ក្រុងហុងកុង ៖ ពួកសកម្មជនស្និទ្ធលទ្ធិប្រជាធិបតេយ្យក្រុងហុងកុងច្រើនពាន់នាក់ កាលពីថ្ងៃទី៨កញ្ញាបានលើកគ្នាធ្វើបាតុកម្មនៅមុខស្ថានកុងស៊ុលអាមេរិកប្រចាំក្រុងហុងកុង ដើម្បីអំពាវនាវដល់ក្រុងវ៉ាស៊ិនតោនឲ្យធ្វើការគាបសង្កត់លើក្រុងប៉េកាំង ក្រោយ៣ខែនៃបាតុកម្ម។
ពួកបាតុករដំបូងប្រមូលផ្ដុំគ្នាក្នុងឧទ្យានមួយ មុនពេលលើកគ្នា ដើរហែក្បួនទៅកាន់ស្ថានកុងស៊ុលអាមេរិកដែលស្ថិតនៅក្បែរគ្នា ហើយនៅមុខស្ថានកុងស៊ុលនោះពួកគេហែក្បួនយឺតៗអស់ពេលច្រើនម៉ោង។ ពួកបាតុករបានកាន់ឆ័ត្រជានិមិត្តរូបនៃចលនារបស់ពួកគេ លើកទង់ជាតិអាមេរិកនិងប៉ង់កាតនានា ដែលអំពាវដល់ប្រធានាធិបតីអាមេរិក លោកដូណាល់ត្រាំឲ្យជួយរំដោះក្រុងហុងកុង។ បាតុករមួយចំនួនរហូតដល់ស្រែកច្រៀង បទគោរពទង់ជាតិអាមេរិកនិងថ្លែងសុន្ទរកថា ព្រមទាំងស្រែកពាក្យដែលស្នើដល់សហរដ្ឋអាមេរិក ឲ្យគាបសង្កត់ក្រុងប៉េកាំងដើម្បីជួយហុងកុងក្នុងកិច្ចការពារសេរីភាពរបស់ពួកគេ។
បាតុករម្នាក់អះអាងថាបាតុករជាង១ពាន់នាក់ត្រូវចាប់ខ្លួន។ យើងគ្មានមធ្យោបាយផ្សេងក្រៅពីធ្វើបាតុកម្មឡើយ។ យើងពិតជាមានអារម្មណ៍ថាអស់សង្ឃឹមណាស់។ យើងយល់ថាមានតែបណ្ដាប្រទេសក្រៅដែលអាចជួយយើងព្រោះគ្មាននរណាអាចជួយយើងបានទេ។
ដូចបាតុកម្មលើកមុនៗដែរ បាតុកម្មថ្ងៃទី៨កញ្ញាដំបូងប្រព្រឹត្តទៅដោយសន្តិវិធី ដោយគ្មានការប៉ះទង្គិចគ្នានៅពេលថ្ងៃ តែនាវេលាល្ងាចមានផ្ទុះការប៉ះទង្គិចគ្នាកើតឡើងរវាងប៉ូលិសនិងពួកបាតុកររ៉ាឌីកាល់ ដែលរាំងខ្ទប់វិថីនានា លុកចូលអុកឡុកក្នុងបណ្ដាស្ថានីយមេត្រូនិងដុតរបាំងទាំងឡាយ។
កំហឹងហាក់ពុំរសាយ៤ថ្ងៃក្រោយពីប្រមុខប្រតិបត្តិក្រុងហុងកុង លោកស្រីCARRIE LAMប្រកាសគួរឲ្យភ្ញាក់ផ្អើល ពីការលុបចោលជាស្ថាពរគម្រោងច្បាប់ធ្វើបត្យាប័នទៅចិនដីគោក ជាដើមចមនាំឲ្យផ្ទុះបាតុកម្មតវ៉ាមកដល់សព្វថ្ងៃ។ ពួកបាតុករចាត់ទុកការប្រកាសនោះថាយឺតពេល ពិសេសមិនគ្រប់គ្រាន់បើប្រៀបធៀបទៅនឹងបណ្ដាការទាមទាររបស់ពួកគេ៕ (កែសម្រួលដោយ ៖ បុប្ផា)
ចែករំលែកព័តមាននេះ