រាជធានីភ្នំពេញ ៖ នគរបាលថ្នាក់មូលដ្ឋានបានទទួលបទបញ្ជាដាក់ពង្រាយកម្លាំងនៅគ្រប់វិហារ និងស៊ូរ៉ាវរបស់សាសនិកអ៊ិស្លាមកម្ពុជានៅទូទាំងរាជធានីភ្នំពេញជារៀងរាល់ថ្ងៃសុក្រ ដើម្បីការពារសន្តិសុខជូនពលរដ្ឋខ្មែរអ៊ិស្លាមទៅថ្វាយបង្គំ និងចាំឃ្លាំមើល ខ្លាចមានជនមួយចំនួនជ្រៀតចូល និងប្រមូលផ្តុំមានចេតនាអាក្រក់បង្កអសន្តិសុខដល់សង្គមជាតិ។
ទោះបីជាយ៉ាងណា គេពុំដឹងថា វិហារនិងស៊ូរ៉ាវនានា នៅតាមបណ្តាខេត្តនានាត្រូវបានដាក់ពង្រាយកម្លាំងដែរឬយ៉ាងណានោះទេ។
តាមព័ត៌មានអោយដឹងថា ព្រឹកថ្ងៃទី៥ ខែកញ្ញា ឆ្នាំ២០១៩ នគរបាលនៅគ្រប់អធិការដ្ឋានខណ្ឌទាំង១២ ត្រូវបានទទួលបញ្ជាឱ្យដាក់កម្លាំងការពារនៅគ្រប់វិហារនិងស៊ូរ៉ាវរបស់ពលរដ្ឋខ្មែរអ៊ិស្លាម ដែលនៅក្នុងវិហារនីមួយៗត្រូវដាក់កម្លាំងតិចឬច្រើនទៅតាមវិហារតូចឬធំ។ ការដាក់ពង្រាយកម្លាំងការពារនៅតាមវិហារអ៊ិស្លាមនេះពុំធ្លាប់មាននោះទេ។
តាមព័ត៌មានអោយដឹងទៀតថា គ្រប់កម្លាំងដែលដាក់ការពារនោះពាក់ឯកសណ្ឋានប្រយុទ្ធ ប្រដាប់ដោយកាំភ្លើងAKគឺឈរចាំនៅក្នុងរបងតែម្តង។ កម្លាំងទាំងនោះត្រូវបានទទួលបញ្ជាអោយឃ្លាំមើលគ្រប់សកម្មភាពខ្លាចមានជនជាតិបរទេសមួយចំនួនតូចជួបប្រមូលផ្តុំក្នុងបំណងមិនល្អណាមួយដែលធ្វើអោយប៉ះពាល់ដល់សន្តិសុខជាតិ។
តាមព័ត៌មានអោយដឹងទៀតថា នៅព្រឹកថ្ងៃទី៦ ខែកញ្ញានេះ នៅតាមវិហារអ៊ិស្លាម គីឡូម៉ែត្រលេខ៧-៨និងលេខ៩ ក្នុងខណ្ឌឬស្សីកែវ នៅតាមច្រកទ្វារនៃវិហារនៅវេលាម៉ោងប្រមាណជាង១១ព្រឹក គេឃើញកម្លាំងនគរបាលប្រដាប់ដោយអាវុធក៍បានឈរការពារសន្តិសុខ ខណៈពេលដែលបងប្អូនខ្មែរអ៊ិស្លាមបាននាំគ្នាទៅថ្វាយបង្គំប្រណិប័តន៍តាមសាសនា។
តាមមន្ត្រីនគរបាលបានអោយដឹងថា ដាក់កម្លាំងនោះតាមវិហារនេះគឺធ្វើឡើងតាមបទបញ្ជាដើម្បីការសន្តិសុខជូនសាសនិកអ៊ិស្លាមដែលបានធ្វើដំណើរទៅថ្វាយបង្គំនៅរៀងរាល់ថ្ងៃសុក្រ។
តាមសាសនិកអ៊ិស្លាមដែលបានអញ្ជើញទៅថ្វាយបង្គំក៏បានថ្លែងអំណអរគុណដល់រាជរដ្ឋាភិបាល ដែលបានយកចិត្តទុកដាក់ដល់បងប្អូនខ្មែរអ៊ិស្លាម និងបានដាក់កម្លាំងដើម្បីការពាសន្តិសុខ នៅតាមវិហារនិងស៊ូរ៉ាវដោយខ្លាចជនមួយចំនួនបង្កការអុកឡុក និងរំខានដល់ការថ្វាយបង្គំដែលជាការគោរពប្រណិប័តន៍តាមសាសនាអ៊ិស្លាម។
គួរបញ្ជាក់ថា ពលរដ្ឋខ្មែរអ៊ិស្លាមត្រូវបានរាជរដ្ឋាភិបាលយកចិត្តទុកចិត្តដាក់ជាខ្លាំង ជារៀងរាល់ឆ្នាំ សម្តេចតេជោហ៊ុន សែន និងសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុន សែន តែងតែចូលរួមស្រាយបួសជាមួយបងប្អូនខ្មែរអ៊ិស្លាមជាការផ្សារភ្ជាប់ទំនាក់ទំនងល្អគ្រប់ជាតិសាសន៍ទាំងអស់ ។
មិនតែប៉ុណ្ណោះ កន្លងមក រាជរដ្ឋាភិបាលក៏បានបញ្ជូលគ្រូបង្រៀន ខ្មែរអ៊ិស្លាមចំនួន១៥០០នាក់នៅទូទាំងប្រទេសអោយចូលជាក្របខណ្ឌគ្រូបង្រៀន ក្រសួងអប់រំយុវជននិងកីឡា ។
ជាពិសេសទៀតបានលើកកម្ពស់អោយថ្នាក់ដឹកនាំសាសនិកអ៊ិស្លាមបានចូលបម្រើតាមបណ្តាលក្រសួងនិងស្ថាប័ន, អង្គភាពរដ្ឋនានានៅទួទាំងប្រទេស ដោយមិនរើសអើងនូវជាតិសាសន៍ឡើយ ។ ការលើកកម្ពស់ដល់សាសនិកអ៊ិស្លាមមានប្រវត្តិតាំងពីសម័យសង្គមរាស្ត្រនិយមមកម្ល៉េះ៕ (កែសម្រួលដោយ ៖ ធីតា)
ចែករំលែកព័តមាននេះ