រាជធានីភ្នំពេញ៖ ការកំណត់ប្រាក់ឈ្នួលអប្បបរមាផ្នែកវាយនភ័ណ្ឌ កាត់ដេរ និងផលិតផលស្បែកជើងសម្រាប់ឆ្នាំ២០២០ នូវមិនទាន់អាចផ្គូផ្គងគ្នាបាននៅឡើយនោះទេគិតត្រឹមសប្តាហ៍ទី១នៃខែកញ្ញានេះ ពោលខាងសហជីពតំណាងឱ្យកម្មកររោងចក្របានបង្ហាញតួលេខចង់បាន១៩៩ដុល្លារអាមេរិក ខណៈតំណាងសមាគមរោងចក្រកាត់ដេរ ហៅកាត់ថា (GMAC) ហ៊ានផ្តល់ជូនតែ១៨៤ដុល្លារអាមេរិក។
ទន្ទឹមនឹងការកំណត់ប្រាក់ឈ្នួលអប្បបរមាផ្នែកវាយនភ័ណ្ឌ កាត់ដេរ និងផលិតផលស្បែកជើងសម្រាប់ឆ្នាំ ២០២០ នៅមិនទាន់សម្រេច កម្មករ-កម្មការិនីបង្ហាញការសប្បាយចិត្តផង និងការព្រួយបារម្មណ៍ផង ព្រោះបទពិសោធន៍នាឆ្នាំកន្លងមក គឺពេលឡើងប្រាក់ឈ្នួលអប្បបរមា តម្លៃឈ្នួលបន្ទប់ក៏តែងតែហក់ឡើងត្រសងគ្នាផងដែរ ។ «វិស័យកាត់ដេរពិតជាសំខាន់សម្រាប់ជីវភាពគ្រួសាររបស់ខ្ញុំយ៉ាងពិតប្រាកដ ទន្ទឹមងនឹងការយកចិត្តទុកដាក់ពីសំណាក់សម្តេចតេជោ (ហ៊ុន សែន) និងស្ថាប័នផ្សេងៗទៀត ខ្ញុំក៏នៅតែបារម្មណ៍ខ្លាចឡើងបានលុយបន្ថែម ៥ ឬ ១០ ដុល្លារនៃប្រាក់ឈ្នួល (អប្បបរមា) នោះថ្លៃបន្ទប់ក៏ត្រូវបានម្ចាស់ផ្ទះគាត់តម្លើងថ្លៃផងដែរ ដូច្នេះសុំសម្តេចមេត្តាជួយទប់កុំឲ្យថ្លៃផ្ទះហក់ឡើងតាមប្រាក់ខែ» ។ នេះការលើកឡើងរបស់នាង សុផា ដែលជាកម្មការិនីរោងចក្រកាត់ដេរស្បែកជើងមួយកន្លែងនៅតាមបណ្តោយផ្លូវវែងស្រែង។
នៅពេលសាកសួរពាក់ព័ន្ធនឹងកង្វល់របស់ GMAC ពាក់ព័ន្ធនឹងភាពមិនច្បាស់
លាស់នៃការអនុគ្រោះពន្ធលើគ្រប់មុខទំនិញលើកលែងតែគ្រឿងសព្វាវុធ (EBA) ដែលសហភាពអឺរ៉ុបបានព្រមានដកចេញពីកម្ពុជានោះ សមាគមរោងចក្រកាត់ដេរនៅកម្ពុជា
បានជំរុញសហភាពអឺរ៉ុបមេត្តារក្សាកម្មវិធីអនុគ្រោះពន្ធ EBA ព្រោះជីវភាពកម្មករ៧៥០.០០០នាក់និងសុខុមាលភាពប្រជាពលរដ្ឋកម្ពុជាប្រមាណ៣លាននាក់កំពុងស្ថិតក្នុងហានិភ័យ បើសិនបាត់បង់ EBA នោះ នាង សុផា បានលើកឡើងថា «ខ្ញុំមិនដឹងលម្អិតអំពី EBA នេះទេ តែខ្ញុំធ្លាប់បានស្តាប់ប្រសាសន៍សម្តេចតេជោ លោកប្រាប់ថាមិនឲ្យកម្មកររោងចក្ររងគ្រោះដោយសារតែ EBA នោះទេ» ។
ងាកទៅបញ្ហានៃការកំណត់ប្រាក់ឈ្នួលអប្បបរមាណក្នុងវិស័យកាត់ដេរ លោក សោម អូន តំណាងសហជីពចរចារទាមទារប្រាក់ឈ្នួលអប្បបរមាជូនកម្មកររោងចក្របានឱ្យដឹងថា ក្រុមសហជីពតំណាងឱ្យកម្មកររោចក្រជិត១លាននាក់យើងបានជ្រើសរើសយកតួលេខរួមមួយគឺ១៩៩ដុល្លារអាមេរិកក្នុងមួយខែដែលជាប្រាក់ខែអប្បបរមាដែលទាបបំផុតនៅឆ្នាំ២០២០។
