រាជធានីភ្នំពេញ ៖ ជនជាតិចិនរាប់ពាន់នាក់បាននិងកំពុងចាកចេញពីកម្ពុជា តាមច្រកអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិព្រះសីហនុ ។ លំហូរនៃការចាកចេញដោយចំនួនច្រើនៗនេះ បានកើតមានតាំងពីថ្ងៃទី៣១ សីហា មកដោយមិនដឹងមូលហេតុពិតប្រាកដនោះទេ…
រាជធានីភ្នំពេញ ៖ ជនជាតិចិនរាប់ពាន់នាក់បាននិងកំពុងចាកចេញពីកម្ពុជា តាមច្រកអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិព្រះសីហនុ ។ លំហូរនៃការចាកចេញដោយចំនួនច្រើនៗនេះ បានកើតមានតាំងពីថ្ងៃទី៣១ សីហា មកដោយមិនដឹងមូលហេតុពិតប្រាកដនោះទេ ។ ប៉ុន្តែការចាកចេញនេះ ក៏គាប់ជួនពេលប្រមុខរាជរដ្ឋាភិបាល បានប្រកាសបិទអាជីវកម្មល្បែងតាមអនឡាញ (Game Online) ដែលជាវិធានការមួយដើម្បីពង្រឹងសន្តិសុខ និងការពារកុំឲ្យឧក្រិដ្ឋជនប្រព្រឹត្តអំពើទុច្ចរិតក្រោមស្លាកអាជីវកម្មGame Online នេះ ។
ទាក់ទិននឹងលំហូរចាកចេញរបស់ជនជាតិចិននេះមន្ត្រីរដ្ឋាភិបាលកម្ពុជា មិនបានបង្ហាញការភ្ញាក់ផ្អើលអ្វីឡើយចំពោះករណីនេះ ដ្បិតចំនួនជនជាតិចិនដែលចូលមកកម្ពុជា ក៏មិនក្រោមខ្ទង់ពាន់ដែរក្នុងមួយថ្ងៃៗ ។
មន្ត្រីខេត្តព្រះសីហនុមិនភ្ញាក់ផ្អើលឡើយ ចំពោះការចាកចេញរបស់ជនជាតិចិនរាប់ពាន់នាក់ ដ្បិតវាជាចរន្តចេញចូលជាធម្មតានៅក្នុងខេត្តព្រះសីហនុរបស់លោកដែលការចាកចេញនិងការចូលមកមានចរន្តធម្មតា ។ មន្ត្រីរូបនេះ បានលើកឡើងថា ចំនួនភ្ញៀវទេសចរជនជាតិចិន ដែលចាកចេញពីកម្ពុជាកាលពីថ្ងៃទី៣១ សីហា មានចំនួន៣.០៩៥នាក់ ។ ប៉ុន្តែចំនួនចូលវិញ ក៏មានច្រើនដែរ ពោលគឺ២.៤៩៤នាក់ ។ បើតាមតួលេខខាងលើនេះមានន័យថា ការចាកចេញនិងចូលនៃជនជាតិចិននៅក្នុងខេត្តព្រះសីហនុ គឺមានចំនួនប្រហាក់ប្រហែលគ្នា ។
តាមបណ្តាញសង្គមហ្វេសបុ៊កបានផ្សព្វផ្សាយកន្លងមកនេះថា ជនជាតិចិនរាប់ពាន់នាក់ បានសំរុកចាកចេញពីកម្ពុជាយ៉ាងគំហុក នាមួយរយៈពេលចុងក្រោយនេះ ដែលធ្វើឲ្យមានការកកស្ទះនៅព្រលានយន្តហោះអន្តរជាតិក្រុងព្រះសីហនុ ។ ការសម្រុកចាកចេញនេះ ត្រូវបានគេដាក់ការសង្ស័យថា តើក្រុមជនជាតិចិនទាំងនោះ មានធុំក្លិនអ្វីមិនល្អ ឬមកពីរាជរដ្ឋាភិបាលកម្ពុជា ទើបតែប្រកាសបិទអាជីវកម្ម Game Online កាលពីពេលថ្មីៗនេះ ? ប៉ុន្តែមន្ត្រីរដ្ឋាភិបាលថាវាជារឿងចៃដន្យតែប៉ុណ្ណោះ។ វាអាចមកពីភ្ញៀវទេសចរជនជាតិចិន ឬកម្មករចិន សម្រុកចាកចេញទៅព្រមៗគ្នា ក្នុងពេលតែមួយ ។
