រាជធានីភ្នំពេញ ៖ កម្ពុជាសម្រេចទិញថាមពលអគ្គិសនីផលិតដោយធ្យូងថ្មមានកម្លាំងអនុភាព២៤០០មេហ្គាវ៉ាត់ពីប្រទេសឡាវ សម្រាប់ផ្តត់ផ្គងនៅក្នុងប្រទេស ។ នេះបើតាមលោកផៃ ស៊ីផាន អ្នកនាំពាក្យរាជរដ្ឋាភិបាល ។ លោក…
រាជធានីភ្នំពេញ ៖ កម្ពុជាសម្រេចទិញថាមពលអគ្គិសនីផលិតដោយធ្យូងថ្មមានកម្លាំងអនុភាព២៤០០មេហ្គាវ៉ាត់ពីប្រទេសឡាវ សម្រាប់ផ្តត់ផ្គងនៅក្នុងប្រទេស ។ នេះបើតាមលោកផៃ ស៊ីផាន អ្នកនាំពាក្យរាជរដ្ឋាភិបាល ។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានឲ្យដឹងថា នៅក្នុងកិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានាព្រឹក ថ្ងៃទី១១ ខែកញ្ញានេះ បានសម្រេចអនុម័តលើ«ការធានារបស់រាជរដ្ឋាភិបាលសម្រាប់គម្រោងទិញថាមពលអគ្គិសនីផលិតដោយធ្យូងថ្ម ២៤០០ មេហ្កាវ៉ាត់ពីប្រទេសឡាវ» ។
លោកបានបង្ហាញខ្លឹមសារសង្ខេបគម្រោងទិញថាមពលដូចខាងក្រោម ៖
គម្រោងទិញប្រភពអគ្គិសនីផ្ទាល់ពីរោងចក្រផលិតអគ្គិសនីដុតធ្យុងថ្មចំនួន២របស់ប្រទេសឡាវ ដែលមានអានុភាពសរុប២៤០០មេហ្កាវ៉ាត ឋិតនៅតំបន់រ៉ែធ្យូងថ្មនៃខេត្តសេកុងប្រទេសឡាវ ។ ផែនការបន្ថែមប្រភពអគ្គិសនី ដើម្បីផ្គត់ផ្គង់សេចក្តីត្រូវការឲ្យបានគ្រប់គ្រាន់ស្ថេរភាពនយោបាយ និងសន្តិភាពនៅកម្ពុជាបាននាំមកនូវការវិនិយោគផ្នែកសេដ្ឋកិច្ចដ៏ច្រើនលើគ្រប់វិស័យជាបន្ទាប់ រួចស្ថានភាពកាន់តែល្អនៅក្រោយការបោះឆ្នោតសកលឆ្នាំ២០១៨ បានធ្វើឲ្យសកម្មភាពវិនិយោគនេះកើនលើពេលមុនៗជះឥទ្ធិពលឲ្យសេចក្តីត្រូវការប្រើប្រាស់អគ្គិសនីកើនឡើងច្រើនលើសពីការគ្រោងទុក។
ដោយកំណើនសេចក្តីត្រូវការអគ្គិសនីច្រើនខុសពីការគ្រោងដូចេះ្ន ដើម្បីឲ្យការផ្គត់ផ្គង់អគ្គិសនីនៅឆ្នាំបន្តទៀតនៅកម្ពុជាមានសុវត្ថិភាព និងសន្តិសុខ ក្រសួងរ៉ែ និងថាមពល បានរៀបចំការសិក្សាផែនការមេអភិវឌ្ឍវិស័យអគ្គិសនីឡើងវិញចំនួន២ គឺ ១.