អគ្គលេខាធិការអង្គការសហប្រជាជាតិ លោកបាន គីមូន នឹងអញ្ជើញទៅបំពេញទស្សនកិច្ចនៅប្រទេសថៃ នាថ្ងៃទី២៦ តុលា សំដៅរឹតចំណងមិត្តភាពរវាងប្រទេសថៃ និងអង្គការសហប្រជាជាតិ ។ ទាក់ទិនទៅនឹងដំណើរទស្សនកិច្ចនោះរបស់លោកបាន គីមូន ចលនាអាវក្រហមបាននិងកំពុងរៀបចំញត្តិដាក់ជូនលោកចំពោះការស្លាប់មនុស្ស៩១នាក់ នៅក្នុងការបង្ក្រាបរបស់យោធា ដែលមានភក្តីភាពចំពោះរដ្ឋាភិបាល លោកអាប់ភីស៊ីត ក្នុងអំឡុងពេលនៃការធ្វើបាតុកម្មរបស់បាតុករអាវក្រហមកាលពីខែមេសា និងឧសភា កន្លងមក ។
លោកចាទុផន ព្រំផាន់ ជាមេដឹកនាំក្រុមអាវក្រហមសំខាន់មួយរូប និងជាសមាជិកសភាគណបក្សភឿថៃ ថ្លែងកាលពីថ្ងៃទី២៤ តុលា កន្លងមក ថា «យើងគ្រាន់តែចង់ប្រាប់លោកអគ្គលេខាធិការអង្គការសហប្រជាជាតិនូវការពិតអំពីអ្វីដែលបានកើតឡើងក្នុងប្រទេស ។ លោកចាទុផន ថ្លែងទៀតថា តំណាងចំនួន១០រូប នៃក្រុមរបស់លោកនឹងស្វះស្វែងរកឱកាសដាក់ជូនញត្តិទៅលោកបាន គីមូន ដោយផ្ទាល់ ហើយទន្ទឹមពេលគ្នានោះក្រុមរបស់លោកនឹងទទូចសុំឱ្យប្រមុខអង្គការសហប្រជាជាតិជួយធ្វើអន្តរាគមន៍ឱ្យមានការដោះលែងអ្នកទោសនយោបាយក្នុងប្រទេសថៃ ។
លោកចាទុផន ថ្លែងទៀតថា ករណីរបស់ក្រុមអាវក្រហមនឹងដាក់ជូនទៅតុលាការពិភព លោក ។ ប្រមុខ អ.ស.ប លោកបាន គីមូន អញ្ជើញទៅបំពេញទស្សនកិច្ចនៅប្រទេសថៃជាដំណើរទស្សនកិច្ចនៅអាស៊ីលើកដំបូងរបស់លោក ហើយក្រោយពីបំពេញទស្សនកិច្ចនៅថៃ លោកនឹងអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជាមុនពេលលោកអញ្ជើញទៅកាន់ប្រទេសវៀតណាម សំរាប់កិច្ចប្រជុំកំពូលអាស៊ាន ៕
ចែករំលែកព័តមាននេះ