រាជធានីភ្នំពេញ ៖ អ្នកនាំពាក្យក្រសួងអប់រំយុវជន និងកីឡា លោកបណ្ឌិត រស់ សុវាចា បានបញ្ជាក់ថា ក្រសួងមិនមានគោលការណ៍បើកចំហរជូនបេក្ខជនដូចឆ្នាំ២០១៨នោះទេ ចំពោះការតវ៉ារបស់បេក្ខជនប្រឡងសញ្ញាបត្រទុតិភូមិឆ្នាំ២០១៩នេះ…
រាជធានីភ្នំពេញ ៖ អ្នកនាំពាក្យក្រសួងអប់រំយុវជន និងកីឡា លោកបណ្ឌិត រស់ សុវាចា បានបញ្ជាក់ថា ក្រសួងមិនមានគោលការណ៍បើកចំហរជូនបេក្ខជនដូចឆ្នាំ២០១៨នោះទេ ចំពោះការតវ៉ារបស់បេក្ខជនប្រឡងសញ្ញាបត្រទុតិភូមិឆ្នាំ២០១៩នេះ ។ ការបញ្ជាក់របស់អ្នកនាំពាក្យក្រសួង ក្រោយពីមានបេក្ខជនប្រឡងសញ្ញាបត្រទុតិយភូមិ (បាក់ឌុប) ចំនួនតិចនៅរាជធានីភ្នំពេញបានផ្ទុះការតវ៉ាចំពោះពិន្ទុរបស់ពួកគេថា មិនត្រឹមត្រូវ នៅព្រឹកថ្ងៃទី១១ ខែកញ្ញានេះ។
លោកបណ្ឌិត រស់ សុវាចា បានឲ្យដឹងយ៉ាងដូច្នេះថា«ក្រសួងមិនមានគោលការណ៍បើកចំហរជូនបេក្ខជនដូចឆ្នាំ២០១៨ទេ ។ ក្រសួងយល់ពីមនោសញ្ចេតនារបស់បេក្ខជន និងក្រុមគ្រួសារក្រោយពីទទួលលទ្ធផលប្រឡងសញ្ញាបត្រមធ្យមសិក្សាទុតិយភូមិនីមួយៗ» ។ អ្នកនាំពាក្យបានបន្តថា ជាទូទៅក្រសួងអប់រំ ស្វាគមន៍មតិរិះគន់ស្ថាបនា និងឆ្លើយតបតាមភាពចាំបាច់ និងតាមគោលការណ៍ច្បាប់ យុត្តិធម៌ តម្លាភាព និងលទ្ធផលអាចទទួលយកបាន ។ លោកថា សុក្រឹតភាព និងប្រសិទ្ធភាពនៃគ្រប់ដំណាក់កាលប្រឡងឆ្នាំនេះបានមកពីកិច្ចសហការរបស់គ្រប់ភាគីពាក់ព័ន្ធ ជាពិសេសក្រុមការងារកំណែក្រដាសកិច្ចការបេក្ខជន ក្រុមការងារស្រង់បូកពិន្ទុដោយកំព្យូទ័រ និងពិនិត្យផ្ទៀងផ្ទាត់ពិន្ទុ ។
អ្នកនាំពាក្យរូបនេះបានសង្កត់ធ្ងន់ថា ដូច៥ឆ្នាំកន្លងមកក្រសួងក៏បានទទួលកិច្ចសហការពីអង្គភាពប្រឆាំងអំពើពុករលួយ ក្រសួងមហាផ្ទៃ សហភាពសហព័ន្ធយុវជនកម្ពុជា និងក្រសួង- ស្ថាប័ននានា ដើម្បីឲ្យដំណើរការប្រឡងប្រព្រឹត្តទៅដោយរលូន ។
បេក្ខជនម្នាក់ក្នុងចំណោមជាច្រើននាក់មកតវ៉ានេះបានឲ្យដឹងថា មុខវិជ្ជាខ្លះធ្វើបានល្អស្ទើរតែទាំងអស់ហើយថា និទ្ទេសបានសុទ្ធតែE តែលទ្ធផលបែរជាបាននិទ្ទេសធ្លាក់ទៅ វិញ ។ បេក្ខនារីម្នាក់ឈ្មោះ ងិន សុភីយ៉ា រៀននៅសាលាស៊ីសុវត្ថិ ហើយថា មិនចាំមណ្ឌល ប្រឡងខ្លួនបានអះអាងការដែលនាំគ្នាមកនេះ ដើម្បីតវ៉ាចំពោះលទ្ធផលប្រឡងបាក់ឌុប កាលពីថ្ងៃទី១៩-២០ សីហា ដោយសារប្រឡងធ្លាក់ ។ បេក្ខនារីបានបញ្ជាក់ថា ៖«ពួកខ្ញុំមិនសុខចិត្តដោយសារមុខវិជ្ជាដែលពួកខ្ញុំធ្វើបានតែធ្លាក់ (F) លក្ខណៈពួកខ្ញុំធ្វើបានស្ទើគ្រប់សំណួរតែធ្លាក់ តែអ្នកដែលធ្វើមិនបានបែរជាបាននិទ្ទេសB ។ មុខវិជ្ជាគណិត និងប្រវត្តិពួកខ្ញុំធ្វើបានច្រើនជាងគេ» ។ បេក្ខនារីដដែលបានបន្តថា ការមកនេះ ដើម្បីឲ្យក្រសួងពិនិត្យពិន្ទុរបស់ខ្លួនឡើងវិញ ព្រោះថា លទ្ធផលដែលទទួលបាននោះមិនសមនឹងអ្វីដែលខ្លួនទទួលបាននោះទេ ។ ចំណែកបេក្ខនារីម្នាក់ទៀតបានអះអាងខ្លួនបានប្រឡងផ្នែកវិទ្យាសាស្ត្រថា បានធ្វើមុខវិជ្ជាបានល្អស្ទើរទាំងអស់បែរជាទទួលនិន្ទេសធ្លាក់ (F) ។
គួរឮកថា លទ្ធផលនៃការប្រឡងបាក់ឌុបឆ្នាំ២០១៩ ត្រូវបានក្រសួង កាលពីថ្ងៃទី៩-១០កញ្ញាកន្លងមកនេះ ដោយលទ្ធផលបេក្ខជនប្រឡងជាប់មានចំនួន៧៩០៥២ នាក់ ត្រូវជា ៦៨.៦២% (បើប្រៀបធៀបនឹងឆ្នាំ២០១៨ បេក្ខជនប្រឡងជាប់ ៦៧.០៧%) ។ បេក្ខជនទទួលបាននិទ្ទេស A មានចំនួន៤៤៣នាក់ (ឆ្នាំ២០១៨ ចំនួន៤០៨នាក់) និទ្ទេស Bមានចំនួន២៤៣០នាក់ (ឆ្នាំ២០១៨ ចំនួន ២២២២នាក់) និទ្ទេស C មានចំនួន៥៨៤៧ នាក់ (ឆ្នាំ២០១៨ ចំនួន៦០៤១នាក់ ) និទ្ទេស D មានចំនួន ១៤១០០នាក់ (ឆ្នាំ២០១៨ ចំនួន ១៥១៨០នាក់) និងនិទ្ទេស E មានចំនួន ៥៦២៣២ នាក់ (ឆ្នាំ ២០១៨ ចំនួន ៥២១៨៣ នាក់) ៕ កែសម្រួលដោយ ៖ សុឃាក់
ចែករំលែកព័តមាននេះ