ខេត្តតាកែវ ៖ មន្ត្រីរាជការក៏ដូចជាប្រជាពលរដ្ឋរស់នៅក្នុងក្រុងដូនកែវ ខេត្តតាកែវ មានចិត្តសប្បាយរីករាយយ៉ាងខ្លាំងនៅពេលឃើញសួនច្បារ៤កន្លែង ត្រូវបានរៀបចំកែលំអកាន់តែមានសោភ័ណភាព ដើម្បីឱ្យប្រជាពលរដ្ឋមកកំសាន្ត និងបានហាត់ប្រាណដើម្បីសុខភាព ។ លោកគាំ សុខុម នាយកទីចាត់ការហិរញ្ញវត្ថុសាលាខេត្តបានប្រាប់កោះសន្តិភាពឱ្យដឹងថា ក្រោមគំនិតផ្តួចផ្តើមរបស់លោកស្រី បេន អភិបាលខេត្តតាកែវ យើងបានរៀបចំកែលំអសួនច្បារសាធារណៈក្នុងខេត្តចំនួន៤កន្លែង ឱ្យមានសោភ័ណភាពកាន់តែល្អថែមមួយកំរិតទៀត ដើម្បីឱ្យប្រជាពលរដ្ឋយើងទាំងទីជិតទីឆ្ងាយមកអង្គុយលំហែកាយលេង និងងាយស្រួលហាត់ប្រាណដើម្បីសុខភាពផងដែរ ។
លោកស្រី បេន អភិបាលខេត្តបានមានប្រសាសន៍ថា សួនច្បារសាធារណៈដែលយើងបានរៀបចំកែលំអថ្មីទាំង៤កន្លែងនោះ ១-សួនច្បារមាត់បឹងតាកែវ យើងបានរៀបការ៉ូឡាជាផ្លូវព័ទ្ធជុំវិញ ទំហំ៣.១២២ម៉ែត្រការ៉េ និងកែរូបសំណាកកសិកររែកទឹកត្នោត និងសង់រូបសំណាកនាងសុវណ្ណមច្ឆា ព្រមទាំងដាំដើមត្របែកព្រៃចំនួន៣៨ដើមនៅក្នុងសួនច្បារ ដែលពេលនេះអនុវត្តបាន៩៥%ហើយ ។ ២-កែលំអសួនច្បារ និងស្តូបមិត្តភាពកម្ពុជា-វៀតណាម ពីខាងត្បូងសាលាខេត្តដោយរៀបការ៉ូឡាជុំវិញសួន និងស្តូប និងតភ្លើងតាមបង្គោលភ្លើងនីមួយៗសំរាប់បំភ្លឺ ។ ៣-កែលំអសួនច្បារខាងលិចវិមានឯករាជ្យដោយរៀបការ៉ូឡាព័ទ្ធជុំវិញសួន និងចាក់សាបព័ទ្ធស្រះទឹក ព្រមទាំងសាងសង់រូបសេះស នៅរង្វង់មូលមុខសាកលវិទ្យាល័យអង្គរខេមរាផ្សារចាស់ និង៤-កែលំអសួនច្បារ និងកែលំអរូបសំណាកតាកែវយាយកែវ ខាងលិចផ្សារតាកែវ រៀបចំសួន និងដាំស្មៅ ។
លោកស្រី បេន មានប្រសាសន៍បន្តទៀតថា នៅពេលយើងកែលំអសួនសាធារណៈក្នុងខេត្តរួចរាល់ហើយនោះ បងប្អូនមន្ត្រីរាជការនៅពេលចូលមកដល់ក្នុងខេត្តពិតជាប្លែកភ្នែក និងចង់នៅអង្គុយលេងកំសាន្ត ។ ម៉្យាងទៀតចំណុចសំខាន់គឺឱ្យប្រជាពលរដ្ឋយើងមានកន្លែងល្អសំរាប់ហាត់ប្រាណទាំងពេលល្ងាច និងពេលព្រឹក ព្រោះពេលនេះប្រជាពលរដ្ឋយើងបានមកហាត់ប្រាណកាន់តែច្រើនឡើង ដោយសារពួកគាត់យល់ថា មនុស្សយើងគ្រប់រូបក្រចុះឱ្យតែមានសុខភាពល្អកំលាំងមាំមួន បើមានហើយ ប៉ុន្តែសុខភាពមិនល្អនោះ តើមានន័យអីរស់នៅក្នុងសង្គម ៕
ចែករំលែកព័តមាននេះ