ប្រទេសអ៊ីរ៉ង់ ៖ ប្រធានាធិបតីអ៊ីរ៉ង់លោកហាសាន់រ៉ូហានីប្រកាសកាលពីយប់ថ្ងៃទី៤កញ្ញាថា លោកបានបញ្ជាឲ្យបោះបង់ចោលរាល់ការកម្រិតនៃការស្រាវជ្រាវនិងអភិវឌ្ឍន៍នុយក្លេអ៊ែរ។
ដោយលើកពីដំណាក់កាលទី៣ នៃផែនការកាត់បន្ថយការសន្យានានារបស់អ៊ីរ៉ង់ខាងវិស័យនុយក្លេអ៊ែរ លោករូ៉ហានីថ្លែងតាមទូរទស្សន៍រដ្ឋថា អង្គការថាមពលបរមាណូអ៊ីរ៉ង់ បានទទួលបទបញ្ជាឲ្យចាត់រាល់វិធានការចាំបាច់ ខាងការស្រាវជ្រាវនិងអភិវឌ្ឍន៍នុយក្លេអ៊ែរ និងបោះបង់ចោលរាល់កិច្ចសន្យាក្នុងវិស័យនោះ។
មុននេះបន្តិចអ៊ីរ៉ង់ធ្លាប់បានគំរាមកាត់បន្ថយដោយមិនរង់ចាំ បណ្ដាការសន្យាខាងនុយក្លេអ៊ែរ ចំណែកសហរដ្ឋអាមេរិកបានពង្រឹងទណ្ឌកម្មហើយបដិសេធមិនបន្ធូរការគាបសង្កត់ ដែលបែបនោះកាន់តែធ្វើឲ្យស្មុគស្មាញថែមទៀត ដល់ការធ្វើអាជ្ញាកណ្ដាលរបស់បារាំង ដើម្បីជម្រុញឲ្យមានការចរចាមួយរវាងក្រុងតេហេរ៉ង់និងក្រុងវ៉ាស៊ិនតោន។
ប្រធានាធិបតីអាមេរិកលោកដូណាល់ត្រាំកាលពីឆ្នាំ២០១៨ បានប្រកាសពីការដកខ្លួនរបស់ប្រទេសលោក ពីកិច្ចព្រមព្រៀងនុយក្លេអ៊ែរអ៊ីរ៉ង់ ដែលចុះហត្ថលេខាកាលពី៣ឆ្នាំមុននេះជាមួយអ៊ីរ៉ង់ ដើម្បីរារាំងប្រទេសនោះកុំឲ្យមានអាវុធនុយក្លេអ៊ែរ។ ចាប់តាំងពីពេលនោះមកអាមេរិកបានដាក់ទណ្ឌកម្មកាន់តែខ្លាំងលើក្រុងតេហេរ៉ង់ ដោយហាមឃាត់រាល់ការលក់ប្រេងអ៊ីរ៉ង់។
ជាការសងសឹកវិញអាជ្ញាធរអ៊ីរ៉ង់ ចាប់ផ្ដើមពីខែឧសភាមក ដកការរិតត្បិតមួយចំនួនដែលបានសន្យា សម្រាប់កម្មវិធីនុយក្លេអ៊ែររបស់ខ្លួន ពិសេសចាប់បង្កើនកម្រិតនៃការចម្រាញ់អ៊ុយរ៉ានីញ៉ូមរបស់ខ្លួន។ រួចនាថ្ងៃទី៧កក្កដាអ៊ីរ៉ង់បានទុកពេល៦០ថ្ងៃគឹរហូតដល់ថ្ងៃទី៥កញ្ញា ដល់បណ្ដាអ្នកចុះហត្ថលេខាលើកិច្ចព្រមព្រៀង ឲ្យជួយខ្លួន ក្នុងការពង្វាងបណ្ដាទណ្ឌកម្មអាមេរិក ដែលនាំឲ្យស្ទះដល់សេដ្ឋកិច្ចខ្លួន បើពុំដូច្នេះទេនឹងលុបចោលការសន្យាឯទៀតៗ៕ (កែសម្រួលដោយ ៖ បុប្ផា)
ចែករំលែកព័តមាននេះ