស៊ីណូកន្លែងស្នាក់នៅអចិន្ត្រៃយ៍របស់ជនបរទេស ។ យោងតាមបណ្តាញសង្គមរដ្ឋបាលខេត្តព្រះសីហនុបានចេញផ្សាយនៅថ្ងៃទី១០ កញ្ញាថា លោកសាយ សំអាល់ រដ្ឋមន្ត្រីក្រសួងបរិស្ថាន ជាប្រធានក្រុមការងារថ្នាក់ជាតិចុះមូលដ្ឋានខេត្តព្រះសីហនុ ។
លោកនាយឧត្ដមសេនីយ៍ សន្តិបណ្ឌិត នេត សាវឿន ស្នងការនគរបាលជាតិបើកកិច្ចប្រជុំស្តីពីសន្តិសុខ សណ្តាប់ធ្នាប់របៀបរៀបរយ និងសុវត្ថិភាពនៅខេត្តព្រះសីហនុ ។ កិច្ចប្រជុំក៏ពង្រឹងសកម្មភាពត្រួតពិនិត្យអាវុធជាតិផ្ទុះជនអន្តោប្រវេសន៍គ្រឿងញៀន ពង្រឹងអនុវត្តច្បាប់ចរាចរណ៍ផ្លូវគោកមួយសប្តាហ៍២ដង ។ សហការល្បាតជាប្រចាំរៀងរាល់រាត្រីក្នុងក្រុងព្រះ សីហនុវិសេសគោលដៅស្មុគស្មាញទាំង២០ ។ ចាត់វិធានការដល់ជនបរទេសដែលចងការ ប្រាក់ខុសច្បាប់បង្កឲ្យមានបទល្មើស ករណីឃាត់ខ្លួនស្នើសុំទៅអគ្គនាយកដ្ឋានអន្តោប្រវេសន៍ដើម្បីសុំបណ្ដេញចេញពីប្រទេស ។ ឃាត់ទុករថយន្តដែលគ្មានស្លាកលេខឆែករកបទល្មើសក្នុងករណីគ្មានបទល្មើសត្រូវឃាត់រថយន្តទុកនៅមន្ទីរសាធារណៈការធ្វើការផាកពិន័យតម្រូវ ឲ្យធ្វើស្លាកលេខទើបអនុញ្ញាតត្រឡប់ទៅវិញ ។ ដោះស្រាយតម្រូវការចាំបាច់នៅតាមមូលដ្ឋានពិសេសឆ្លើយតបទៅនឹងក្រុមហ៊ុន drive ឲ្យបានទាន់សភាពការណ៍ដូចជា ករណីអន្តរាគមន៍ជួយប្រជាពលរដ្ឋរងគ្រោះដោយជំនន់ទឹកភ្លៀងជាដើម ។
លោកគួច ចំរើន អភិបាលនៃគណៈអភិបាលខេត្តព្រះសីហនុបានលើកឡើងថា ខេត្តព្រះសីហនុមានវិនិយោគិន ពាណិជ្ជករ អាជីវករប្រកបរបររកស៊ីកាន់តែច្រើនបង្កើននូវទំនុកចិត្តពីភ្ញៀវទេសចរដែលមកសម្រាកកម្សាន្តនៅខេត្តកាន់តែសប្បាយរីករាយ និងមានសុវត្ថិភាពនៅលើទឹកដីខេត្តព្រះសីហនុ ។ ប៉ុន្មានឆ្នាំចុងក្រោយនេះខេត្តព្រះសីហនុមានការបណ្ដាក់ទុនយ៉ាង ច្រើនសន្ធឹកសន្ធាប់ពីសំណាក់វិនិយោគិន ពិសេសវិនិយោគចិនជាហេតុធ្វើឲ្យខេត្តព្រះសីហនុមានការរីកចម្រើនយ៉ាងឆាប់រហ័ស ផ្អែកលើគ្រប់វិស័យឯកលើភាពរីកចម្រើនរបស់ខេត្តបានជម្រុញឲ្យមានកំណើនប្រជាពលរដ្ឋនៅតាមបណ្ដាខេត្តផ្សេងមកធ្វើការងារ និងប្រកបរបរនៅទៅតាមជំនាញ និងសមត្ថភាពដែលខ្លួនមាន ។
