រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ស្ត្រីម្នាក់ ខណៈប្ដីអត់នៅជាមួយក៏នាំសហាយចូលដេកក្នុងបន្ទប់ លុះប្ដីតាមទាន់ចាក់សោពីខាងក្រៅបន្ទប់ រួចរត់ទៅប្តឹងសមត្ថកិច្ចឱ្យឃាត់យកមកសួរនាំ បង្ភការភ្ញាក់ផ្អើលកាលពីម៉ោង៧និង៣០នាទីយប់ ថ្ងៃទី៥ ខែកញ្ញា ឆ្នាំ២០១៩ នៅផ្ទះជួល ស្ថិតក្នុងភូមិអង្គ សង្កាត់ចោមចៅ ៣ ខណ្ឌពោធិ៍សែនជ័យ។
សេចក្តីរាយការណ៍បន្តថា បុរសជាប្ដីខាងលើមានឈ្មោះ អន សឿន អាយុ២០ឆ្នាំ មុខរបរកម្មករ ស្នាក់នៅភូមិអង្គ សង្កាត់ចោមចៅ៣ ខណ្ឌពោធិ៍សែនជ័យ ។ ចំណែកស្ដ្រីជាប្រពន្ធឈ្មោះ ទិត សុផាត អាយុ២១ឆ្នាំ មុខរបរជាកម្មកររោងចក្រ ស្នាក់នៅបន្ទប់ជួលកើតហេតុ ខាងលើ រីឯប្រុសជាសហាយឈ្មោះ ស៊ង វ៉ាន់ឆៃ អាយុ២២ឆ្នាំ មុខរបរកម្មកររោងចក្រ ស្នាក់នៅផ្ទះជួល ភូមិអង្គ សង្កាត់ចោមចៅ៣ ខណ្ឌពោធិ៍សែនជ័យ។
តាមប្រភពពីបុរសជាប្តីបានឲ្យដឹងថា គាត់បានស្តីដណ្តឹងប្រពន្ធរៀបការតាមប្រពៃណីតាំងពីខែកុម្ភៈ ឆ្នាំ២០១៩មកម្ល៉េះ ដោយខាងស្រីបង្គាប់ថ្លៃបណ្ណាការចំនួន១៥០០ដុល្លារ ។ ហើយប្តីប្រពន្ធគាត់រស់នៅឆ្ងាយពីគ្នា ដោយគាត់ធ្វើការនៅភ្នំពេញដែរ តែរស់នៅផ្សេងគ្នា លុះយូរៗទើបទៅជួបប្រពន្ធម្តង ហើយមួយរយៈពេលថ្មីៗកន្លងមកនេះ គាត់បានទៅរស់នៅស្រុកកំណើត ហើយឪពុកមារបស់ប្រពន្ធគាត់បានទូរស័ព្ទប្រាប់ថា ប្រពន្ធរបស់គាត់បានប្តូរ បន្ទប់ជួលថ្មី និងឃើញតែកំពុងតែទាក់ទងជាមួយប្រុសថ្មីទៀតផង ។
បុរសជាប្តីប្រាប់បន្តថា លុះនៅថ្ងៃទី៥ កញ្ញានេះ មុនពេលកើតហេតុ រូបគាត់បានមកពីស្រុកកំណើតដើម្បីតាមដានប្រពន្ធក៏ឃើញប្រពន្ធនាំសហាយចូលក្នុងបន្ទប់ជួលនោះពិតប្រាកដមែន រូបគាត់ក៏យកកូនសោទៅចាក់ពីខាងក្រៅបន្ទប់ ហើយបានទៅប្តឹងនគរបាលប៉ុស្តិ៍ចោមចៅ៣ភ្លាមៗផងដែរ ដើម្បីជួយអន្តរាគមន៍ ឃាត់ស្ត្រីជាប្រពន្ធ និងប្រុសស្នេហ៍ទៅប៉ុស្តិ៍ដើម្បីសួរនាំ ។
ក្រោយពេលកើតហេតុ ខណៈពេលសមត្ថកិច្ចឃាត់ខ្លួនស្ត្រីជាប្រពន្ធ និងប្រុសសហាយទៅសួរនាំ ស្ត្រីជាប្រពន្ធបានសារភាពថា ខ្លួនមានទំនាក់ទំនងជាមួយប្រុសស្នេហ៍អស់រយៈពេល១ខែមកហើយ តែមិនទាន់បានស៊ីជំរៅនៅឡើយទេ ។ ចំណែកឯបុរសជាសហាយក៏បានសារភាពដូចនារីជាប្រពន្ធដែរថា រូបគេទើបតែទាក់ទងគ្នាទេ គឺរូបគេតែមកចូលបន្ទប់ជួលនេះបានម្តងតែប៉ុណ្ណោះ។
បន្ទាប់ពីមានការផ្អើលឆោឡោរួចមក បុរសជាប្តីមិនបានប្តឹងប្តល់នោះទេ គ្រាន់តែឱ្យសមត្ថកិច្ចធ្វើការអប់រំស្ត្រីជាប្រពន្ធ និងប្រុសសហាយតែប៉ុណ្ណោះ និងប្រាប់ឱ្យស្ត្រីជាប្រពន្ធទៅស្រុកកំណើត ដើម្បីផ្តិតមេដាយលែងលះគ្នា ។ (កែសម្រួលដោយ ៖ បុប្ផា)
ចែករំលែកព័តមាននេះ