រាជធានីភ្នំពេញ ៖ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃសម្តេច ស ខេង ស្នើទៅកាន់ថ្នាក់ដឹកនាំខេត្តបន្តធ្វើវេទិការសាធារណៈ និងការចុះតាមផ្ទះប្រជាពលរដ្ឋ ដើម្បីជួយដោះស្រាយបញ្ហាជូនប្រជាពលរដ្ឋទាន់ពេលវេលា ។ ក្នុងកិច្ចប្រជុំបូកសរុបលទ្ធផលនៃការចុះធ្វើវេទិ ការសាធារណៈរបស់ក្រុមការងារថ្នាក់ជាតិចុះមូលដ្ឋានខេត្តបាត់ដំបង កាលពីថ្ងៃទី០៥ កញ្ញា សម្តេចបានលើកឡើងថា ការធ្វើវេទិការនេះ គឺត្រូវធ្វើដោយមកអ្នកដែលមិនទាន់បានចូលរួមក្នុងវេទិការលើកមុន ។
យកអ្នកដែលមិនបានចូលរួមទាល់តែអស់បានបើកវេទិការរួមឡើងវិញ។ សម្តេចបញ្ជាក់ថា ៖«យើងធ្វើយ៉ាងនេះនឹងបានជួបប្រជាជនទាំងអស់ គឺមិនមែនជួបតែតំណាងនោះទេ ។ បើយើងជួបតែតំណាង បញ្ហា គឺនៅដដែលៗ ដោះស្រាយបញ្ហាមិនបាននោះទេ ។ អីញ្ចឹងសូមឲ្យធ្វើរបៀបនឹង គឺយើងជួយធ្វើតាមផ្ទះ យើងបានប៉ុន្មានយើងយកប៉ុណ្ណឹង តែច្រើនកាលណាល្អកាលនឹង»។ សម្តេចក៏បានលើកឡើងថា ការជួបគ្នានោះដែរ អ្វីដែលត្រូវដោះស្រាយបានត្រូវធ្វើការផ្សព្វផ្សាយជូនប្រជាពលរដ្ឋតែម្តង ឬដោះស្រាយបញ្ហាដែលប្រជាពលរដ្ឋសុំណូមពរនៅក្នុងកិច្ចប្រជុំ ឬវេទិការនោះ ។
តម្រូវការរបស់ប្រជាពលរដ្ឋមានការរីកចម្រើនតាមការវិវត្តន៍របស់សង្គមជាតិ ដូច្នេះយើងត្រូវធ្វើការដោះស្រាយឲ្យទាន់ពេលវេលា ។ ជាមួយគ្នានោះដែរ សម្តេចក៏បានលើកឡើងថា ត្រូវពង្រឹង និងលើកកម្ពស់សមត្ថភាពរបស់ថ្នាក់ដឹកនាំមន្ត្រីនៅអង្គភាពគ្រប់លំដាប់ថ្នាក់នៅក្រោមឱវាទក្នុងការបំពេញការងារ ពិសេសសមាសភាពជាម្ចាស់លើការផ្តល់សេវានៅក្នុងមូលដ្ឋាន ដោយដោះស្រាយបញ្ហាប្រឈម និងសំណើររបស់ប្រជាពលរដ្ឋ ដើម្បីបញ្ជៀសការពឹងផ្អែកទាំងស្រុងនៅលើថ្នាក់លើ ឬថ្នាក់ជាតិ ៕ កែសម្រួលដោយ ៖ សុឃាក់
ចែករំលែកព័តមាននេះ