បច្ចុប្បន្នអ្នកវិនិយោគចិនស្ថិតលំដាប់លេខ១ ដែលមកបណ្ដាក់ទុន និងវិនិយោគភាគច្រើនក្នុង វិស័យឧស្សាហកម្ម ពាណិជ្ជកម្ម ដឹកជញ្ជូនសំណង់ ទេសចរណ៍ និងកាស៊ីណូ ។ ចំណែកលោកនាយឧត្តមសេនីយ៍សន្តិបណ្ឌិត នេត សាវឿន បានលើកឡើងថាខេត្តព្រះសីហនុមានអំណោយផលល្អដែលសម្ដេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានកំណត់គោលដៅទេសចរណ៍អភិវឌ្ឍន៍ និងអាចជាខេត្តទំនើបជាងគេក្នុងការស្ថាបនាផ្លូវបេតុងទំនើបនៅពេលខាងមុខ ។
ទី១ មានការយកចិត្តទុកដាក់ពីរាជរដ្ឋាភិបាល ទី២ មានឧបនាយករដ្ឋមន្ត្រីចំនួន៣រូប ផ្តោតលើខេត្តព្រះសីហនុមានដូចជា ឧបនាយករដ្ឋ មន្ត្រីក្រសួងមហាផ្ទៃ ក្រសួងដែនដី និងក្រសួងហិរញ្ញវត្ថុ ទី៣ ក្រុមការងារថ្នាក់ជាតិ ទី៤ក្រសួងមហាផ្ទៃ ទី៥ គណៈបញ្ជាការឯកភាពខេត្ត និងទី៦ មហាសាមគ្គីធ្វើឱ្យខេត្តមានការរីកចម្រើនមានកំណើនសេដ្ឋកិច្ចខ្ពស់ ។ ហើយក្រសួងមហាផ្ទៃបានបន្ថែមក្រមខណ្ឌមន្ត្រីនគរបាលចំនួន២០០នាក់បន្ថែមទៀតតាមតម្រូវការជាក់ស្តែង និងបណ្តុះបណ្តាលមន្ត្រីនគរបាលចំនួន៤០០នាក់ឱ្យមានជំនាញ ។
ជាមួយគ្នានេះលោក សាយ សំអាល់ រដ្ឋមន្ត្រីក្រសួងបរិស្ថានជាប្រធានក្រុមការងារថ្នាក់ជាតិចុះមូលដ្ឋានខេត្តព្រះសីហនុបានវាយតម្លៃកោតសរសើរមន្ត្រីដែលបានខិតខំប្រឹងប្រែងអនុវត្តការងារមិនខ្លាចនឿយហត់ ក្នុងការចូលរួមអភិវឌ្ឍន៍ខេត្តមានការរីកចម្រើន ពិសេសលើវិស័យសំណង់ មានសន្ទុះកើនឡើង ទន្ទឹមនឹងនោះយើងក៏ត្រូវមានផែទេសចរណ៍ក្នុងការតាមដានត្រួតពិនិត្យជនបរទេសដែលធ្វើដំណើរតាមទូកទេសចរណ៍ ឬទូកនេសាទក្នុងការធានាសន្តិសុខ សុវត្ថិភាពសាធារណៈ និងរបៀបរៀបរយបម្រើឱ្យភ្ញៀវទេសចរជាតិ អន្តរជាតិ និងអ្នកវិនិយោគមកកាន់ខេត្តព្រះសីហនុកាន់តែច្រើនឡើងថែមទៀត ៕ កែសម្រួលដោយ ៖ សុឃាក់
ចែករំលែកព័តមាននេះ