រាជធានីភ្នំពេញ ៖ ទំនាក់ទំនងវិនិយោគរវាងកម្ពុជានិងម៉ាឡេស៊ីត្រូវបានថ្នាក់ដឹកនាំ ប្រទេសទាំងពីរធ្វើការវាយតម្លៃជាវិជ្ជមាន ក៏ដូចជាវត្តមានធុរកិច្ចម៉ាឡេស៊ីជាច្រើនកំពុងតែ វិនិយោគនៅកម្ពុជា ជាក់ស្តែងក្នុងឆ្នាំ២០១៨កន្លងមក ទំហំពាណិជ្ជកម្ម កម្ពុជា-ម៉ាឡេស៊ី មានចំនួនប្រមាណ៥០០…
រាជធានីភ្នំពេញ ៖ ទំនាក់ទំនងវិនិយោគរវាងកម្ពុជានិងម៉ាឡេស៊ីត្រូវបានថ្នាក់ដឹកនាំ
ប្រទេសទាំងពីរធ្វើការវាយតម្លៃជាវិជ្ជមាន ក៏ដូចជាវត្តមានធុរកិច្ចម៉ាឡេស៊ីជាច្រើនកំពុងតែ
វិនិយោគនៅកម្ពុជា ជាក់ស្តែងក្នុងឆ្នាំ២០១៨កន្លងមក ទំហំពាណិជ្ជកម្ម កម្ពុជា-ម៉ាឡេស៊ី មានចំនួនប្រមាណ៥០០ លានដុល្លារអាមេរិក និងបានហក់ឡើងគួរឲ្យកត់សម្គាល់សម្រាប់
ឆមាសទី ១ នៃ ឆ្នាំ២០១៩ ដែលទំហំពាណិជ្ជកម្មរវាងប្រទេសទាំងពីរបានកើនឡើងជាង
៤០០លានដុល្លារអាមេរិក។
នេះបើតាមការបញ្ជាក់របស់សម្តេចតេជោ ហ៊ុន សែន ក្នុងសន្និសីទសារព័ត៌ មានរួមគ្នាជាមួយ និងលោក មហាធា មហាម៉ាត់ (Mahathir Mohamad) នាយករដ្ឋមន្ត្រីម៉ាឡេ ស៊ីនាព្រឹកថ្ងៃទី៣ ខែកញ្ញាម្សិលមិញនេះនៅវិមានសន្តិភាព។ព្រមជាមួយគ្នានោះផងដែរ នាយករដ្ឋមន្ត្រី ម៉ាឡេស៊ីបាននិយាយលោកនឹងប្រាប់ប្រជាពលរដ្ឋម៉ាឡេស៊ី ជាពិសេសធុរជន ម្ចាស់ក្រុមហ៊ុនម៉ាឡេស៊ី ត្រូវសម្លឹងមើលពីទំនិញចាំបាច់របស់កម្ពុជាដើម្បីនាំចូលទៅកាន់ប្រទេសម៉ាឡេស៊ី ដែលក្នុងនោះគឺពិតណាស់ អាចទិញអង្ករកម្ពុជា និងផ្លែឈើរបស់កម្ពុជា និងព្យាយាមជួយកាត់បន្ថយឱនភាពពាណិជ្ជកម្មរបស់កម្ពុជា ។
លោក មហាធា មហាម៉ាត់ បានមានប្រសាសន៍ថា ទំនាក់ទំនងទ្វេរភាគីរវាងកម្ពុជា និងម៉ាឡេស៊ីមានសារៈសំខាន់ណាស់ ព្រោះប្រទេសទាំងពីរ សុទ្ធតែជាសមាជិកអាស៊ាន ហើយក្នុងនាមជាប្រទេសជិតខាងគ្នា បើសិនជាមានបញ្ហាជាមួយគ្នាវានឹងកើតមានរឿងអវិជ្ជមានជាច្រើន ។ លោកបានបន្តថាសម្រាប់ពាណិជ្ជកម្មរវាងប្រទេសកម្ពុជា និងម៉ាឡេស៊ីនៅពេលបច្ចុប្បន្ននេះ នៅមានកម្រិតនៅឡើយ ពោលគឺនៅមានតិចតួច ដែលត្រូវបង្កើនទំហំពាណិជ្ជកម្មអោយធំឡើង តែក្នុងនោះម៉ាឡេស៊ីមានប្រៀបជាប្រទេសកម្ពុជា មានន័យថាម៉ាឡេស៊ីបាននាំចេញមកកម្ពុជាច្រើនជាងកម្ពុជានាំចូលទៅកាន់ប្រទេសម៉ាឡេស៊ី ដែលធ្វើអោយឱនភាពពាណិជ្ជកម្មរវាងកម្ពុជា និងម៉ាឡេស៊ីមានភាពខុសគ្នាច្រើន ។
លោកបានបន្តថា «នៅពេលដែលយើងត្រលប់ទៅប្រទេសម៉ាឡេស៊ីវិញ យើងនឹង
ប្រាប់ពលរដ្ឋម៉ាឡេស៊ី អោយពិចារណាក្នុងការសម្លឹងមើលផលិតផលអ្វី ដែលអាចនាំពីកម្ពុជា
ទៅកាន់ប្រទេសម៉ាឡេស៊ីបាន ហើយក្នុងនោះផលិតផលអង្ករនិងផ្លែឈើ អាចជាផលិតផល
