រាជធានីភ្នំពេញ ៖ ក្រសួងអប់រំ យុវជន និងកីឡាបានបង្ហាញលទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ១៩ សីហា ២០១៩…
រាជធានីភ្នំពេញ ៖ ក្រសួងអប់រំ យុវជន និងកីឡាបានបង្ហាញលទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ១៩ សីហា ២០១៩ ដោយមានបេក្ខជនជាប់៦៨.៦២% ក្នុងនោះបេក្ខជនទទួលនិទេសA ចំនួន៤៤៣នាក់ Bចំនួន២៤៣០នាក់ Cចំនួន៥៨៤៧នាក់ Dចំនួន១៤១០០នាក់ និងទីE ចំនួន៥៦២ ៣២នាក់ ។
យោងតាមសេចក្តីជូនដំណឹងរបស់ក្រសួងអប់រំយុវជន និងកីឡាដែលកោះសន្តិភាពចេញផ្សាយកន្លងទៅបានឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិដែលបានប្រព្រឹត្តទៅកាលពីថ្ងៃទី១៩-២០ ខែ សីហា ឆ្នាំ២០១៩ បេក្ខជនប្រឡងជាប់មានចំនួន៧៩០៥២នាក់ ត្រូវជាង ៦៨.៦២% (បើប្រៀបធៀបនឹង ឆ្នាំ២០១៨ ចំនួន ៦៧.០៧%) ក្នុងនោះបេក្ខជនដែលទទួលបាននិទ្ទេស A មានចំនួន៤៤៣នាក់ (ឆ្នាំ២០១៨ ចំនួន៤០៨ នាក់ ) និទ្ទេស B មានចំនួន២ ៤៣០ នាក់ (ឆ្នាំ២០១៨ ចំនួន២២២២នាក់) និទ្ទេស C មានចំនួន៥៨៤៧នាក់ (ឆ្នាំ២០១៨ ចំនួន ៦០៤១ នាក់) និទ្ទេស D មានចំនួន១៤១០០នាក់ (ឆ្នាំ២០១៨ ចំនួន១៥១៨០ នាក់ ) និងនិទ្ទេស E មានចំនួន៥៦២៣២នាក់ (ឆ្នាំ២០១៨ ចំនួន៥២១៨៣នាក់) ។
ប្រភពបានបន្តថា ក្នុងចំណោមបេក្ខជនទទួលបាននិទ្ទេសA ចំនួន៤៤៣នាក់ មកពីរាជធានីភ្នំពេញ១៤១នាក់ ខេត្តសៀមរាប៣៨នាក់ បាត់ដំបង៣២នាក់ តាកែវ២៩នាក់ កំពង់ចាម២៧ នាក់ ព្រៃវែង២៧នាក់ បន្ទាយមានជ័យ២៥នាក់ កណ្តាល២៣នាក់ កំពត២៣នាក់ ត្បូងឃ្មុំ១៥ នាក់ កំពង់ធំ១៨នាក់ ព្រះសីហនុ១៣នាក់ ស្វាយរៀង៨នាក់ ពោធិ៍សាត់៧នាក់ កំពង់ឆ្នាំង ៦ នាក់ កំពង់ស្ពឺ ៦នាក់ ក្រចេះ៤នាក់ រតនគិរី២នាក់ កោះកុង១នាក់ មណ្ឌលគិរី ១នាក់ និងឧត្តរមានជ័យម្នាក់ ។
សម័យប្រឡងសញ្ញាបត្រទុតិយភូមិថ្ងៃទី១៩-២០សីហាឆ្នាំ២០១៩ មានមណ្ឌល ប្រឡងនៅគ្រប់រាជធានីខេត្ត សរុប២០២មណ្ឌល បន្ទប់ប្រឡង៤៧២៤បន្ទប់ និងបេក្ខជនចុះឈ្មោះក្នុងបញ្ជីសរុប ១១៧ ០៤៣នាក់ ដែលក្នុងនោះ៩០៩៦៦នាក់ ជាបេក្ខជន ចំណេះទូទៅ១៨៤៥៧នាក់ជាបេក្ខជនស្វ័យរិន ៤ ៥៦៤នាក់ ជាបេក្ខជនបំពេញវិជ្ជា និង៣០៥៦នាក់ ជាបេក្ខជនស្វ័យរិនបំពេញវិជ្ជា ។ បេក្ខជនអវត្តមានមានចំនួន ១៨៣៥នាក់ ។ ដំណើរការនៃការប្រឡងទាំងដំណើរការសំណេរកំណែ និងស្រង់បូកពិន្ទដោយកុំព្យូទ័របានប្រព្រឹត្តទៅប្រកបដោយជោគជ័យ ពុំមានឧបទ្ទវ ហេតុអ្វីគួរឱ្យកត់សម្គាល់ឡើយ ។
ក្រសួងបានឲ្យដឹងថា ការប្រកាសលទ្ធផលប្រព្រឹត្តទៅនៅរសៀលថ្ងៃទី០៩ ខែកញ្ញានេះ សម្រាប់រាជធានីភ្នំពេញ និងខេត្តកណ្តាល និងនៅព្រឹកថ្ងៃទី១០ ខែកញ្ញា ឆ្នាំ២០១៩ សម្រាប់ខេត្តដទៃទៀត ៕ កែសម្រួលដោយ ៖សុឃាក់
ចែករំលែកព័តមាននេះ