ការសិក្សាផែនការមេបន្ទាន់សម្រាប់រយៈពេលមធ្យមពីឆ្នាំ២០២០ ដល់ឆ្នាំ២០៣០ ដែលបច្ចុប្បន្នកំពុងតែសិក្សាដោយក្រុមហ៊ុនទីប្រឹក្សាឈ្មោះ Chugoku Electric Power Co., Inc មកពីប្រទេសជប៉ុន ក្នុងក្របខណ្ឌនៃថវិការបស់អគ្គិសនីកម្ពុជា ។ ២. ការសិក្សាផែនការមេសម្រាប់រយៈពេលវែងពីឆ្នាំ២០២០ ដល់ឆ្នាំ២០៤០ ដែលសិក្សា ដោយក្រុមហ៊ុនទីប្រឹក្សាឈ្មោះ Intelligent Energy System Pty, Ltd. (IES) មកពីប្រទេសអូស្ត្រាលីក្នុងក្រមខណ្ឌជំនួយបច្ចេកទេសរបស់ធនាគារអភិវឌ្ឍន៍អាស៊ី (ADB) ។
លោកបន្តថា ក្នុងការបន្ថែមការនាំចូលប្រភពអគ្គិសនីពីប្រទេសជិតខាងដោយសារតែ ប្រទេសវៀតណាម និងប្រទេសថៃ គឺជាប្រទេសអ្នកប្រើអគ្គិសនីច្រើនដែលការនាំចូលអ គ្គិសនីពីប្រព័ន្ធផ្គត់ផ្គង់អគ្គិសនីរបស់ប្រទេសទាំង២នេះ គឺជាការរំលែងប្រភពអគ្គិសនីពី ការប្រើប្រាប់របស់ប្រទេសគេ ដែលឆ្នាំខ្លះសល់ឆ្នាំខ្លះខ្វះ ដូច្នេះចំពោះការនាំចូលអគ្គិសនីយើងតម្រង់ទិសជាអាទិភាពទៅរកប្រទេសឡាវ ដែលជាប្រទេសអ្នកផលិតអគ្គិសនីដើម្បីលក់ចេញយកចំណូលវិញ ពីព្រោះការនាំចូលប្រភពអគ្គិសនីពីប្រទេសឡាវជាការនាំចូលប្រភពអគ្គិសនីមួយដែលមានលក្ខណៈអនុគ្រោះជាង ទាំងថ្លៃទាំងទំហំ និងទាំងលក្ខខណ្ឌទិញព្រមទាំងមានសុត្ថិវភាពយូរអង្វែងជាងផង ។
គម្រោងទិញប្រភពផ្គត់ផ្គង់អគ្គិសនីផ្ទាល់ពីរោងចក្រអគ្គិសនីដុតធ្យូងថ្មរបស់ប្រទេសឡាវ ក្រសួងថាមពល និងរ៉ែនៃប្រទេសឡាវ យើងខ្ញុំបានទទួលដំណើងថា នៅស្រុក«កាលើម» ខេត្តសេកុង និងនៅស្រុក «តាអយ» ខេត្តសាឡាវ៉ាន ប្រទេសឡាវគេបានរកឃើញរ៉ែធ្យូងថ្មប្រភេទ «អេនត្រាស៊ីត និងលីញីត» ច្រើនដែលគេអាចធ្វើការសាងសង់ រោងចក្រផលិត អគ្គិសនីដុតធ្យូងថ្មនៅទីនោះផលិតជាអគ្គិសនី ហើយលក់ប្រភពអគ្គិសនីនេះឲ្យប្រទេសជិតខាង ។
ខ្លឹមសាដដែលបានឲ្យដឹងថា ក្រសួងថាមពល និងរ៉ែនៃប្រទេសឡាវបានប្រាប់ថា ប្រសិនបើកម្ពុជាចង់ទិញប្រភពអគ្គិសនីពីសក្តានុពលរ៉ែធ្យូងថ្មរបស់គេនេះកម្ពុជាអាចពិនិត្យលទ្ធភាពទិញប្រភពអគ្គិសនីពីរោងចក្រផលិតអគ្គិសនីនេះ ដោយផ្ទាល់បាន ដោយមិនបាច់ទិញ ឆ្លងកាត់ប្រព័ន្ធផ្គត់ផ្គង់អគ្គិសនីរបស់អគ្គិសនីឡាវទេ ៕ កែសម្រួលដោយ ៖សុឃាក់
ចែករំលែកព័តមាននេះ