ខេត្តព្រះសីហនុ ៖ សេចក្តីរាយការណ៍ឱ្យដឹងថា គិតដល់ល្ងាចថ្ងៃទី០៨ កញ្ញា សមត្ថកិច្ចនៅកំពុងធ្វើការ
សាកសួរលើជនជាតិចិននៅឡើយ ។ យោងតាមប្រភពពីសមត្ថកិច្ចបានបង្ហើបបឋមថា តាមការសាកសួរជំហានដំបូង អាចសន្និដ្ឋានថា អាចជាប់ពាក់ព័ន្ធករណីហិង្សា និងបង្ខាំងមនុស្សខុសច្បាប់ ដែលប្រព្រឹត្តិ លើជនជាតិចិនគ្នាឯង ។
គួរបញ្ជាក់ថា ជនជាតិចិន១៦នាក់ ត្រូវបានចាប់ខ្លួនដោយកម្លាំងនគរបាលការិយាល័យព្រហ្មទណ្ឌកម្រិតស្រាលកាលពីវេលាម៉ោងជាង២១ថ្ងៃទី៧ កញ្ញា ហើយបានបញ្ជូនខ្លួនទៅកាន់ ស្នងការដ្ឋាននគរបាលខេត្ត ដើម្បីសាកសួរព័ត៌មាន បន្ទាប់ពីសមត្ថកិច្ចធ្វើការឆែកឆេរ នៅក្នុងកាស៊ីណូយីហោមេចេស្ទីដែលមានទីតាំងស្ថិតនៅភូមិ៣ សង្កាត់លេខ៣ ក្រុងព្រះសីហនុ ជាកាស៊ីណូអត់ច្បាប់ក្រោយពេលជាតិចិន២ក្រុមបានប្រទូស្តរ៉ាយគ្នានៅខាងមុខកាស៊ីណូ ។
ជុំវិញការឃាត់ខ្លួនជនជាតិចិននេះ ត្រូវបាននគរបាលបង្ហើបឲ្យដឹងថា បន្ទាប់ពីមានការបញ្ជាផ្ទាល់ពីលោកឧត្តមសេនីយ៍ទោ ជូន ណារិន្ទ ស្នងការនគរបាលខេត្តព្រះសីហនុ ក្រោយពីមានសេចក្កីរាយការណ៍ថាឃើញជនជាតិចិនពីរក្រុមបានវាយតប់គ្នាយ៉ាងសាហាវនិងយ៉ាងអនាធិបតេយ្យធ្វើដូចស្រុកអត់ច្បាប់នៅមុខកាស៊ីណូរួចមក ។
ក្រោយពេលដែលកម្លាំងជំនាញនៃស្នងការដ្ឋាននគរបាលខេត្តបានធ្វើអន្តរាគមន៍ចូលទៅឆែកឆេរខាងក្នុងកាស៊ីណូមេចេស្ទី ក៏បានឃើញជនជាតិចិន៤នាក់ ជាបុរសទាំងអស់ ត្រូវបានក្រុមជនសង្ស័យជាតិចិនដូចគ្នាវាយខ្នោះដៃទៅក្រោយ និងបង្ខាំង ឃុំទុកនៅក្នុងបន្ទប់ការិយាល័យនៃកាស៊ីណូមេចេស្ទី ដោយមិនដឹងពីមូលហេតុ និងមានជនសង្ស័យ៣នាក់ ដែលយាមមើលជនរងគ្រោះក្នុងបន្ទប់នោះក៏ត្រូវបានឃាត់ខ្លួនដែរ ។ រីឯជនរងគ្រោះជាជនជាតិចិន៩នាក់ផ្សេងទៀត ក្នុងនោះស្រី្ត៦នាក់ ត្រូវក្រុមជនសង្ស័យបង្ខាំងទុកនៅក្នុងបរិវេណកាស៊ីណូ មិនឱ្យចេញក្រៅ ។
បន្ទាប់ពីធ្វើការឆែកឆេរ បានរកឃើញដំបងឆក់ចំនួន២គ្រឿង កាំប៉ិត២ដើម កាំភ្លើងខ្លី១ដើម ម៉ាក SIGSAUER ពណ៌ខ្មៅ បង់កាំភ្លើង១ គ្រាប់មាន២៥គ្រាប់ ប្រអប់ដាក់កាំភ្លើងខ្លីចំនួន៣ប្រអប់ ក្នុងនោះមានបង់កាំភ្លើងចំនួន២ តែមិនមានកាំភ្លើងទេ ។ បន្ទាប់ពីរំដោះបានជនរងគ្រោះ និងធ្វើការឆែកឆេររួចមក កម្លាំងសមត្ថកិច្ចយើងឃាត់ខ្លួនបានជនសង្ស័យជាជនជាតិចិនសរុបចំនួន១៦នាក់ ។
គួរឱ្យភ្ញាក់ផ្អើលផងដែរ ស្រាប់តែពេលនេះដឹងថាទីតាំងកាស៊ីណូមេចេស្ទីនេះ គឺមិនមានច្បាប់អនុញ្ញាតឱ្យបើកអាជីវកម្មទេ ហើយករណីនេះការិយាល័យនគរបាលព្រហ្មទណ្ឌកម្រិតស្រាលកំពុងបន្តនីតិវិធី ៕ (សម្រួលដោយ៖ ស្រីណា)
ចែករំលែកព័តមាននេះ