ខេត្តឧត្តរមានជ័យ ៖ លោកនិប សាវ៉ាត់ ប្រធានក្រុមការងារស្រាវជ្រាវប្រវត្តិសាស្ត្រសង្គ្រាមបានដឹកនាំកងកំលាំងប្រដាប់អាវុធទាំងបីភេទ ដោយមានការចូលរួមពីអាជ្ញាធរមូលរដ្ឋានចុះធ្វើការស្រាវជ្រាវប្រវត្តិសាស្ត្រសង្គ្រាមនៅតាមខ្សែបន្ទាត់ព្រំដែនបានប្រទះឃើញគ្រាប់មិនទាន់ផ្ទុះកាលពីសម័យសង្គ្រាមចំនួន១២គ្រាប់ និងក្បាលគ្រាប់ចំនួន១៥គ្រាប់ កាលពីរសៀលថ្ងៃទី៧ កញ្ញា ឆ្នាំ២០១៩ ស្ថិតនៅចំណុចជើងភ្នំដងរ៉ែកធ្គាមរមាសតាទុំ ក្នុងភូមិធ្គាមរមាស ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។
លោកម៉ែន ផេន នាយប៉ុស្តិ៍តាទុំ និងជាប៉ូលិសការពារព្រំដែនគោកកម្ពុជា-ថៃ បានឱ្យដឹងថា មុនពេលប្រទះឃើញគ្រាប់មិនទាន់ផ្ទុះប្រភេទ៨២មីលីម៉ែត្រចំនួន១២គ្រាប់ និងក្បាលគ្រាប់ចំនួន១៥គ្រាប់ ដែលសេសសលកាលពីសម័យសង្គ្រាមនោះ ខណៈលោកនិប សាវ៉ាត់ ប្រធានក្រាមការងារបានដឹកនាំកំលាំងចុះស្រាវជ្រាវតាមខ្សែបន្ទាត់ព្រំដែន ស្រាប់តែប្រទះឃើញគ្រាប់ទាំងនោះតែម្តង ។
លោកនាយប៉ុស្តិ៍បានបញ្ជាក់ថា បន្ទាប់ពីប្រទះឃើញគ្រាប់ខាងលើរួចមក លោកក៏បានទូរស័ព្ទឱ្យក្រុមហេឡូត្រាសចុះមកទទួលយកទៅកម្ទេចចោលផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