រាជធានីភ្នំពេញ ៖ សម្រាប់មួយខែកក្កដា នគបាលចរាចរណ៍ផ្លូវគោកបានផាកពិន័យអ្នកគោរពច្បាប់ចរាចរផ្លូវគោកបានប្រាក់ជាង៦០០លានរៀល ។ នេះបើការលើកឡើងរបស់លោក ស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិកាគណៈកម្មាធិការជាតិសុវត្ថិភាពចរាចរណ៍ផ្លូវគោក ។ ថ្លែងក្នុងកិច្ចប្រជុំប្រជុំបូកសរុបលទ្ធការងារសុវត្ថិភាពចរាចរណ៍ផ្លូវគោកប្រចាំខែកក្កដា នារសៀលថ្ងៃទី៤ សីហា នៅទីស្តីការក្រសួង ។
ក្រោមអធិបតីភាពលោក ស៊ុន ចាន់ថុលរដ្ឋមន្ត្រីក្រសួងសាធារណការ លោកស្រីបានលើកឡើងថា លទ្ធផលត្រួតពិនិត្យរឹតបន្ដឹងអនុវត្តច្បាប់ ស្តីពីចរាចរណ៍ផ្លូវគោកក្នុងខែកក្កដា ឆ្នាំ២០១៩ ទទួលលទ្ធផលដូចជា បានត្រួតពិនិត្យយានយន្តសរុបចំនួន១៥០.៣៣៥គ្រឿង ក្នុងនោះម៉ូតូចំនួន៥៦% ។ ដោយបានរកឃើញយានយន្តល្មើសចំនួន៣៤.២៥៩គ្រឿង ស្មើ២៣%។ បានធ្វើការអប់រំចំនួន១១.២៧៧គ្រឿង ស្មើ៣៣% ។ បានធ្វើការពិន័យចំនួន២២.៩៨២គ្រឿង ស្មើ៦៧% ។
លោកស្រីបញ្ជាក់ថា អនុវត្តការបង់ប្រាក់ពិន័យតាមស្នាក់ការនគរបាលចរាចរណ៍ផ្លូវគោក ដែលបានកំណត់ទទួលបានប្រាក់ពិន័យចំនួន៦៥១.១០០.០០០រៀល (ប្រាំមួយរយហាសិបមួយលានមួយសែនរៀលគត់) ។ លោកស្រីថា ការត្រួតពិនិត្យល្បឿនបានដំណើរការយ៉ាងសកម្ម រកឃើញរថយន្តបើកបរល្មើសល្បឿនចំនួន៨.៣៦៩គ្រឿង បានធ្វើការអប់រំចំនួន ៤.៤២៨នាក់ និងបានធ្វើការពិន័យចំនួន ៣.៩៤១នាក់ ។
ការត្រួតពិនិត្យជាតិស្រវឹងបានចំនួន១០.៥៤៤គ្រឿង ក្នុងនោះរថយន្តចំនួន ៤.៦៦២គ្រឿង និងម៉ូតូចំនួន៥.៨៨២គ្រឿង រកឃើញអ្នកបើកបរស្រវឹងសរុប ២.៧៧៨នាក់ ស្មើ២៦% (អ្នកបើកបរម៉ូតូចំនួន ១.៧៧០ នាក់) បានធ្វើការអប់រំចំនួន ១.៩៣២នាក់ និងបានធ្វើការពិន័យចំនួន ៨៤៦នាក់ ។
ចំពោះសភាពការណ៍គ្រោះថ្នាក់ចរាចរណ៍វិញលោកស្រីថា គ្រោះថ្នាក់ចរាចរណ៍ក្នុងខែកក្កដា ឆ្នាំ២០១៩ បានកើតឡើងចំនួន៣៣៦លើក បណ្តាលឱ្យស្លាប់ចំនួន១៤១នាក់ និងរបួសចំនួន ៥៩៨នាក់ (របួសធ្ងន់ ៣៤៥នាក់) ៕ កែសម្រួលដោយ ៖ សុឃាក់
ចែករំលែកព័តមាននេះ