ខេត្តបាត់ដំបង ៖ កិច្ចប្រតិបត្តិការបង្ក្រាបបទល្មើសព្រៃឈើ និងការស្វែរកវត្ថុតាងនានា ពាក់ព័ន្ធនឹងបទល្មើសនៅស្រុកសំឡូត ដែលធ្វើឡើងដោយកម្លាំងកងរាជអាវុធហត្ថខេត្ត ត្រូវបានបញ្ជប់ទាំងស្រុង ។ នេះ
បើតាមព័ត៌មានពីមន្ត្រីកងរាជអាវុធហត្ថ ហើយបើគិតត្រិមថ្ងៃទី០៦ កញ្ញា នេះ វត្ថុតាងដែលបានរកឃើញ
គឺ«រថយន្តបាកុង»ចំនួន១០គ្រឿង ដែលពេលនេះ សមត្ថកិច្ចកំពុងអូសប្រមូលយយកមកផ្ដុំគ្នារក្សាទុកមួយកន្លែង ដើម្បីត្រៀមដុតកម្ទេចចោល។ ប៉ុន្តែអ្វីដែលមជ្ឍដ្ឋានទូទៅ កំពុងតាមដានស្ទើរមិនហ៊ានព្រិចភ្នែកនិងកំពុងងឿងឆ្ងល់នោះ តើជនណា ឬក្រុមហ៊ុនណាជាម្ចាស់វត្ថុតាង«រថយន្តបាកុង»ទាំង១០គ្រឿងនេះ ?
ទំនងបែបគ្មានចម្លើយទេ..! ពាក់ព័ន្ធនឹងចម្ងល់របស់មហាជននេះ ។ ចាប់តាំងពីថ្ងៃទី០១ កញ្ញា ដែលជា
ថ្ងៃដំបូង នៃកកិច្ចប្រតិបត្តិការនេះរហូតដល់រសៀលថ្ងៃទី០៦ កញ្ញា កោះសន្តិភាព នៅតែមិនអាចទំនាក់ទំនងសុំការផ្ដល់ព័ត៏មានបន្ថែម ស្ដីពីលទ្ធផលជាក់លាក់ នៃកិច្ចប្រតិបត្តិការ ពីលោកឧត្តមសេនីយ៏ត្រី មាស សុវណ្ណ មេបញ្ជាការកងរាជអាវុធហត្ថខេត្ត បានឡើយ ដោយទូរស័ព្ទរបស់លោកជាប់រវល់គ្មានម៉ោង
ទំនេរ ។
ប៉ុន្តែមន្ត្រីតូចតាចបានប្រាប់ថា កិច្ចប្រតិបត្តិការនោះ បានបញ្ចប់ជាស្ថាពរហើយ ។ មន្ត្រីដែលហ៊ាននិយាយ តែមិនហ៊ានប្រាប់ឈ្មោះបានឲ្យដឹងថា កិច្ចប្រតិបត្តិការនេះ ត្រូវបានបញ្ចប់តាំងពី២ថ្ងៃមុននេះ ដោយលទ្ធ ផល គេបានរកឃើញវត្ថុតាង «រថយន្តបាកុង ឬរថយន្តរ៉េវ»ចំនួន១០គ្រឿង និងគំនរឈើដែលគេបោះមួយចំនួនទៀត រួមទាំងសម្ភារ ពាក់ព័ន្ធកំប៉ិកកំប៉ុកមួយចំនួនផង ។ ប្រភពដដែលបញ្ជាក់ថា ពេលនេះកម្លាំងកំពុងនាំគ្នាអូសរថយន្តបាកុងទាំងនោះ ប្រមូលយកមករក្សាទុកមួយកន្លែង ដើម្បីរង់ចាំបទបញ្ជាថ្នាក់លើចុះដុតកម្ទេចចោល។
មន្ត្រីដដែលនេះបានបន្ថែមថា រថយន្តទាំងនោះត្រូវបានរកឃើញនៅទីតាំងផ្សេងៗគ្នា ដែលគេលាក់ទុក
នៅក្នុងព្រៃជ្រៅ។ ប៉ុន្តែរថយន្តទាំងនោះ សុទ្ធតែរកឃើញនៅក្នុងទឹកដី ដែលគ្រប់គ្រងដោយក្រុមហ៊ុន
«រដ្ឋសម្បត្តិ»។ ប៉ុន្តែមន្ត្រីរូបនេះ មិនហ៊ានបញ្ជាក់ប្រាប់ថា តើជនណា ឬក្រុមហ៊ុនណា ជាម្ចាស់រថយន្តបាកុងទាំង១០គ្រឿង ដែលសមត្ថកិច្ចរកឃើញលាក់ទុកនៅក្នុងព្រៃនេះទេ នៅពេលរុញសំនួរដ៏រសើបនេះ ។
