ខេត្តកំពង់ឆ្នាំង ៖ កំណាត់ផ្លូវតភ្ជាប់ពីឃុំច្រណូក ស្រុកកំពង់លែង ខេត្តកំពង់ឆ្នាំង ទៅកាន់ ឃុំស្រយ៉ូវ ក្រុងស្ទឹងសែន ខេត្តកំពង់ធំ ត្រូវបានកាត់ផ្ដាច់ទាំងស្រុងហើយកាលពីយប់ថ្ងៃទី១០ ខែកញ្ញា ឆ្នាំ២០១៩ កន្លងទៅនេះ ដោយសារស្ថានភាពទឹកជំនន់ហក់ឡើងខ្លាំង ។
ជាមួយគ្នានេះអាជ្ញាធរស្រុកកំពង់លែងក៏បានធ្វើសេចក្តីជូនដំណឹងផ្អាកការធ្វើចរាចរណ៍តាមផ្លូវនេះជាបណ្ដោះអាសន្ន និងបានសំណូមពរប្រជាពលរដ្ឋ កុំបន្តធ្វើដំណើរតាមផ្លូវនេះទៀតដែលនាំឲ្យខាតពេលវេលា ព្រោះតែធ្វើដំណើរមិនរួច ។
លោក ចេង ចាន់ដូណា អភិបាលរងស្រុកកំពង់លែង បានផ្ដល់កិច្ចសម្ភាសន៍ជាមួយភ្នាក់ងារកោះសន្តិភាពនៅព្រឹកថ្ងៃទី១១ ខែកញ្ញា ឆ្នាំ២០១៩ ឱ្យដឹងថា កំណាត់ផ្លូវជាតិលេខ៥០C ដែលតភ្ជាប់ពីស្រុកកំពង់លែង ខេត្តកំពង់ឆ្នាំង ទៅក្រុងស្ទឹងសែន ខេត្តកំពង់ធំ ត្រូវបានកាត់ផ្ដាច់ទាំងស្រុងហើយ ដោយសារតែស្ថានភាពទឹកជំនន់។ លោកបានបញ្ជាក់ថា កំណាត់ផ្លូវដែលកំពុងជន់លិចមានប្រហែលជាង៦គីឡូម៉ែត្រ ដោយដាច់ជាកង់ៗ មានជ្រៅ មានរាក់ មិនអាចធ្វើដំណើរបានឡើយ។ បច្ចុប្បន្នសូម្បីតែម៉ូតូក៏ស្ទើរតែបើកឆ្លងកាត់មិនរួចផង ។
លោកបានបញ្ជាក់ថា កំណាត់ផ្លូវនេះចាប់ផ្ដើមកាត់ផ្ដាច់នៅយប់ថ្ងៃទី១០ ខែកញ្ញា និងបន្តរហូតមកដល់ពេលនេះកាន់តែទឹកឡើងខ្ពស់បន្ថែមទៀត អាស្រ័យហេតុនេះហើយក្នុងនាមអាជ្ញាធរស្រុកកំពង់លែង លោកសំណូមពរដល់ប្រជាពលរដ្ឋជាអ្នកធ្វើដំណើរទាំងអស់ សូមកុំធ្វើដំណើរឆ្លងកាត់ពីកំពង់ឆ្នាំងទៅកំពង់ធំ ឬពីកំពង់ធំមកកំពង់ឆ្នាំងជាបន្តទៀត ព្រោះនាំឱ្យខាតពេលវេលាដោយសារតែពេលទៅដល់ចំណុចខាងលើគឺមិនអាចបន្តទៅមុខបានឡើយ ។ ម្យ៉ាងវិញទៀតដើម្បីធានាបានផ្លូវថ្នល់ប្រើប្រាស់យូរអង្វែងលោកក៏បានសំណូមពរដល់រថយន្តធុនធំនៅពេលទឹកស្រកមិនទាន់ឲ្យបើកឆ្លងកាត់នៅឡើយទេលុះត្រាតែដីផ្លូវនោះរឹងវិញសិន។
គួរបញ្ជាក់ដែរថា នៅព្រឹកថ្ងៃទី១១ ខែកញ្ញា ពេលភ្នាក់ងារកោះសន្តិភាពបានចុះទៅដល់កន្លែងដែលមានទឹកជំនន់លិចផ្លូវ គឺឃើញការធ្វើចរាចរណ៍បានតែម៉ូតូប៉ុណ្ណោះ ហើយក្រៅពីនោះគោយន្តអាចធ្វើដំណើរបាន។ ដោយឡែកអ្នកដែលចង់ធ្វើដំណើរបន្តលើផ្លូវនោះ ត្រូវជិះកាណូតឆ្លង ដោយក្នុងមនុស្សម្នាក់ចំណាយប្រាក់៥ពាន់រៀល ចំណែកម៉ូតូមួយគ្រឿងចំនួន២ម៉ឺនរៀលផងដែរ ។
សូមបញ្ជាក់ដែរថា កំណាត់ផ្លូវតភ្ជាប់ពីក្រុងស្ទឹងសែន ខេត្តកំពង់ធំមកស្រុកកំពង់លែង ខេត្តកំពង់ឆ្នាំង នៅពេលដែលធ្វើចរាចរណ៍បាន ធ្វើឲ្យស្រុកមួយនេះមានការរីកចំរើនច្រើន ហើយប្រជាពលរដ្ឋដែលធ្វើដំណើរឆ្លងកាត់មានភាពឆាប់រហ័សងាយស្រួល ប៉ុន្តែផ្លូវមួយខ្សែនេះធ្វើដំណើរបាននៅខែប្រាំងតែប៉ុណ្ណោះ លុះដល់ខែវស្សារយៈពេល៣ទៅ៤ខែត្រូវទឹកជន់លិចផ្លូវមិនអាចធ្វើដំណើរបានឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