រាធានីភ្នំពេញ៖ មន្ត្រីជាន់ខ្ពស់ក្រសួងពាណិជ្ជកម្មបានអះអាងថាកម្ពុជាបានត្រៀមខ្លួនរួចជាស្រេច ដើម្បីអនុវត្តកិច្ចសម្រួលពាណិជ្ជកម្មឆ្លងកាត់ព្រំដែនដោយមិនបាច់ប្រើក្រដាសស្នាមនៅក្នុងក្របខណ្ឌតំបន់អាស៊ីប៉ាស៊ីហ្វិក ខណៈដែលបច្ចុប្បន្នច្បាប់ស្តីពីពាណិជ្ជកម្មអេឡិចត្រូនិករបស់កម្ពុជាកំពុងរងចំរដ្ឋសភាជាតិធ្វើការអនុម័តដាក់ឱ្យប្រើប្រាស់ជាផ្លូវការ។
រដ្ឋលេខាធិការក្រសួងពាណិជ្ជកម្ម លោកស្រី តឹករ៉េត កំរង មានប្រសាសន៍នៅពេលបើកសិក្ខាសាលាពិគ្រោះយោបល់លើកិច្ចសម្រួលពាណិជ្ជកម្មឆ្លងព្រំដែនដោយមិនបាច់ប្រើក្រដាសស្នាមនៅកម្ពុជាកាលពីថ្ងៃទី៥ ខែកញ្ញាកន្លងទៅនេះថា កម្ពុជាបានត្រៀមខ្លួនរួចជាស្រេច ដើម្បីអនុវត្តកិច្ចសម្រួលពាណិជ្ជកម្មឆ្លងកាត់ព្រំដែនដោយមិនបាច់ប្រើក្រដាសស្នាម តាមរយៈការចូលជាសមាជិកសន្ធិសញ្ញាអង្គការសហប្រជាជាតិ ស្តីពីប្រតិបត្តិការនៅតំបន់អាស៊ីប៉ាស៊ីហ្វិក ការបង្កើតគណៈកម្មាធិការបញ្ជរតែមួយជាតិ និងការប្រើប្រាស់ច្បាប់ស្តីពីពាណិជ្ជកម្មអេឡិចត្រូនិក ដែលបច្ចុប្បន្នកំពុងរង់ចាំរដ្ឋសភាជាតិធ្វើការអនុម័ត ដើម្បីដាក់ឱ្យប្រើប្រាស់ជាផ្លូវការ។
លោកស្រី តឹករ៉េត កំរង បានគូសបញ្ជាក់ថា «កិច្ចសម្រួលពាណិជ្ជកម្មឆ្លងកាត់ព្រំដែន មិនបាច់ប្រើក្រដាសស្នាម សម្រាប់បម្រើការអភិវឌ្ឍសេដ្ឋកិច្ចឌីជីថលនៅកម្ពុជា និងការជំរុញប្រសិទ្ធភាព គណនេយ្យភាព និងតម្លាភាពនៃលំហូរពាណិជ្ជកម្មនៅតាមប្រទេសក្នុងតំបន់ ដើម្បីបង្កើតភាពសុខដុមនីយកម្មសម្រាប់ពិភពលោក ក្នុងរយៈពេលយូរអង្វែង»។ លោកស្រីរដ្ឋលេខាធិការ បានបញ្ជាក់ថា រាជរដ្ឋាភិបាលកម្ពុជាបានប្តេជ្ញាចិត្ត ក្នុងការជំរុញពាណិជ្ជកម្មឆ្លងកាត់ព្រំដែនដោយមិនបាច់ប្រើក្រដាសស្នាម តាមរយៈការកែសម្រួលនីតិវិធីរដ្ឋបាល ការធ្វើទំនើបកម្មប្រព័ន្ធស្វ័យប្រវត្តិកម្មទិន្ន័យគយ ASYCUDA ការដាក់ចេញនូវកំណែទម្រង់ និងវិធានការសម្រួលពាណិជ្ជកម្មដ៏មុតស្រួច ការធ្វើបច្ចុប្បន្នភាព និងដាក់ឱ្យដំណើរការយុទ្ធសាស្ត្រសមាហរណកម្មពាណិជ្ជកម្ម ឆ្នាំ២០១៩-២០២៣ និងការចងក្រងច្បាប់ស្តីពីពាណិជ្ជកម្មអេឡិចត្រូនិក។
