រាជធានីភ្នំពេញ ៖ រដ្ឋមន្ត្រីក្រសួងទេសចរណ៍លោក ថោង ខុន បានថ្លែងបញ្ជាក់យ៉ាងម៉ឺងម៉ាត់ថា យើងនឹងមិនបន្ធូរដៃ ចំពោះអាជីវករលក់វត្ថុអនុស្សាវរីយ៍ក្លែងក្លាយដល់ភ្ញៀវទេសចរទៀតទេ ព្រោះសកម្មភាពនោះវាមិនគ្រាន់តែប៉ះពាល់ដល់វិស័យទេសចរណ៍ប៉ុណ្ណោះទេ តែវាប៉ះពាល់ខ្លាំងណាស់ដល់កិត្យានុភាពជាតិរបស់យើងថែមទៀត ។
ការថ្លែងរបស់លោករដ្ឋមន្ត្រីទេសចរណ៍បែបនេះ ធ្វើឡើងក្នុងការផ្តល់បទសម្ភាសន៍ជាមួយក្រុមអ្នកសារ ព័ត៌មាន កាលពីពេលថ្មីៗនេះ ។ លោកបញ្ជាក់ថា យើងនឹងអនុវត្តច្បាប់យ៉ាងតឹងរឹងបំផុត ចំពោះជនទាំង ឡាយណា ដែលលក់វត្ថុអនុស្សាវរីយ៍ក្លែងក្លាយដល់ភ្ញៀវទេសចរ ។
លោក ថោង ខុន បានបញ្ជាក់ច្បាស់ថា យើងមានច្បាប់រួចហើយ ប្រឆាំងទៅនឹងការលក់វត្ថុអនុស្សាវរីយ៍ក្លែងក្លាយនេះ, ដូច្នេះ យើងនឹងមិនលើកលែងទៀតឡើយ ហើយអ្នកណាដែលនៅតែបន្តលក់របស់ក្លែង ក្លាយឲ្យភ្ញៀវទេសចរនឹងត្រូវប្រឈមមុខផ្លូវច្បាប់ ។
លោករដ្ឋមន្ត្រីបញ្ជាក់ថា តាមច្បាប់ត្រូវបានហាមមិនឲ្យលក់វត្ថុអនុស្សាវរីយ៍លើសតម្លៃកំណត់ ឬក៏លក់វត្ថុអនុស្សាវរីយ៍ក្លែងក្លាយដល់ភ្ញៀវនោះទេ ប៉ុន្តែបើគេនៅតែប្រព្រឹត្តិនោះគេនឹងប្រឈមការផ្តន្ទាទោសពី៦ខែទៅ២ឆ្នាំ ។ លោកបន្ថែមថា ចាប់ពីពេលនេះទៅ ដាច់ខាតមិនឲ្យលក់វត្ថុអនុស្សាវរីយ៍លើសតម្លៃ (កោភ្ញៀវ) ឬក្លែងក្លាយបន្តទៀតឡើយ សំខាន់តំបន់សៀមរាបអង្គរ ។
លោករដ្ឋមន្ត្រីបញ្ជាក់បន្ថែមថា ក្រសួងនឹងជម្រុញការផ្សព្វផ្សាយអប់រំ ណែនាំដល់អាជីវករទាំងអស់ឲ្យយល់អំពីបញ្ហានេះ ហើយក៏ខិតខំជម្រុញផងដែរ ដល់សិប្បកម្មកែច្នៃផលិតវត្ថុអនុស្សាវរីយ៍ឲ្យយកចិត្តទុកដាក់បង្កើនការផលិតនូវផលិតផលវត្ថុអនុស្សាវរីយ៍ទាំងបរិមាណនិងគុណភាព ដើម្បីបម្រើគោលដៅទេសចរណ៍ ។
