FIFA20 មានឈ្មោះកីឡាករ Man Utd ពីរនាក់ និងChelsea តែម្នាក់
តាមប្រភពព័ត៌មាន The Sun បានឱ្យដឹងថា កីឡាករឈរលើតារាង Top100 របស់ FIFA ឆ្នាំ២០២០ ត្រូវបានដាក់បង្ហាញជាផ្លូវការ។…
តាមប្រភពព័ត៌មាន The Sun បានឱ្យដឹងថា កីឡាករឈរលើតារាង Top100 របស់ FIFA ឆ្នាំ២០២០ ត្រូវបានដាក់បង្ហាញជាផ្លូវការ។ វាបានធ្វើឱ្យបេះដូងរបស់អ្នកគាំទ្រ Manchester United និង Chelsea មានការប្រេះស្រាំ ក្រោយពីបានឃើញវារួច។
David De Gea និង Paul Pogba គឺជាកីឡាកររបស់ក្លិបបិសាចក្រហម Manchester United តែ២នាក់គត់ ដែលមានឈ្មោះនៅលើតារាង។ David មានពិន្ទុ៨៩ ខណៈដែល Pogba បាន៨៨ពិន្ទុ។ វាកាន់តែពិបាកនឹងមើលសម្រាប់ក្លិបតោខៀវមកពីអង់គ្លេស ព្រោះថាមានកីឡាករតែម្នាក់ដែលបានជាប់ ហើយម្នាក់នោះគឺជា N’Golo Kante ដែលបានពិន្ទុ៨៩។
ជាមួយគ្នានេះដែរ កីឡាករជើងខ្លាំងរបស់ក្លិបអ្នកមានបុណ្យ Lionel Messi គឺជាកីឡាករដែលស្ថិតនៅលើកំពូលនៃតារាងសម្រាប់ហ្គេមបាល់ទាត់ FIFA20 ដែលផលិតដោយក្រុមហ៊ុន EA Sports។ សម្រាប់កីឡាករព័រទុយហ្កាល់កំពូល Cristiano Ronaldo និង កីឡាករប្រេស៊ីលស្រស់សង្ហារ Neymar ស្ថិតនៅលេខរៀងបន្ទាប់ (លេខ២ និង លេខ៣) ខណៈដែលមាន់ថ្មីរបស់ក្លិបអធិរាជស Eden Hazard ស្ថិតនៅលេងរៀងទី៤។
ក្រុមហ៊ុនហ្គេម EA Sports នឹងរាយឈ្មោះជាផ្លូវការសម្រាប់កីឡាករ១០០នាក់លើតារាង Top100 នៅក្នុងហ្គេមថ្មីជំនាន់ឆ្នាំ២០២០ ដែលគ្រប់គ្នាកំពុងទន្ទឹងរង់ចាំ នៅចុងខែកញ្ញានេះ។ Messi ត្រូវបានគេផ្តល់ពិន្ទុឱ្យដល់ទៅ៩៤ពិន្ទុ ខណៈដែល Ronaldo បាន៩៣ពិន្ទុ Neymar បាន៩២ពិន្ទុ និង Eden Hazard បាន៩១ពិន្ទុ។
ដោយឡែក Jan Oblak អ្នកចាំទីរបស់ក្លិប Atletico Madrid គឺជាអ្នកចាំទីឈរលើលំដាប់កំពូល ដែលមានពិន្ទុសរុប៩១ពិន្ទុ ៕ (សម្រួលដោយ៖ ស្រីណា)
ចែករំលែកព័តមាននេះ