ទស្សនាវដ្តី «ហ្វប់» (Forber) របស់សហរដ្ឋអាមេរិកបានប្រកាសលទ្ធផលរៀបចំលំដាប់ថ្នាក់ប្រទេសដែលគួរឱ្យវិនិយោគទុនបំផុតនៅលើសាកលលោកនាពេលបច្ចុប្បន្ន គឺប្រទេសដាណឺម៉ាក ជាប្រទេសជើងឯក ។ ទស្សនាវដ្តីហ្វប់ រៀបចំចំណាត់ថ្នាក់ប្រទេសគួរឱ្យចង់វិនិយោគបំផុតដោយគិតលើកត្តាបរិស្ថានផ្សេងៗ រួមទាំងកត្តាទាក់ទងនឹងនយោបាយរបស់រដ្ឋាភិបាលប្រទេសនោះ ដែលផ្តល់ភាពងាយស្រួលដល់អ្នកវិនិយោគទុនបរទេស ។ ប្រទេសទាំង១០ដែលគួរឱ្យចង់វិនិយោគទុនបំផុតតាមរយៈការប៉ាន់ប្រមាណរបស់ Forber រួមមានប្រទេសដាណឺម៉ាក ក្រុងហុងកុង ញូវហ្សេឡែន កាណាដា សិង្ហបុរី សាធារណរដ្ឋអៀរឡង់ ស៊ុយអែត ណ័រវ៉េស សហរដ្ឋអាមេរិក និងអង់គ្លេស ។
ចំណែកប្រទេសជប៉ុន ដែលស្ថិតនៅក្នុងលំដាប់ទី៣ នៃសេដ្ឋកិច្ចពិភពលោក ស្ថិតក្នុងលំដាប់ទី២៧ និងកូរ៉េខាងត្បូង ស្ថិតនៅលំដាប់ទី៣០ ។ ដោយឡែកប្រទេសចិន ជាប្រទេសលំដាប់ទី២ នៃសេដ្ឋកិច្ចពិភពលោក បន្ទាប់ពីអាមេរិកត្រូវបានចាត់លំដាប់ថ្នាក់គួរឱ្យវិនិយោគបំផុតក្នុងលំដាប់ទី៩០ ។ រីឯប្រទេសថៃ ត្រូវបានទស្សនាវដ្តី Forber រៀបចំឱ្យនៅលំដាប់ទី៥៦ និងជាប្រទេសគួរឱ្យវិនិយោគបំផុតនៅលំដាប់ទី៣ ក្នុងអាស៊ាន បន្ទាប់ពីសិង្ហបុរី និងម៉ាឡេស៊ី ។ សំរាប់ប្រទសវៀតណាម ស្ថិតនៅលំដាប់ទី១១៨ ពីចំនួនប្រទេសដែលត្រូវរៀបចំលំដាប់ថ្នាក់សរុប១២៨ នៅទូទាំងពិភពលោក ព្រោះនៅមានបញ្ហាទាក់ទងនឹងនយោបាយ ។
ស្របពេលជាមួយគ្នានេះ ទស្សនាវដ្តីហ្វប់ បញ្ជាក់ថា ប្រទេសដែលមានចំណាប់អារម្មណ៍ក្នុងការវិនិយោគទុនទាបបំផុតនៅលើសាកលលោក គឺវ៉េណេហ្ស៊ុយអេឡា នៅទ្វីបអាមេរិកខាងត្បូង ស្ថិតនៅលំដាប់ទី១២៨ ព្រោះមេដឹកនាំប្រទេសមានរហស្សនាមថា ជាអ្នកមាននយោបាយបដិបក្សចំពោះអ្នកវិនិយោគទុនបរទេសខ្លាំងបំផុតនៅលើពិភពលោក ៕
ចែករំលែកព័តមាននេះ