បុគ្គលិកដែលរហ័សរហួនអាចបង្កហានិភ័យដល់អាជីវកម្មរបស់អ្នក
អ្នកស្រី Jan Bruce ដែលជាសហស្ថាបនិក និងនាយកប្រតិបត្តិរបស់ក្រុមហ៊ុន meQuilibrium បានឲ្យដឹងថា ល្បឿន និងហានិភ័យ គឺជាស្ថានការធម្មតាថ្មី…
អ្នកស្រី Jan Bruce ដែលជាសហស្ថាបនិក និងនាយកប្រតិបត្តិរបស់ក្រុមហ៊ុន meQuilibrium បានឲ្យដឹងថា ល្បឿន និងហានិភ័យ គឺជាស្ថានការធម្មតាថ្មី ហើយអ្នកដឹកនាំអាជីវកម្មកាន់តែច្រើនពឹងផ្អែកលើបុគ្គលិកដែលជាអ្នកមិនខ្លាចហានិភ័យ ឬបរាជ័យក្នុងការបង្កើតគំនិតថ្មីៗ ។ ប៉ុន្តែការធ្វើនវានុវត្តផ្លាស់ប្តូរ និងខិតខំឡើងវិញម្តងហើយម្តងទៀតក៏អាចបង្កផលប៉ះពាល់ដែរដល់អាជីវកម្ម ។
អ្នកស្រី Bruce បានលើកឡើងពីការសិក្សាមួយដែលបានឲ្យដឹងថា បុគ្គលិកដែលមានភាពរហ័សរហួនខាងលើឆាប់នឹងនឿយហត់នឹងការងារជាងគេ ប្រសិនបើពួកគេមិនមានជំនាញគ្រប់គ្រងស្ត្រេស និងទម្លាប់មើលថែខ្លួនខ្ពស់ទេ ។ ក្រុមមនុស្សទាំងនេះមានកម្រិតស្ត្រេសខ្ពស់ណាស់ រហូតដល់វាអាចប៉ះពាល់ដល់សមត្ថភាពក្នុងការបំពេញការងារដែលជះឥទ្ធិពលដល់ក្រុមហ៊ុន ។
ភាពរហ័សរហួនអនុញ្ញាតឲ្យបុគ្គលិកឆ្លើយតប និងសម្របខ្លួនយ៉ាងឆាប់រហ័សទៅនឹងស្ថានការដែលកំពុងតែមានការផ្លាស់ប្តូរ ។ ប៉ុន្តែភាពរឹងមាំដែលជាសមត្ថភាពក្នុងការងើបឡើងទាំងផ្លូវកាយ និងផ្លូវចិត្តពីបញ្ហាជួយឲ្យបុគ្គលិកជៀសវាងការនឿយហត់ និងធុញទ្រាន់នឹងការងារជាង ។ លើសពីនេះទៅទៀត ការសិក្សាបានឲ្យដឹងដែរថា បុគ្គលិកដែលមានភាពរឹងមាំមានសមត្ថភាពក្នុងការឆ្លើយតបឆាប់រហ័សទៅនឹងឧបសគ្គដែលមិនអាចមើលឃើញច្រើនជាងបុគ្គលិកដែលមានភាពរហ័សរហួនដល់ទៅ៣០% ឯណោះ ។
បុគ្គលិករហ័សរហួនប្រៀបបានជានាវាដែលជាយានសម្រាប់ក្រុមហ៊ុនធ្វើដំណើរទៅកាន់គោលដៅ ប៉ុន្តែមានហានិភ័យច្រើនក្នុងការធ្វើដំណើរ ។ ការបាក់ទឹកចិត្ត និងភាពនឿយហត់ផ្នែករាងកាយផ្សេងៗដែលបុគ្គលិករហ័សរហួនជួបប្រទះអាចធ្វើឲ្យពួកគេបាត់បង់សមត្ថភាពក្នុងការបំពេញការងារ និងកាត់បន្ថយការចូលរួម ។ ពួកគេចង់ប្រើជំនាញឲ្យអស់ពីសមត្ថភាព ប៉ុន្តែពួកគេខ្វះភាពរឹងមាំក្នុងការទប់ទល់នឹងស្ត្រេស ។ ដូច្នេះស្ថាប័នដែលពឹងផ្អែកលើមនុស្សរហ័សរហួនអាចប្រៀបដូចជា ពឹងផ្អែកលើមូលដ្ឋានមិនរឹងមាំមួយ ។
ក្នុងសម័យកាលដែលតែងតែមានការផ្លាស់ប្តូរនេះ ភាពរឹងមាំ គឺជាគុណសម្បត្តិសំខាន់ ។ មនុស្សដែលរហ័សរហួនអាចដោះស្រាយបញ្ហាបានឆាប់រហ័សពិតមែន ប៉ុន្តែប្រសិនបើពួកគេមិនមានភាពរឹងមាំទេ ពួកគេមិនអាចសម្របខ្លួនបានជោគជ័យឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