លោក ប្រាក់ ច័ន្ទតារា អគ្គាធិការនៃអគ្គាធិការដ្ឋានក្រសួងទេសចរណ៍បានឲ្យដឹងដែរថា កន្លងមកខាងក្រសួងបានចុះដោះស្រាយបន្តបន្ទាប់ ទាក់ទងការលក់វត្ថុអនុស្សាវរីយ៍ក្លែងក្លាយ ហើយត្រូវបានភ្ញៀវទេសចរប្តឹងមកក្រសួង ។ ប៉ុន្តែការចុះដោះស្រាយនោះ មានបញ្ហាប្រឈមខ្លះដោយសារតែអាជ្ញាប័ណ្ណ អាជីវកម្មចេញដោយក្រសួងពាណិជ្ជកម្ម ។
ប៉ុន្តែក្រសួងបានសម្របសម្រួល ដោះស្រាយឲ្យអាជីវករសងនូវតម្លៃលក់វត្ថុអនុស្សាវរីយ៍ក្លែងក្លាយគ្រប់ចំនួនជូនទៅភ្ញៀវវិញ ។ បន្ទាប់មក ក្រសួងក៏បានសម្រេចព្យួរអាជ្ញាប័ណ្ណរបស់ពួកគាត់ជាបណ្តោះ អាសន្នរយៈពេល៣ខែទៅ៦ខែ ។ ទន្ទឹមនោះយើងបានធ្វើលិខិតស្នើទៅក្រសួងពាណិជ្ជកម្ម ដើម្បីចាត់វិធានការបន្តដោយស្នើសុំឲ្យបិទអាជីវកម្ម ឬក៏ប្តឹងទៅតុលាការថែមទៀត ដើម្បីដោះស្រាយតាមច្បាប់ ។
លោកបញ្ជាក់បន្ថែមថា ការលក់វត្ថុអនុស្សាវរីយ៍ក្លែងក្លាយឲ្យភ្ញៀវទេសចរណ៍ គឺវាប៉ះពាល់ធ្ងន់ធ្ងរណាស់ដល់វិស័យទេសចរណ៍រួមទាំង កិត្យានុភាពរបស់ប្រទេសកម្ពុជា ។ សម្រាប់ភ្ញៀវអន្តរជាតិដែលទិញប៉ះ
ចំវត្ថុអនុស្សាវីយ៍ក្លែងក្លាយ នោះពួកគេនឹងមិនសប្បាយចិត្តផង ហើយគេអាចនឹងផ្សព្វផ្សាយដល់ភ្ញៀវទេសចរដទៃទៀត អំពីការបោកប្រាស់របស់អាជីវករលក់វត្ថុអនុស្សាវរីយ៍នៅកម្ពុជាយើង ដែលបញ្ហានោះនាំឲ្យប៉ះពាល់ដល់អារម្មណ៍ភ្ញៀវ ឬក៏រារែកក្នុងការមកទស្សនាកម្ពុជាលើកក្រោយៗទៀតហើយពួកគេក៏អាចនឹងវាយតម្លៃមិនល្អ ដល់ប្រទេសរបស់យើងថែមទៀត ។
យ៉ាងណាក៏ដោយ ទាំងលោក ថោង ខុន រដ្មន្ត្រីក្រសួងទេសចរណ៍ រួមទាំងលោកប្រាក់ ច័ន្ទតារា អគ្គាធិការនៃអគ្គាធិការដ្ឋានក្រសួងទេសចរណ៍សុទ្ធតែបានអះអាងដូចគ្នាថា ក្រសួងនឹងមិនបន្ធូរដៃឬទុកឲ្យអាជីវករបន្ត លក់វត្ថុអនុស្សាវរីយ៍ក្លែងក្លាយ ឬក្នុងតម្លៃថ្លៃហួសហេតុដល់ភ្ញៀវទេសចរបន្តទៀតនោះឡើយ ហើយយើងនឹងខិតខំចាត់វិធានការ ដើម្បីលុបបំបាត់សកម្មភាពល្មើសទាំងនោះ ៕ (សម្រួលដោយ៖ស្រីណា)
ចែករំលែកព័តមាននេះ