រាជធានីភ្នំពេញ ៖ ក្រសួងការងារនិងបណ្តុះបណ្តាលវិជ្ជាជីវៈ បានសម្រេចអនុញ្ញាតឲ្យកម្មករនិយោជិតឈប់សម្រាកចំនួន៤ថ្ងៃ នៅក្នុងឱកាសបុណ្យភ្ជុំបិណ្ឌខាងមុខនេះ ។
យោងតាមសេចក្តីជូនដំណឹងរបស់ក្រសួងការងារនិងបណ្តុះបណ្តាលវិជ្ជាជីវៈ ចេញផ្សាយនៅថ្ងៃទី៥ ខែ កញ្ញាថា ក្រសួងការងារនិងបណ្តុះបណ្តាលវិជ្ជាជីវៈ សូមជម្រាបដល់ម្ចាស់ឬនាយកសហគ្រាស គ្រឹះស្ថានទាំងអស់ ដែលស្ថិតក្នុងដែនអនុវត្តនៃច្បាប់ស្តីពីការងារបានជ្រាបថា យោងតាមច្បាប់ស្តីពីការងារ និងប្រកាសរបស់ក្រសួងលេខ ៤៧៨ក.ប/ប្រ.ក.អ.ឆ.ក ចុះថ្ងៃទី១៦ ខែតុលា ឆ្នាំ២០១៨ ស្តីពីការឈប់សម្រាកបុណ្យដែលមានប្រាក់ឈ្នួលប្រចាំឆ្នាំ២០១៩ និងដើម្បីបង្កលក្ខណៈងាយស្រួលដល់បងប្អូនកម្ម ករក្នុងឱកាសបុណ្យភ្ជុំបិណ្ឌខាងមុខនេះ ៖
សូមម្ចាស់ឬនាយកសហគ្រាស គ្រឹះស្ថានទាំងអស់អនុវត្តដូចតទៅ ៖
១-អនុញ្ញាតឲ្យកម្មករនិយោជិតទាំងអស់របស់ខ្លួនឈប់សម្រាក ដោយមានប្រាក់ឈ្នួលនាឱកាសបុណ្យភ្ជុំបិណ្ឌខាងមុខនេះ ក្នុងកំឡុងពេល៤ថ្ងៃគឺ ថ្ងៃទី២៧-២៨-២៩ និងថ្ងៃទី៣០ ខែកញ្ញា ឆ្នាំ២០១៩ ជំនួសឱ្យថ្ងៃទី២៩ ដែលត្រូវចំថ្ងៃអាទិត្យ ។
២-ខិតខំរៀបចំបើកប្រាក់ឈ្នួលជូនកម្មករនិយោជិតលើកទី២ ឱ្យបានមុនថ្ងៃបុណ្យភ្ជុំបិណ្ឌ ។ បើពុំមានលទ្ធភាពបើកប្រាក់ឈ្នួលទាន់ពេលទេសូមអនុញ្ញាតឱ្យកម្មករនិយោជិតទទួលប្រាក់បុរេ ប្រទានយ៉ាងតិច៥០%មុនពេលបុណ្យភ្ជុំបិណ្ឌ ។
ក្រសួងការងារនិងបណ្តុះបណ្តាលវិជ្ជាជីវៈ មានសេចក្តីសង្ឃឹមជឿជាក់ថា លោក លោកស្រីដែលជាម្ចាស់ឬនាយកសហគ្រាស គ្រឹះស្ថានទាំងអស់ ប្រាកដជាអនុវត្តតាមសេចក្តីជូនដំណឹងនេះបានល្អត្រឹមត្រូវជាពុំខាន៕
ចែករំលែកព័តមាននេះ