ខេត្តឧត្តរមានជ័យ ៖ នៅវេលាម៉ោង៨ព្រឹក ថ្ងៃទី៨ ខែកញ្ញា ឆ្នាំ២០១៩ កម្លាំងមូលដ្ឋានកងរាជអាវុធហត្ថស្រុកអន្លង់វែងសហការជាមួយកម្លាំងយោធាវរសេនាតូចលេខ៤១១ នៃកងពលតូចថ្មើរជើងលេខ៤១ និងសហការជាមួយអាជ្ញាធរភូមិ ប្រជាការពារ ចុះឃាត់ខ្លួនក្មេងទំនើងឈ្មោះ ផា ផាន់ ហៅ ញ៉ាញ់ ភេទប្រុស អាយុ២០ឆ្នាំ មុខរបរធ្វើចំការ រស់នៅនភូមិគោគសំព័រ ឃុំលំទង ស្រុកអន្លង់វែង ខេត្តឧត្តរមានជ័យ ដែលបានបង្កហិង្សាដោយចេតនា ទៅលើជនរងគ្រោះឈ្មោះ ឱក សឿន ភេទប្រុស ៦៣ឆ្នាំ មុខរបរជាប្រជាការពារ រស់នៅភូមិឃុំកើតហេតុការមួយគ្នាបណ្តាលអោយរងរបួសធ្ងន់ផងដែរ ។
គួរបញ្ជាក់ថា កាលពីល្ងាចថ្ងៃទី៧ កញ្ញា ស្ថិតនៅចំណុចភូមិគោកសំព័រ ឃុំលំទង ស្រុកអន្លង់វែង ខេត្តឧត្តរមានជ័យ ជនរងគ្រោះឈ្មោះ ឱក សឿន ភេទប្រុស អាយុ៦៣ឆ្នាំ ជាប្រជាការពារ ភូមិគោគសំព័រ ខណៈកំពុងបើកម៉ូតូលើផ្លូវសាធារណៈ ស្រាប់តែជនសង្ស័យឈ្មោះ ផា ផាន់ ហៅ ញ៉ាញ់ ស្រវឹងក៏ធាក់ជនរងគ្រោះបណ្តាលឱ្យដួលម៉ូតូរងរបួសធ្ងន់ ហើយជនសង្ស័យបានរត់គេចខ្លួនបាត់ភ្លាមៗតែម្តង ។
ហើយនៅពេលនោះក៏មានការជួយអន្តរាគមន៍ពីកម្លាំងប្រចាំការរបស់អង្គភាពវរសេនាតូចលេខ៤១១ នៃពលតូចថ្មើរជើងលេខ ៤១ ដែលចុះជួយសង្គ្រោះដល់ប្រជាពលរដ្ឋនៅពេលមានគ្រោះ មហន្តរាយ និងក្រុមគ្រូពេទ្យដែលប្រចាំការនៅទីនោះបានជួយព្យាបាលជនរងគ្រោះឃើញថា បានរងរបួសនៅលើថ្ពាល់ខាងឆ្វេងប្រវែង៧ស.ម បែកក្បាល ផ្នែកខាងឆ្វេងប្រវែង ៣ស.ម និងរបួសលើជើងខាងឆ្វេងទៀត ។ បច្ចុប្បន្នជនសង្ស័យខាងលើត្រូវបានកម្លាំងអាវុធហត្ថស្រុកអន្លង់វែង កំពុងធ្វើការសាកសួរ និងកសាងសំណុំរឿងតាមនីតិវិធី ៕
កែសម្រួលដោយ ៖ សំណាង
ចែករំលែកព័តមាននេះ