ទាក់ទងនិងច្បាប់ស្តីពីពាណិជ្ជកម្មអេឡិចត្រូនិកនេះបើតាមលោក ឡុង កែមវិចិត្រ មន្ត្រីអ្នកនាំពាក្យឆ្លាស់វេននៃក្រសួងពាណិជ្ជកម្មមានប្រសាសន៍ថា ច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិក រំពឹងថានឹងត្រូវបានអនុម័ត និងប្រកាសឱ្យប្រើមុនដំណាច់ ឆ្នាំ២០១៩ នេះ ។ បច្ចុប្បន្នសេចក្តីព្រាងច្បាប់នេះ បានឆ្លងកិច្ចប្រជុំអន្ដរគណៈកម្មការជំនាញ (ទី៥ និងទី៩) នៃរដ្ឋសភា ដើម្បីត្រៀមដាក់ក្នុងរបៀបវារៈនៃកិច្ចប្រជុំពេញអង្គនៃរដ្ឋសភា នាពេលខាងមុខនេះ (ក្រោយពេលរដ្ឋសភាបញ្ចប់វិស្សមកាលនៅដើមខែតុលាខាងមុខ)។
លោកបានបញ្ជាក់ថា ច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិកនៅពេលដាក់ឱ្យដំណើរការវានឹងផ្តល់ប្រយោជន៍៖១-) ផ្តល់ជាមូលដ្ឋានគតិយុត្ត ទំនុកចិត្ត និងប្រសិទ្ធភាពក្នុងការធ្វើពាណិជ្ជកម្មតាមប្រព័ន្ធអេឡិចត្រូនិក ព្រមទាំងជួយឱ្យការផ្តល់សេវាសាធារណៈរបស់រដ្ឋជូនដល់វិស័យឯកជនប្រព្រឹត្តទៅបានឆាប់រហ័ស,២-) កាត់បន្ថយការប្រើប្រាស់ក្រដាសស្នាមមិនចាំបាច់នានាក្នុងប្រតិបត្តិការទិញលក់ទំនិញ សេវា និងប្រតិបត្តិការផ្នែករដ្ឋប្បវេណីនានា,៣-) ធានាបាននូវការគ្រប់គ្រងអាជីវកម្ម ការទទួលបាននូវការគាំពារ ការលើកទឹកចិត្ត និងការបំពេញកាតព្វកិច្ចពន្ធដាររបស់សហគ្រាសដែលធ្វើពាណិជ្ជកម្មតាមប្រព័ន្ធអេឡិចត្រូនិកក្នុងប្រទេស និងជាមួយបរទេស,៤-)ផ្ដល់លទ្ធភាព និងមធ្យោបាយដល់សហគ្រាសធុនតូច និងមធ្យមអាចទទួលបានបច្ចេកវិទ្យាថ្មីៗ ព្រមទាំងអាចទិញ-លក់ទំនិញជាវត្ថុធាតុដើម សម្រាប់ផលិតកម្ម និងភ្ជាប់ខ្លូនទៅនឹងខ្សែសង្វាក់ផលិតកម្មតំបន់ និងអន្ដរជាតិនិង៥-) ការពារអ្នកប្រើប្រាស់ពីការឆបោកក្នុងការទិញលក់ទំនិញ ក៏ដូចជាការទូទាត់តាមប្រព័ន្ធអេឡិចត្រូនិក»។
បើតាមក្រសួងពាណិជ្ជកម្ម កាលពីថ្ងៃទី២៩ ខែសីហា ឆ្នាំ២០១៧ កម្ពុជាបានចុះហត្ថលេខាលើក្របខ័ណ្ឌកិច្ចព្រមព្រៀង ស្តីពីកិច្ចសម្រួលពាណិជ្ជកម្មឆ្លងព្រំដែនដោយមិនបាច់ប្រើក្រដាសស្នាមនៅអាស៊ីប៉ាស៊ីហ្វិក ដើម្បីពង្រឹងកិច្ចសហប្រតិបត្តិការពាណិជ្ជកម្មអន្តរជាតិ ប្រកបដោយប្រសិទ្ធិភាព និងតម្លាភាព ព្រមទាំងធានាបាននូវការគោរពបទដ្ឋានគតិយុត្ត ដែលនឹងផ្តល់អត្ថប្រយោជន៍រយៈពេលវែង ដល់ប្រទេសក្នុងតំបន់៕ កែសម្រួលដោយ ៖ សុឃាក់
ចែករំលែកព័តមាននេះ