ខេត្តពោធិ៍សាត់៖ ស្ថិតនៅចម្ងាយប្រមាណ៧៣គីឡូម៉ែត្រភាគអាគ្នេយ៍ ពីក្រុងពោធិ៍សាត់ និងចម្ងាយប្រមាណ៤៣គីឡូម៉ែត្រពីផ្សារក្រគរ តំបន់ទេសចរណ៍ទឹកធ្លាក់ច្រកល្អៀង មានលក្ខណៈជាតំបន់ទេសចរណ៍ធម្មជាតិបែបផ្សងព្រេងដ៏គួរឲ្យទាក់ទាញ ។ កាលពីពេល ថ្មីៗកន្លងមក ក្រសួងទេសចរណ៍…
ខេត្តពោធិ៍សាត់៖ ស្ថិតនៅចម្ងាយប្រមាណ៧៣គីឡូម៉ែត្រភាគអាគ្នេយ៍ ពីក្រុងពោធិ៍សាត់ និងចម្ងាយប្រមាណ៤៣គីឡូម៉ែត្រពីផ្សារក្រគរ តំបន់ទេសចរណ៍ទឹកធ្លាក់ច្រកល្អៀង មានលក្ខណៈជាតំបន់ទេសចរណ៍ធម្មជាតិបែបផ្សងព្រេងដ៏គួរឲ្យទាក់ទាញ ។
កាលពីពេល ថ្មីៗកន្លងមក ក្រសួងទេសចរណ៍ និងមន្ទីរទេសចរណ៍ខេត្តពោធិ៍សាត់ រួមជាមួយអង្គការម្លប់បៃតង បានបើកវគ្គបណ្តុះបណ្តាលជំនាញទេសចរណ៍ បដិសណ្ឋារកិច្ច និងជំនាញគ្រប់គ្រងដល់ភ្នាក់ងារសហគមន៍ទេសចរណ៍ទឹកធ្លាក់ច្រកល្អៀង ដើម្បីឲ្យពួកគាត់មានសមត្ថភាពជំនាញពិតប្រាកដ ហើយបន្តផ្តល់សេវាប្រកបដោយគុណភាពជូនដល់ភ្ញៀវទេសចរ ខណៈដែលវគ្គបណ្តុះបណ្តាលនោះគឺជាការរួមចំណែកក្នុងការអភិវឌ្ឍសហគន៍ទេសចរណ៍ទឹកធ្លាក់ច្រកល្អៀង ។
លោកជុក ជំនោរ ប្រធាននាយកដ្ឋានអភិវឌ្ឍទេសចរណ៍នៃក្រសួងទេសចរណ៍បានឲ្យដឹងថា តំបន់សហគមន៍ទេសចរណ៍ច្រកល្អៀង ស្ថិតក្នុងគោលនយោបាយអភិវឌ្ឍផលិតផលទេសចរណ៍ថ្មីរបស់ក្រសួងទេសចរណ៍ដែលបាន និងកំពុងខិតខំស្វែងរកតំបន់ទេសចរណ៍ ថ្មីៗ បន្ថែមទៀតបម្រើសេចក្តីត្រូវការ ឬចំណង់ចំណូលចិត្តរបស់ភ្ញៀវទេសចរជាតិ និងអន្តរជាតិ ។
លោកជុក ជំនោរ បញ្ជាក់ថា «តំបន់សហគមន៍ទេសចរណ៍ច្រកល្អៀងរបស់ខេត្តពោធិ៍សាត់នេះ មានសក្ដានុពលទេសចរណ៍ធំធេងណាស់ ព្រោះតំបន់នេះមាន៧ដំណាក់សម្រាប់ទេសចរកម្សាន្ត គឺដំណាក់ទឹកឈូ ដំណាក់មនោរម្យ ដំណាក់ថ្មសណ្តូក ដំណាក់ទឹកព្រះ ដំណាក់ជ្រៃក្រឹម ដំណាក់កោះសុបិន និងដំណាក់ទឹកធ្លាក់ ។
ពីដំណាក់ទី១ដល់ដំណាក់ទី៧លាតសន្ធឹងក្នុងចម្ងាយជិតមួយពាន់ម៉ែត្រឯណោះ »។
លោកជុក ជំនោរ ឲ្យដឹងថា តំបន់សហគមន៍ទេសចរណ៍ច្រកល្អៀង មានសក្ដានុពលខ្លាំងសម្រាប់អ្នកទេសចរបែបផ្សងព្រេង ព្រោះជាតំបន់ធម្មជាតិ ពិតៗ សំខាន់ទឹកធ្លាក់ដែលហូរចេញមកពីតំបន់ភ្នំក្រវាញដ៏វែងអន្លាយហូរមកតំបន់ច្រកល្អៀងបង្ហាញនូវភាពស្រស់ស្អាតខណៈដែលទឹកធ្លាក់នោះមានទាំងខែប្រាំង និងខែវស្សា ។
គ្រាន់តែការធ្វើដំណើររបស់ភ្ញៀវទេសចរតាមមាត់ទឹកដែលហូរនោះ គឺមានចម្ងាយរហូតដល់ជាង១០គីឡូម៉ែត្រឯណោះ ។
លោកប្រធាននាយកដ្ឋានឲ្យដឹងថា «តំបន់ច្រកល្អៀងនេះយើងកំពុងតែខិតខំកែលម្អ ធ្វើយ៉ាងណាសម្រួលដល់ការធ្វើដំណើរកម្សាន្តរបស់ភ្ញៀវទេសចរផង និងភាពទាក់ទាញ ឬក៏ការជក់ចិត្តពីភ្ញៀវទេសចរផង ព្រោះថានៅតំបន់នោះភ្ញៀវមិនគ្រាន់តែពើបប្រទះនឹងធម្មជាតិដ៏ស្រស់ស្អាតប៉ុណ្ណោះទេ តែអាចនឹងចុះងូតទឹកជ្រោះដ៏ស្រស់ថ្លាប្រកបដោយផាសុកភាពថែមទៀត ។
ចំណែកសហគមន៍នៅតំបន់នោះក៏នឹងផ្តល់ជូននូវសេវាដ៏ល្អឥតខ្ចោះផងដែរ ទោះជាតំបន់កំពុងអភិវឌ្ឍន៍ក៏ដោយចុះ »។
មន្ត្រីជំនាញនៃក្រសួងទេសចរណ៍ឲ្យដឹងដែរថា នៅខេត្តពោធិ៍សាត់មានតំបន់ទេសចរណ៍ប្រកបដោយសក្កានុពលច្រើនណាស់ សំខាន់តំបន់ទេសចរណ៍ធម្មជាតិ ហើយបំពេញតម្រូវការភ្ញៀវទេសចរដែលចូលចិត្តដំណើរទេសចរណ៍បែបផ្សងព្រេង ។
ដូច្នេះហើយទើបមួយរយៈចុងក្រោយនេះ ភ្ញៀវទេសចរប្រភេទនេះក្នុងចំនួនកើនឡើងជាបន្តបន្ទាប់បានធ្វើដំណើរទៅតំបន់ទេសចរណ៍របស់ខេត្តពោធិ៍សាត់ ៕ (កែសម្រួលដោយ ៖ បុប្ផា)
ចែករំលែកព័តមាននេះ