ជុំវិញការរុករកវត្ថុតាងបទល្មើសព្រៃឈើ នៅក្នុងស្រុកសំឡូតនេះ បើតាមព័ត៌មាននានាបានឲ្យដឹងថា កិច្ចប្រតិបត្តិការនេះ មានតែកម្លាំងកងរាជអាវុធហត្ថមួយអង្គភាពប៉ុណ្ណោះ ។ គ្មានមន្ត្រីក្នុងស្ថាប័នពាក់ព័ន្ធណាមួយចូលរួមទេ សូម្បីតែស្ថាប័នអយ្យការក៏គ្មានវត្តមានដែរ ខណៈមន្ត្រីព្រៃឈើ មន្ត្រីបរិស្ថានសម្ងំស្ងៀមឈឹង បានត្រិមលួចអើតមើល។ ប៉ុន្តែយ៉ាងណា អ្វីដែលធ្វើឲ្យមហាជនកំពុងតាមដានស្ទើរមិនហ៊ានព្រិចភ្នែកនោះគឺថា តើជនណា ឬ ក្រុមហ៊ុនណា ជាម្ចាស់រថយន្តបាកុងទាំង១០គ្រឿងនេះ ?
រីឯវត្ថុតាងផ្សេងៗទៀត ក្រៅពីរថយន្ត១០គ្រឿងនេះ ក៏មិនត្រូវបានគេទម្លាយឲ្យអ្នកសារព័ត៌មានឬស្ថាប័នដទៃៗទៀតដឹងដែរ។ ពោល បើពិនិត្យលើកិច្ចប្រតិបត្តិការនេះ គឺគេធ្វើឡើងហាក់មិនទូលំទូលាយទេ។ ថ្នាក់ ដឹកនាំកិច្ចប្រតិបត្តិការនេះខ្លះ បានរុញឲ្យសួរនាំបន្តគ្នា ឬ រុញឲ្យសួរថ្នាក់លើ ខណៈប្រព័ន្ធទូរស័ព្ទ លោកមាស សុវណ្ណ មេបញ្ជាការកងរាជអាវុធហត្ថ នៃខេត្តនេះ ជាប់រវល់គ្មាមម៉ោងទំនេរ ។
បើទោះជាគ្មានមន្ត្រី ឬមេបញ្ជាការកងរាជអាវុធហត្ថខេត្ត ដែលទទូលភារកិច្ចចុះបង្ក្រាបបទល្មើសនេះ មិនបានបំភ្លឺ ជុំវិញការរកឃើញវត្ថុតាងបទល្មើសព្រៃឈើនេះក្ដី តែមហាជជន និងមន្ត្រីនៅក្នុងស្ថាប័នរដ្ឋនានា ភាគច្រើនសុទ្ធតែបានដាក់ការសង្ស័យថា ក្រុមហ៊ុន «រដ្ឋសម្បត្តិ»អាចជាម្ចាស់រថយន្តបាកុងទាំង១០គ្រឿងនោះ ព្រោះមិនអាចមានរថយន្តមកពីកន្លែងផ្សេង យកមកលាក់នៅតំបន់នោះទេ ។ ម្យ៉ាងទៀតគ្រប់រថយន្តទាំងអស់ សុទ្ធតែបានរកឃើញនៅក្នុងទឹកដី ដែលក្រុមហ៊ុននេះគ្រប់គ្រង។
បើតាមសាក្សីម្នាក់ដែលធ្លាប់ចេញចូលទីតាំងក្រុមហ៊ុន«រដ្ឋសម្បត្តិ» បាននិយាយថា គាត់ធ្លាប់ឃើញក្រុមហ៊ុននេះ មានរថយន្តដឹកជញ្ជូនឈើច្រើនណាស់ មិនមែនមានតែត្រិម១០គ្រឿង ដែលរកឃើញនេះទេ តែទំនងត្រូវក្រុមហ៊ុនជន្លៀសចេញមុនពេលថ្នាក់លើរៀបផែនការបង្ក្រាប ។ ស្របគ្នានឹងការបំភ្លឺនេះដែរ ប្រភពពីមន្ត្រីស្រុកសំឡូត បានប្រាប់ថា កាលពីអំឡុងខែកក្កដា កន្លងទៅ ក្រុមហ៊ុននេះ បានព្យាយាមជន្លៀសឈើហ៊ុប (ឈើមិនទាន់អារ) រាប់រយដុំ និង