តាមលោក សោម អូន តួលេខនេះយើងរំពឹងថាទទួលបានប៉ុន្មាន? ខ្ញុំគិតថា តាមភាពជាក់ស្តែងខាងសមាគមរោងចក្រកាត់ដែរ គាត់ហ៊ានឡើងបានតែបន្តិច អីចឹងយើងត្រូវការចរចាគ្នាច្រើនដងទៀត។យើងរំពឹងតួលេខនេះអាចនឹងមានការប្រែប្រួលខ្លះ តែវាអាស្រ័យលើសមាគមរោងចក្រកាត់ដេរ ។អីចឹងយើងរំពឹងថា ខាងសមាគមកាត់ដេរអាចតម្លើងក្នុងកម្រិតមួយដែលអាចឱ្យទទួលយកបាន»។ លោកបានបញ្ជាក់ថា «ជំហររបស់យើងមកដល់ពេលនេះចង់បាន១៩៩ដុល្លារសម្រាប់ប្រាក់ខែអប្បបរមានៅឆ្នាំ២០២០។ការចរចាដំបូងយើងគ្រាន់តែបង្ហាញតួលេខរៀងខ្លួន អាចនឹងមានឡើង មានចុះ។ដូចនេះយើងសង្ឃឹមថាគាត់អាចនឹងតម្លើងច្រើន ហើយយើងអាចចុះខ្លះ»។
លោក ហេង សួរ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈមានប្រសាសន៍ថា ក្រុមប្រឹក្សាជាតិប្រាក់ឈ្នួលអប្បបរមា បានប្រជុំគ្នាលើកទី៣ជាលក្ខណៈត្រីភាគី ហើយកន្លងទៅខាងផ្ទៃក្នុង ពួកគាត់ប្រជុំបន្ថែមលើត្រីភាគី។ មកដល់ពេលនេះយើងមានវឌ្ឍនៈភាពដោយភាគីនីមួយៗបានបង្ហាញគោលជំហររបស់ខ្លួន។ខាងភាគីនិយោជកគាត់បង្ហាញតួលេខ១៨៤ដុល្លារអាមេរិក ជាតួលេខប្រាក់ឈ្នួលអប្បបរមាសម្រាប់ឆ្នាំ២០២០ ហើយទន្ទឹមគ្នានេះខាងភាគីតំណាងឱ្យកម្មករគាត់បានស្នើរនូវតួលេខ១៩៩ដុល្លារអាមេរិកជាប្រាក់ឈ្នួលអប្បបរមាឆ្នាំ២០២០។
លោកបានបន្តថា «យើងឃើញថាការកំណត់ប្រាក់ឈ្នួលអប្បបរមាឆ្នាំ២០២០នៅមានគម្លាតពីគ្នាប្រហែល១៥ដុល្លារអាមេរិក។សម្រាប់ខាងរាជរដ្ឋាភិបាលដែលជាអ្នកសម្របសម្រួលសម្រាប់ភាគីទាំងពីរនេះគិតថា រវាងភគីទាំងពីរនេះវាគ្មានអ្វីជាចម្លែកនោះទេ ដោយជាទូទៅ គ្រាន់តែភាគីម្ខាងផ្តើមឡើងដោយតួលេខរាងខ្ពស់ ហើយម្ខាងទៀតផ្តើមដោយតួលេខាងទាប ហើយនៅពេលយើងធ្វើការប្រជុំបន្តបន្ទាប់ទៀតហើយពន្យល់គ្នាបន្ថែមទៀត រំពឹងថាភាគីទាំងពីរអាចនឹងមានកែប្រែគោលជំហរជាបន្តបន្ទាប់»។
តាមលោក ហេងសួរ បើធ្វើការពិនិត្យទៅលើតួលេខដែលភាគីលើកឡើងនេះ ខាងតំណាងនីមួយៗលើកឡើងសុទ្ធតែមានហេតុផលដោយយោងទៅលើលក្ខណៈវិទ្យាសាស្ត្រនិងលក្ខណៈវិនិច្ឆ័យទាំង៧ដែលបានឯកភាពគ្នា។
យោងតាមសេចក្តីប្រកាសព័ត៌មានក្រសួងការងារនិងបណ្តុះបណ្តាលវិជ្ជាជីវៈបង្ហាញថា ក្រុមប្រឹក្សាជាតិប្រាក់ឈ្នួលអប្បបរមាបានបន្តកិច្ចប្រជុំលើកទី៣របស់ខ្លួនដើម្បីចរចាកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតផលស្បែកជើងសម្រាប់ឆ្នាំ២០២០ ក្រោយពីកម្មករនិយោជិតនិងភាគីនិយោជកបានប្រជុំពិភាក្សាផ្ទៃក្នុងរបស់ខ្លួនចំនួន២ដង។ ភាគីនីមួយបានបន្តប្រជុំពិភាក្សាយ៉ាងផុសផុល និងបានបង្ហាញនូវគោលជំហរបឋមរបស់ខ្លួនជូនអង្គរប្រជុំដោយភាគីរកម្មករនិយោជិត ស្នើយកតួលេខ១៩៩ដុល្លារអាមេរិក និងភាគីនិយោជកស្នើរយកតួលេខ១៨៤ដុល្លារអាមេរិក ជាតួលេខប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតផលស្បែកជើងសម្រាប់ឆ្នាំ២០២០ ។
សូមបញ្ជាក់ថាប្រាក់ឈ្នួលអប្បបរមាឆ្នាំ២០១៩ សម្រាប់កម្មករ-កម្មការិនីគឺមានចំនួន ១៨២ ដុល្លារអាមេរិកក្នុងមូយខែ ៕ កែសម្រួលដោយ ៖ សុឃាក់
ចែករំលែកព័តមាននេះ