ខេត្តកំពង់ចាម ៖ បើតាមសេចក្តីរាយការណ៍បឋមបានឱ្យដឹងថា ក្រោយពីទឹកទន្លេមេគង្គហូរមកយ៉ាងខ្លាំងក្រោមស្ពានបេឡេនៅភូមិទួលរកា បណ្តាលឱ្យបាក់សសរបេតុងស្ពានអស់១ កាលពីល្ងាចថ្ងៃទី៦ ខែកញ្ញា ឆ្នាំ២០១៩ ហើយពេលនេះរថយន្តដឹកដែកបេឡេបានមកដល់ហើយនៅព្រឹកថ្ងៃទី០៨ កញ្ញានេះ ដើម្បីតម្លើងលើស្ពានបេឡេមួយកន្លែងដែលមានទទឹង៤,២០ម៉ែត្រ និងបណ្តោយ៧៥ម៉ែត្រ ស្ថិតនៅភូមិទួលរកា ឃុំពាមកោះស្នា ស្រុកស្ទឹងត្រង់ ឲ្យកាន់តែរឹងមាំងាយស្រួលធ្វើដំណើរទៅវិញទៅមក។
បើតាមលោកសុខ ស្រ៊ុន ប្រធានមន្ទីរសាធារណការ និងដឹកជញ្ជូនខេត្ត ប្រាប់ឲ្យដឹងថា ក្រោយពីអាជ្ញាធរមូលដ្ឋានបានជូនដំណឹងថា ស្ពានបេឡេនេះត្រូវរងគ្រោះដោយទឹកហូរផ្តាច់អស់សសរមួយ នៅព្រឹកថ្ងៃទី០៧ ខែកញ្ញានោះ រូបលោក លោកអ៊ុន ចាន់ដា អភិបាលខេត្ត លោកគន់ គីម ទេសរដ្ឋមន្ត្រីអនុប្រធានទី១ គ្រោះមហន្តរាយ និងមន្ត្រីពាក់ព័ន្ធបានចុះទៅពិនិត្យ និងរកធវិធីដោះស្រាយបន្ទាន់។
លោកប្រធានមន្ទីរសាធារណការខេត្តបន្តថា តាមគោលការណ៍ គឺអនុញ្ញាតឲ្យអ្នកថ្មើរជើង និងម៉ូតូបើកឆ្លងកាត់ទៅវិញទៅមកបាន តែចំពោះរថយន្តគ្រប់ប្រភេទត្រូវបិទមិនឲ្យឆ្លងនោះទេ ព្រោះខ្លាចបាក់ស្ពានដែលត្រូវបានកសាងដោយកងកម្លាំងវិស្វកម្មក្រសួងការពារជាតិក្នុងអំឡុងឆ្នាំ១៩៩៣ ។ ចំពោះសម្ភារដែកស្ពានបេឡេ ត្រូវបានដឹកមកពីរាជធានីភ្នំពេញមកដល់នៅយប់ថ្ងៃទី០៧ កញ្ញា ឬថ្ងៃទី០៨កញ្ញានេះ ដោយបំពាក់ពីលើដែកស្ពានចាស់ដើម្បីឲ្យកាន់តែរឹងមាំ ក្នុងការប្រើប្រាស់នៅក្នុងរដូវវស្សាសិន ទំរាំដល់រដូវប្រាំង និងធ្វើការជួសជុលកសាងគ្រឹះសសរស្ពានបេតុងដែលបាក់នោះឡើងវិញ ។
លោកវរសេនីយ៍ឯក ប៉ាក ជាតិ អធិការនគរបាលស្រុកស្ទឹងត្រង់ ប្រាប់ថា ទឹកទន្លេមេគង្គបានហូរមកខ្លាំងតាមក្រោមស្ពានបេឡេ នៅភូមិទួលរកានេះ ហើយនៅល្ងាចថ្ងៃទី៦ កញ្ញា ត្រូវបានប្រជាពលរដ្ឋនៅមូលដ្ឋានបានឃើញទឹកហូរមកដាច់សសរលំបាត់ នៅសល់តេសសរបេតុង១ និងតួដែកស្ពាន មិនបានបាក់នោះទេ ។ ហើយរូបលោកក៏បានឲ្យកម្លាំងនគរបាលចរាចរណ៍ប្រញាប់យកស្លាកសញ្ញាទៅដាក់តាមបញ្ជារបស់លោកស្នងការនគរបាលខេត្ត ដើម្បីការពារមិនឲ្យរថយន្តតូច-ធំបើកឆ្លងកាត់ ហើយសមត្ថកិច្ចនៅប្រចាំការជាប់រាល់ថ្ងៃ ដើម្បីធានាដល់សុវត្ថិភាពមិនឲ្យមានគ្រោះថ្នាក់កើតឡើយ ។ (កែសម្រួលដោយ ៖ បុប្ផា)
ចែករំលែកព័តមាននេះ