រាជធានីភ្នំពេញ ៖ ក្រសួងអប់រំយុវជន និងកីឡាបានបញ្ចប់ការស្រង់បូកពិន្ទុដោយកុំព្យូរទ័រ និងការផ្ទៀតផ្តាត់ពិន្ទុការប្រឡងសញ្ញាបត្រទុតិយភូមិ (បាក់ឌុប) ១០០%ហើយ ហើយគ្រោងនឹងប្រកាសលទ្ធផល គឺនៅថ្ងៃទី៩ ខែកញ្ញានេះ ។
លោក បណ្ឌិតរស់ សុវាចា អ្នកនាំពាក្យក្រសួងអប់រំយុវជន និងកីឡាបានឲ្យកោះសន្តិ ភាពដឹងនៅថ្ងៃទី៨ ខែកញ្ញាថា គិតត្រឹមថ្ងៃទី០៧ ខែកញ្ញានេះដំណើរការស្រង់បូកពិន្ទុដោយកុំព្យូទ័រ និងការពិនិត្យផ្ទៀងផ្ទាត់ពិន្ទុសម្រាប់ការប្រឡងសញ្ញាបត្រមធ្យមសិក្សាទុតិយភូមិសម្រេចបាន១០០ភាគរយហើយ ។ លោកបន្តថា ក្រសួងអប់រំ យុវជន និងកីឡានឹងប្រកាសលទ្ធផលមុនការគ្រោងទុក គឺលទ្ធផលនឹងមានប្រកាសជូន នៅថ្ងៃទី០៩ ខែកញ្ញានេះ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្ដាល និងនៅថ្ងៃទី១០ ខែកញ្ញា សម្រាប់បណ្ដាខេត្តផ្សេងៗ ។
លោកបណ្ឌិតក៏បានឲ្យដឹងទៀតថា លទ្ធផលក៏នឹងមានផ្សាយជូនតាមបណ្តាញសង្គមហ្វេសប៊ុកផ្លូវការរបស់ក្រសួងអប់រំ យុវជន និងកីឡាផងដែរ ។ ជាមួយគ្នានោះដែរ ក្រសួងអប់រំ យុវជន និងកីឡាសូមគោរពថ្លែងអំណរគុណចំពោះកិច្ចសហការវិជ្ជមានពីគ្រប់ភាគីពាក់ព័ន្ធដែលបន្តគោរពគោលការណ៍ច្បាប់យុត្តិធម៌ តម្លាភាព និងលទ្ធផលអាចទទួលយកបានក៏ដូចជា ការចូលរួមគោរពបទបញ្ញត្តិមានជាធរមាននានា ។
ទាក់ទង និងបេក្ខជនប្រឡងជាប់ប៉ុន្មានភាគរយ និងបេក្ខជនទទួលបាននិទេសល្អប៉ុន្មាននាក់អ្នកនាំពាក្យក្រសួងអប់រំមិនទាន់បញ្ជាក់ឲ្យដឹងនោះទេ ។ លោកគ្រាន់តែលើកឡើងថា លទ្ធផលពេញលេងនឹងប្រកាសនៅពេលខាងមុខនេះ ។
សូមជម្រាបថា ការអត្រាកំណែរវិញ្ញាសាប្រឡងសញ្ញាបត្របាក់ឌុបបានបញ្ចប់ កាលពីថ្ងៃទី២៨ ខែសីហាកន្លងមក ។ បេក្ខជនប្រឡងឆ្នាំ២០១៩ មានចំនួន១១៧ ០៤៣នាក់ ស្រី៦០៤២៧ នាក់ មាន២០២ មណ្ឌល ចែកជាថ្នាក់វិទ្យាសាស្ត្រមានបេក្ខជនចំនួន៤៤៦៩០នាក់ មាន៧៥ មណ្ឌល និងថ្នាក់វិទ្យាសាស្ត្រសង្គមមានបេក្ខជនចំនួន៧២៣៥៣នាក់ មាន១២៧មណ្ឌល ។ បេក្ខជនអវត្តមានពេលប្រឡងមាន១៨១៨ នាក់ ស្រី៦៩៦នាក់ ជាភាគរយ ១.៥៥%៕ កែសម្រួលដោយ ៖ សុឃាក់
ចែករំលែកព័តមាននេះ