អភិបាលខណ្ឌដូនពេញសន្យាលប់បំបាត់ចំណតរថយន្តគួកជេជុំវិញសួនកុមារវត្តភ្នំ

ថ្ងៃទី ០៥ ខែ កញ្ញា ឆ្នាំ ២០១៩
ម៉ោង ០៩:១២
ចន ណារិទ្ធ

រាជធានីភ្នំពេញ ៖ អាជ្ញាធរខណ្ឌដូនពេញសន្យាល់បបំបាត់ចំណតរថយន្តគួកជេអោយអស់នៅជុំវិញសួនកុមារវត្តភ្នំ មិនអោយកើតមានទៀតឡើយ ដើម្បីធានាបានសណ្តាប់ធ្នាប់សាធារណៈនិងរបៀបរៀបរយនៅតំបន់ទេសចរណ៍កណ្តាលរាជធានីភ្នំពេញដ៏សំខាន់មួយនេះ។

លោកសុខ ពេញវុធ អភិបាលខណ្ឌដូនពេញ បានអោយដឹងនៅរសៀលថ្ងៃទី៤ ខែកញ្ញានេះថា ក្រុមការងាររៀបចំសណ្តាប់ធ្នាប់ខណ្ឌដូនពេញបានបោសសំអាតទីតាំងចតលក់រថយន្តជុំវិញបរិវេណសួនកុមារវត្តភ្នំរួចរាល់ហើយ និងសន្យាមិនអោយតំបន់នេះកើតមានករណីនេះដូចមុនទៀតឡើយ ខណៈ អភិបាលរាជធានីភ្នំពេញបានប្រកាសហាមដាច់ខាតមិនឲ្យទីតាំងនេះមានការលក់ដូររថយន្តឡើយ ដើម្បីបង្កលក្ខណៈងាយស្រួលដល់ប្រជាពលរដ្ឋយកកូនៗមកលេងនៅសួនកុមារនេះ។

លោកបន្តថា កន្លងមកនេះមានក្រុមជនខិលខូចមួយចំនួនបានបន្លំចតរថយន្តនៅលើទីតាំងសួនកុមារនេះ ដោយអះអាងថា ជាក្រុមការងាររបស់អគ្គនាយកដ្ឋានវិទ្យុជាតិកម្ពុជា និងអគ្គិសនីកម្ពុជា ប៉ុន្តែភ្លាមៗនោះថ្នាក់ដឹកនាំអគ្គនាយកដ្ឋានវិទ្យុជាតិកម្ពុជា និងអគ្គិសនីកម្ពុជា បានបំភ្លឺដោយអះអាងថា មន្ត្រីរបស់ខ្លួនមិនដែលចតយានយន្តគ្មានសណ្តាប់ធ្នាប់នៅអែបនិងទីតាំងសួនកុមារនេះឡើយ ដូច្នេះអាជ្ញាធរខណ្ឌសូមចាត់វិធានការតាមផ្លូវច្បាប់។

សូមបញ្ជាក់ថា កាលពីពេលកន្លងទៅនេះ រដ្ឋបាលរាជធានីភ្នំពេញនិងអាជ្ញាធរខណ្ឌដូនពេញ បានប្រកាសហាមឃាតមិនឲ្យមានករណីលក់ដូររថយន្តគ្មានសណ្តាប់ធ្នាប់នៅលើផ្លូវ សាធារណៈចាប់ពីសួនទីលានប្រជាធិបតេយ្យចាស់រហូតដល់សួនច្បារផ្សាររាត្រី និងតំបន់មួយចំនួនក្បែររមណីយដ្ឋានវត្តភ្នំ។

ពាក់ព័ន្ធទៅនឹងបញ្ហាខាងលើនេះ អាជ្ញាធររាជធានីភ្នំពេញបានអោយស្វែងរកជនដែលនៅពីក្រោយការបើកដៃឲ្យក្រុមគួកជេរ យករថយន្តមកចតលក់គ្មានសណ្តាប់ធ្នាប់នៅតំបន់សួនកុមារវត្តភ្នំ ដែលធ្វើឲ្យប៉ះពាល់ដល់ សណ្តាប់ធ្នាប់សាធារណៈនិងចរាចរណ៍នៅតំបន់នោះ ៕ (កែសម្រួលដោយ ៖ ធីតា)