អាទិភាពសម្រាប់ម៉ាឡេស៊ីក្នុងការចូល ។ ការបង្កើនការនាំចេញពីកម្ពុជាទៅកាន់ប្រទេស
ម៉ាឡេស៊ី អាចជួយកម្ពុជាមិនអោយមានឱនភាពពាណិជ្ជកម្មខ្លាំងពេក »។ លោកបន្ថែមថា ក្រៅពីទំហំពាណិជ្ជកម្មទ្វេរភាគី ក្នុងនាមជាអ្នកដឹកនាំប្រទេសមួយរូប យើងចង់ឃើញទំនាក់ទំនងទេសចរណ៍កាន់តែច្រើនផងដែរ ។ យើងនឹងជំរុញអោយភ្ញៀវទេសចរម៉ាឡេស៊ី មកលេងកម្ពុជាអោយបានច្រើន និងទាក់ទាញភ្ញៀវទេសចរកម្ពុជា ទៅលេងម៉ាឡេស៊ីច្រើនដូចគ្នា ។
លោក មហាធា មហាម៉ាត់ បានមានប្រសាសន៍បន្តថា « ទេសចរណ៍ ជាវិស័យសំខាន់
ណាស់ ហើយមិនមែនជួយតែផ្នែកសេដ្ឋកិច្ចប៉ុណ្ណោះទេ តែវាក៏ជួយបង្កើនទំនាក់ទំនងល្អរវាង
ប្រទេសនិងប្រទេសផងដែរ ដូច្នេះយើងនឹងលើកទឹកចិត្តអោយប្រជាជនប្រទេសទាំងពីរ បំពេញទស្សនកិច្ចទៅវិញទៅមក » ។
សម្ដេចតេជោហ៊ុន សែន បានមានប្រសាសន៍ថា នាពេលបច្ចុប្បន្នទំនាក់ទំនងពាណិជ្ជ
កម្ម និងការទូតរវាងប្រទេសទាំងពីរ កម្ពុជា និងម៉ាឡេស៊ី មានភាពល្អប្រសើរ ក្នុងនោះដែរ
មានវត្តមានធុរកិច្ចម៉ាឡេស៊ីជាច្រើននៅកម្ពុជា កំពុងបណ្ដាក់ទុនវិនិយោគ ។ ក្នុងឆ្នាំ ២០១៨ ទំហំពាណិជ្ជកម្មកម្ពុជា-ម៉ាឡេស៊ីមានទឹកប្រាក់ប្រមាណជាង ៥០០លានដុល្លារអាមេរិក តែគ្រាន់តែក្នុងឆមាសទី១ឆ្នាំ២០១៩នេះទំហំពាណិជ្ជកម្មរវាងប្រទេសទាំងពីរមានចំនួនប្រមាណជាង៤០០លានដុល្លារអាមេរិកទៅហើយ ។
សម្ដេចតេជោបានមានប្រសាសន៍ថា « ដើម្បីបង្កើនទំហំពាណិជ្ជកម្ម និងវិនិយោគរវាង
ប្រទេសទាំងពីរ ខ្ញុំនិងឯកឧត្តមមហាធៀ បានឯកភាពអោយស្ថាប័នប្រទេសទាំងពីររិះរកវិធី
ពង្រីកសហប្រតិបត្តិការវិស័យនេះបន្ថែមទៀតផងដែរ » ។
យោងតាមរបាយការណ៍របស់ស្ថានទូតម៉ាឡេស៊ីប្រចាំព្រះរាជាណាចក្រកម្ពុជា បាន
អោយដឹងថាទំហំពាណិជ្ជកម្មរវាងប្រទេសកម្ពុជា និងម៉ាឡេស៊ីក្នុងឆ្នាំ២០១៨កន្លងទៅមានទំហំ
ប្រមាណ៥៥៨លានដុល្លារអាមេរិកក្នុងនោះម៉ាឡេស៊ីនាំចូលកម្ពុជាមានទឹកប្រាក់ប្រមាណ៣៨៣លានដុល្លារអាមេរិកនិងកម្ពុជានាំចេញទៅកាន់ប្រទេសម៉ាឡេស៊ីវិញមានទឹកប្រាក់ប្រមាណ១៧៥លានដុល្លារអាមេរិក ។
ក្នុងវិស័យទេសចរណ៍ របាយការណ៍នេះក៏បានបង្ហាញផងដែរថា ក្នុងឆ្នាំ ២០១៨កន្លងទៅនេះភ្ញៀវទេសចរម៉ាឡេស៊ី មកទស្សនានៅកម្ពុជាមានចំនួនជាង២០ម៉ឺននាក់ និងភ្ញៀវទេសចរកម្ពុជាប្រមាណ៩ម៉ឺននាក់បានទៅទស្សនានៅប្រទេសម៉ាឡេស៊ី។ ហើយនៅក្នុងឆ្នាំ ២០១៩នេះដែរម៉ាឡេស៊ីរំពឹងថានឹងទាញភ្ញៀវទេសចរកម្ពុជាទៅទស្សនានៅម៉ាឡេស៊ីប្រមាណ១០ម៉ឺននាក់ និង១១ម៉ឺននាក់នៅក្នុងឆ្នាំ ២០២០ខាងមុខ ៕ កែសម្រួលដោយ ៖សុឃាក់
ចែករំលែកព័តមាននេះ