ឈើអាររួច រាប់សិបម៉ែត្រគូប ចេញពីទីតាំងក្រុមហ៊ុន និង ចេញពីក្នុងព្រៃ ជាមួយនឹងរថយន្តដឹកឈើ និង ម៉ាស៊ីរ៉ៃជាច្រើនគ្រឿងផង។ ភាគច្រើនសកម្មភាពនេះធ្វើឡើងនៅពេលយប់ ហើយបើពិនិត្យលើសកម្មភាពជន្លៀសវត្ថុតាងចេញរបស់ក្រុមហ៊ុននេះ ទំនងអាចមានអ្នកផ្ដល់ដំណឹងដល់ក្រុមហ៊ុននេះជាមុន អំពីផែនការចុះបង្ក្រាប។
មន្ត្រីរូបនេះ បានបង្ហើបឲ្យដឹងដែរថា បទល្មើសព្រៃឈើដែលប្រព្រិត្តដោយក្រុមហ៊ុន«រដ្ឋសម្បត្តិ» កន្លងមក ទំនងអាចជាប់ពាក់ព័ន្ធទៅនឹងមន្ត្រីក្នុងស្ថាប័នរដ្ឋដែលមានស្នាក់ការប្រចាំតំបន់នោះ។ ដូចជាមន្ត្រីព្រៃឈើ មន្ត្រីបរិស្ថាន និងសមត្ថកិច្ចនាន។ល។ ពីព្រោះសកម្មភាពប្រព្រិត្តបទល្មើសព្រៃឈើរបស់ក្រុមហ៊ុននេះ យ៉ាងកក្រើកពាសពេញព្រៃតំបន់នោះរាប់សិបឆ្នាំកន្លងមកហើយ គេមិនដែលឃើញសមត្ថកិច្ចឬស្ថាប័នពាក់ព័ន្ធណាឬអាជ្ញាធរស្រុកនេះ ចេញមុខបង្ក្រាបម្ដងណាឡើយ។ លុះមកដល់ពេលនេះទើបម្នាក់ៗធ្វើភ្នែកសក្បុះ ដេកគងថ្ងាស់ក្រែងខ្លួនមានជាប់ពាក់ព័ន្ធ។
ប៉ុន្តែយ៉ាងណាក៏ដោយ ជុំវិញកិច្ចប្រតិបត្តិការបង្ក្រាបបទល្មើសព្រៃឈើ ដែលធ្វើឡើងតែកម្លាំងនៅក្នុងអង្គភាពកងរាជអាវុធហត្ថខេត្តខាងលើនេះ គេរងចាំមើលថា តើក្រៅពីរថយន្តបាកុងចំនួន១០គ្រឿងដែលត្រូវបានរឹបអូស តើអាចនៅមានវត្ថុតាងអ្វីផ្សេងទៀត ដែលត្រូវបានរកឃើញ ? ហើយរថយន្តបាកុងទាំង១០គ្រឿងនេះ តើជារបស់ក្រុមហ៊ុន រដ្ឋសម្បត្តិ ឬ គ្មានម្ចាស់ទទូលខុសត្រូវ ? បើតាមព័ត៏មាននានា ដែលបានខ្សិបប្រាប់ កោះសន្តិភាព ជាហូរហែកន្លងទៅនេះថា មានមន្ត្រីអត់បានការខ្លះដែលធ្លាប់ទទូលផលប្រយោជន៏ពីក្រុមហ៊ុនរដ្ឋសម្បត្តិ ពេលនេះបាននិងកំពុងព្យាយាមជួយបង្វែវត្ថុតាងនេះឲ្យរួចផុតពីការទទូលខុសត្រូវរបស់ក្រុមហ៊ុនទៀតផង។
ពោលគឺមន្ត្រីខិលខូចទាំងនោះ កំពុងព្យាយាមជួយក្រុមហ៊ុន ឲ្យរួចពីការប្រឈមនឹងផ្លូវច្បាប់។ ប៉ុន្តែយ៉ាងណា នៅពេលក្រុមគណកម្មការបង្ក្រាបបទល្មើស ចុះដុតកំទេចវត្ថុតាង (រថយន្តបាកុង) ចោល ប្រហែលអាចបែកធ្លាយរឿងមិនប្រក្រតីខ្លះៗហើយ ពាក់ព័ន្ធនឹងការដកហូតនិងការរកឃើញវត្ថុតាងបទល្មើស ដែលពាក់ព័ន្ធនឹងក្រុមហ៊ុនរដ្ឋសម្បត្តិ ។ (សម្រួលដោយ៖ ស្រីណា)
ចែករំលែកព័តមាននេះ