ខេត្តសៀមរាប ៖ តាមចម្លើយសារភាពរបស់ជនសង្ស័យទាំង៨នាក់នេះ គឺពួកគេពិតជាបានធ្វើសកម្មភាពលួចគោ-ក្របីអ្នកស្រុកនៅក្នុងខេត្តសៀមរាបប្រាកដមែន ។ លោកស្នងការរងបានអំពាវនាវដល់បងប្អូនប្រជាពលរដ្ឋដែលមានគោ-ក្របី សូមដេញចូលក្រោល ព្រមទាំងមានរោងដាក់ឱ្យបានត្រឹមត្រូវ និងចេះប្រុងប្រយ័ត្នផង និងសូមចូលរួមសហការជាមួយសមត្ថកិច្ចឱ្យបានជាប់ជាប្រចាំ ។
សូមបញ្ជាក់ថា ក្រុមចោរលួចក្របីកាលពីពេលមុននេះ តែមិនបានសម្រេច ដោយសារពលរដ្ឋភ្ញាក់ផ្អើលហើយបើករថយន្តរត់បាត់នោះ បានមកប៉ងលួចម្តងទៀត ក៏ត្រូវចាប់ខ្លួនបានជាបន្តបន្ទាប់ចំនួន៨នាក់ ។
លោកវរសេនីយ៍ឯក ដួង សុខា នាយការិយាល័យនគរបាលព្រហ្មទណ្ឌកម្រិតធ្ងន់ខេត្តថ្លែងថា ដោយមានសហការគ្នាយ៉ាងស្អិតរមួតជាមួយប្រជាការពារភូមិ នគរបាលស្រុកប្រាសាទបាគង នគរបាលស្រុកបន្ទាយស្រី និងនគរបាលស្រុកពួក បានតាមប្រមាញ់រហូតដល់ខេត្តបាត់ដំបង ឃាត់ខ្លួនក្រុមចោរលួចគោក្របីជាបន្តបន្ទាប់បានចំនួន៨នាក់ និងបានកសាងសំណុំរឿងបញ្ជូនទៅសាលាដំបូងខេត្តនៅថ្ងៃទី៦ ខែកញ្ញា ។
លោកនាយការិយាល័យឲ្យដឹងថា ក្រុមនេះតែងធ្វើសកម្មភាពយករថយន្តកូរ៉េចំណុះ២តោនកន្លះនិង៣តោនមកលួចដឹកគោក្របីអ្នកភូមិក្នុងខេត្តសៀមរាបជាញឹកញាប់ ។ការបង្ក្រាបករណីចោរលួចគោក្របីរបស់អ្នកភូមិនេះ ធ្វើឡើងកាលពីវេលាម៉ោងប្រមាណ១និង២០នាទីរំលងអធ្រាត្រឈានចូលថ្ងៃទី៣ ខែកញ្ញាកន្លងទៅ នៅភូមិត្រាង ឃុំកណ្ដែក ស្រុកប្រាសាទបាគង ។
លោកឧត្តមសេនីយ៍ត្រី ភឹង ចិន្តារ៉េត ស្នងការរងនគរបាលខេត្ត ទទួលផែនកណ្តាលព្រហ្មទណ្ឌ ថ្លែងថា ក្រោមកិច្ចសហការប្រទាក់ក្រឡា គ្នារវាងអធិការដ្ឋាននគរបាលស្រុកប្រាសាទបាគង ស្រុកពួក ស្រុកបន្ទាយស្រី និងកម្លាំងការិយាព្រហ្មទណ្ឌកម្រិតធ្ងន់ខេត្ត រួមនឹងប្រជាការពារស្រុកប្រាសាទបាគង ទើបយើងបង្ក្រាបបានចោរ១ក្រុមជាបន្តបន្ទាប់ចំនួន៨នាក់ ខណៈ ពួកគេកំពុងធ្វើសកម្មភាពលួចគោដឹកតាមរថយន្ត កូរ៉េ២តោនកន្លះមួយគ្រឿង និង៣តោនកន្លះមួយគ្រឿង ដើម្បីយកទៅលក់តាមខេត្តផ្សេងៗ ។
លោកស្នងការរងបានឱ្យដឹងថា ក្រុមជនសង្ស័យទាំង៨នាក់នេះធ្លាប់ធ្វើសកម្មភាពលួចគោ ក្របីនៅក្នុងខេត្ត សៀមរាប ជាច្រើនលើកច្រើនសាមកហើយ ដែលមាន ៖
១-ឈ្មោះ ឆន ចាន់រ៉ា ភេទប្រុស អាយុ៣៤ឆ្នាំ នៅភូមិដើមរកា ឃុំខ្នារទទឹង ស្រុកបាកាន ខេត្តពោធិ៍សាត់
២-ឈ្មោះ ម៉ម ចន្ថា ភេទប្រុស អាយុ៣៧ឆ្នាំ នៅភូមិចេកចាវ ឃុំកំពង់ពោធិ៍ ស្រុកក្រគរ ខេត្តពោធិ៍សាត់
៣-ឈ្មោះ ឌី សៅរ៉ាន់ ភេទប្រុស អាយុ៣២ឆ្នាំ នៅភូមិកណ្ដុរស ឃុំបឹងកន្ទួត ស្រុកក្រគរ
៤-ឈ្មោះ កុក លីសា ភេទប្រុស អាយុ១៩ ឆ្នាំ ជាម្ចាស់រថយន្ត នៅភូមិចម្ការតាពង ឃុំស្រែស្ដុក ស្រុកកណ្តៀង ខេត្តពោធិ៍សាត់
៥-ឈ្មោះ គា តូ ភេទប្រុស អាយុ៣៩ឆ្នាំ នៅភូមិដូននំ ឃុំមានជ័យ ស្រុកប្រាសាទបាគង ខេត្តសៀមរាប ជាម្ចាស់រថយន្តកូរ៉េ២តោនកន្លះ
៦-ឈ្មោះ ស៊ឹម ប៉ិក ហៅប៉ក់ ភេទប្រុស អាយុ៥៧ឆ្នាំ នៅភូមិគក់ ឃុំផ្ទះព្រៃ ស្រុកសំពៅមាស ខេត្តពោធិ៍សាត់ ជាម្ចាស់រថយន្តកូរ៉េ៣តោន
៧-ឈ្មោះ ប្រាក់ សៀប ភេទប្រុស អាយុ៥៨ឆ្នាំ មានទីលំនៅភូមិគក់ ឃុំផ្ទះព្រៃ ស្រុកសំពៅមាស និង៨- ឈ្មោះ គ្រឿន កន ភេទប្រុស អាយុ២៩ឆ្នាំ រស់នៅស្រុកបាកាន ខេត្តពោធិ៍សាត់ ។
ចែករំលែកព័តមាននេះ