នាំចូលអត់ប៉ាស្ព័រដាក់តាំងលក់ម៉ាសេរីហ្មង…
- ក្រចេះ
ខេត្តក្រចេះ ៖ ក្រុមមន្ត្រីសាខាគយ និងរដា្ឋករខេត្ត ក្រោមការដឹកនាំពី លោក ជា សុភ័ក្ត្រ ព្រះរាជអាជ្ញារងអម សាលាដំបូងខេត្ត…
ខេត្តក្រចេះ ៖ ក្រុមមន្ត្រីសាខាគយ និងរដា្ឋករខេត្ត ក្រោមការដឹកនាំពី លោក ជា សុភ័ក្ត្រ ព្រះរាជអាជ្ញារងអម សាលាដំបូងខេត្ត នៅថ្ងៃទី៧ កញ្ញា បានបើកប្រតិបត្តិការចុះឆែកឆរទីតាំងទិញ លក់ម៉ូតូតាមឃ្លាំង ធំៗក្នុងខេត្ត និងរឹបអូសបានម៉ូតូនាំចូលជាង៣០គ្រឿង ជាម៉ូតូគេចពន្ធនាំចូលពីប្រទេសវៀតណាម ដែលគេនិយាយថា ម៉ូតូអត់ប៉ាស្ព័រ ។
ក្រុមមន្ត្រីនិយាយថា មានម៉ូតូយ៉ាងហោចណាស់៣៣គ្រឿង ជាម៉ូតូខុសច្បាប់គ្មានពន្ឋនាំចូល ត្រូវបានរឹបអូសចេញពីតាមឃ្លាំងទិញលក់ម៉ូតូធំៗ ចំនួន២នៅក្នុងខេត្តក្រចេះ ។ ព្រះរាជអាជ្ញារងអមសាលាដំបូងខេត្ត លោក ជា សុភ័ក្ត្រ បានថ្លែងឲ្យដឹងថា ក្រោមការណែនាំពីលោក កែវ សុជាតិ ព្រះរាជអាជ្ញាអមសាលាដំបូងខេត្ត គឺសមត្ថកិច្ចនឹងបន្តស្រាវជ្រាវបង្ក្រាបម៉ូតូគ្មានពន្ឋបន្តទៀត ដែលមានដាក់លក់លួចលាក់នៅតាមឃ្លាំងម៉ូតូនានានៅក្នុងខេត្ត ។ បើតាមលោកព្រះរាជអាជ្ញារងបានបញ្ជាក់ថា ម៉ូតូទាំងចំនួន៣៣គ្រឿង ដែលរឹបអូសចេញពី ឃ្លាំងចំនួន២កន្លែងធំៗក្នុងខេត្តនេះ គឺត្រូវនាំទៅរក្សាទុកនៅសាខាគយ និងរដ្ឋាករ រង់ចាំបន្តនីតិវិធី ។
តាមប្រភពព័ត៌មានបាននិយាយឲ្យដឹងថា ម៉ូតូចំនួនរាប់រយគ្រឿង ដែលសុទ្ឋសឹងគ្មានពន្ឋនាំចូល ជាប្រភេទម៉ូតូដែលផលិតនៅប្រទេសវៀតណាម ត្រូវបានម្ចាស់ឃ្លាំងប្រមូលមកដាក់លក់យ៉ាងចំហ តម្រៀបត្រៀប ត្រានៅក្នុងឃ្លាំងម៉ូតូជាច្រើនកន្លែងក្នុងខេត្តក្រចេះ ។
ជាមួយគ្នានេះ ក៏មានការកត់សម្គាល់ឃើញថា នេះជាការអនុវត្តច្បាប់ នៃការចុះបោសសំអាត ម៉ូតូ ខុស ច្បាប់គ្មានពន្ឋជាទ្រង់ទ្រាយធំជាលើកទីមួយ ក្រោមការដឹកនាំពីស្ថាប័នអយ្យការអម សាលាដំបូងខេត្ត ខណៈកន្លងមកជាច្រើនឆ្នាំមកនេះ មន្ត្រីជំនាញសាខាគយ និងរដ្ឋាករខេត្ត បានសម្ងំមិនធ្លាប់អើពើជាមួយនិងវិធានការបង្ក្រាបម្តងណាសោះ ។
មិនដឹងថា ម៉ូតូអត់ប៉ាស្ព័របែបនេះ ត្រូវបានគេលក់ចេញអស់ប៉ុន្មានរយ ប៉ុន្មានពាន់គ្រឿងទៅហើយទេ ច្រើនឆ្នាំកន្លងមកនេះ ។ ទំនងកំពុងជិះពេញខេត្តក្រចេះ និងខេត្តជិតខាង បង្កការខាតបង់ដល់សង្គមមិនតិចឡើយ ៕ (សម្រួលដោយ៖ ស្រីណា)
ចែករំលែកព័តមាននេះ