ខេត្តស្ទឹងត្រែង ៖ ស្ថានភាពកម្ពស់ទឹកទន្លេមេគង្គ នាព្រឹកថ្ងៃទី៧ កញ្ញានេះបានសណ្តកចុះបន្តិចគ្រាអាកាសធាតុអំណោយផលស្រឡះរយៈពេល២ថ្ងៃ កាលពីម្សិលមិញ និងថ្ងៃនេះផ្ទាល់ ។
យោងតាមរបាយការណ៍កម្ពស់ទឹករបស់លោក ប៉ាង ប៉េង ប្រធានមន្ទីរធនធានទឹក និងឧតុនិយមខេត្តស្ទឹងត្រែងបានបញ្ជាក់ នៅព្រឹកថ្ងៃទី៧ កញ្ញានេះថា កម្ពស់ទឹកទន្លេមេគង្គ(ប្រកាសអាសន្ន១០.៧០ម៉ែត្រ ) ព្រឹកនេះ១១,៩៦ម៉ែត្រ ល្ងាចម្សិល១២,០៤ម៉ែត្រ ។ ទឹកទន្លេសេសាន (ប្រកាស ១០.៥០ម៉ែត្រ) ព្រឹកនេះ៩,៥៧ម៉ែត្រ ល្ងាចម្សិល ១០,០១ម៉ែត្រ ដោយឡែកទឹកទន្លេសេកុង (ប្រកាស១១.៥០ម៉ែត្រ) ព្រឹកនេះ១២,៨៦ម៉ែត្រ ល្ងាចម្សិល១២,៦០ម៉ែត្រ គឺឡើង០,២៦ម៉ែត្រ ។
បើទោះបីស្ថានភាពទឹកសណ្តកចុះបន្តិចក៏ពិតមែន តែប្រជាពលរដ្ឋរាប់ពាន់គ្រួសារត្រូវជម្លៀសពីលំនៅស្ថានជាបណ្តោះអាសន្ន ដើម្បីស្វែងទៅកាន់ទីទួលសុវត្ថិភាព ។
ជាក់ស្តែងប្រជាពលរដ្ឋចំនួន៤០០គ្រួសារ ស្ថិតនៅឃុំអូរស្វាយស្រុកបូរី អូរស្វាយសែនជ័យមានចំនួនបួនភូមិ បានប្រមូលផ្តុំគ្នាយ៉ាងពពាក់ពពូនបោះតង់ជាជម្រកនៅក្នុងបរិវេណសាលាអនុវិទ្យាល័យ អូរស្វាយរង់ចាំទឹកសម្រកនឹងវិលត្រឡប់ទៅលំនៅស្ថានរៀងៗខ្លួន វិញ ។
ទន្ទឹមនឹងការភៀសខ្លួនរបស់ប្រជាពលរដ្ឋខាងលើ នាព្រឹកថ្ងៃទី៧ កញ្ញានេះដែរអាជ្ញាធរខេត្តដឹកនាំដោយអ្នកតំណាងរាស្ត្រមណ្ឌលខេត្តស្ទឹងត្រែងលោក ម៉ុម សារឿន អភិបាលនៃគណៈអភិបាលខេត្តអមដំណើរដោយមន្ត្រីរាជការកងកម្លាំងប្រដាប់អាវុធទាំងបីប្រភេទ នាំយកអំណោយគ្រឿងឧបភោគ បរិភោគ និងអង្កររបស់សម្តេចតេ ជោ ហ៊ុន សែន នាយករដ្ឋមន្ត្រី និងសម្តេចគតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ចែកជូនប្រជាពលរដ្ឋនៅទីទួលសុវត្ថិភាពនោះចំនួន៤០០គ្រួសារនេះដែរ ៕ កែសម្រួលដោយ ៖ សុឃាក់
ចែករំលែកព័តមាននេះ