តាមវិទ្យុបារាំងបានដកស្រង់សម្តីលោក ជា អូន ជាអ្នកនាំពាក្យនិងជារដ្ឋលេខាធិការអាកាសចរណ៍ស៊ីវិល ដែលគ្រប់គ្រងលើការហោះហើរនៅក្នុងប្រទេសកម្ពុជា ក៏មិនភ្ញាក់ផ្អើលដែរ ។ លោកថា ជួនកាលជាពេលវេលាមួយដែលកម្មករចិនដែលអស់កុងត្រាជាមួយក្រុមហ៊ុនណាមួយ ត្រូវវិលត្រលប់ទៅវិញតែប៉ុណ្ណោះ ។
ផ្អែកតាមរបាយការណ៍របស់អាជ្ញាធរកម្ពុជា បានឲ្យដឹងនៅថ្ងៃទី៣១ ខែសីហាថា ត្រឹមតែ១យប់ប៉ុណ្ណោះ ជនជាតិចិនប្រមាណជាជាង៣០០០នាក់ បានចាកចេញពីខេត្តព្រះសីហនុ តាមជើងហោះហើរ ត្រឡប់ទៅកាន់ប្រទេសពួកគេវិញ បន្ទាប់ពីរដ្ឋាភិបាលកម្ពុជាបានសម្រេចឈប់ផ្ដល់អាជ្ញាប័ណ្ណសម្រាប់អាជីវកម្មល្បែងភ្នាល់តាមម៉ាស៊ីនអេឡិចត្រូនិក និងតាមអ៊ីនធឺណែតទាំងក្នុងនិងក្រៅប្រទេស ចាប់ពីថ្ងៃទី១៨ ខែសីហាមក ។
សារាចរណែនាំដែលចុះហត្ថលេខាដោយប្រមុខរាជរដ្ឋាភិបាល តេជោសែននោះបានលើកឡើងថា ពួកឧក្រិដ្ឋជនបរទេសមួយចំនួន បានជ្រកក្រោមរូបភាពល្បែងភ្នាល់ប្រភេទនេះ ដើម្បីជំរិតទារប្រាក់ពីជនរងគ្រោះទាំងក្នុងនិងក្រៅប្រទេស ដែលធ្វើឲ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គម ។
យោងតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំគណៈរដ្ឋមន្ត្រី កាលពីថ្ងៃទី៣០ ខែសីហា ឆ្នាំ២០១៩ សម្តេចតេជោនាយករដ្ឋ មន្ត្រី ហ៊ុន សែន បានបញ្ជាក់ថា រាល់អាជីវកម្មល្បែងភ្នាល់តាមម៉ាស៊ីនអេឡិចត្រូនិក តាមរយៈអុីនធើរណេតអនឡាញក្នុងនិងក្រៅប្រទេសគ្រប់ប្រភេទនិងគ្រប់រូបភាពនៅក្នុងព្រះ
រាជាណាចក្រកម្ពុជា គឺជាអំពើខុសច្បាប់និងត្រូវបញ្ឈប់សកម្មភាពអាជីវកម្មទាំងនេះឱ្យអស់នៅដំណាច់ឆ្នាំ២០១៩នេះ ។
សម្ដេចតេជោ បានបញ្ជាក់ថា ប្រទេសកម្ពុជាត្រូវអភិវឌ្ឍសេដ្ឋកិច្ចដោយឈរលើមូលដ្ឋាននៃសេវាទេសចរណ៍ វប្បធម៌ និងធម្មជាតិ ជាជាងការពឹងផ្អែកលើចំណូលពីអាជីវកម្មល្បែងភ្នាល់អនឡាញ ។ ជាមួយគ្នានេះ សម្តេចតេជោ ក៏បានបញ្ជាក់ទៅកាន់អង្គប្រជុំថា មិនឱ្យកងកម្លាំងប្រដាប់អាវុធទាំងអស់របស់កម្ពុជាដែលរួមមាន កងយោធពលខេមរភូមិន្ទ នគរបាល និងកងរាជអាវុធហត្ថមានងារជា«ឧកញ៉ា» តទៅទៀតឡើយ ។
សម្ដេចតេជោ បានបញ្ជាឱ្យកងកម្លាំងប្រដាប់អាវុធណាដែលមានងារជា«ឧកញ៉ា» ត្រូវសម្រេចចិត្តជាបន្ទាន់ជ្រើសរើសយកតែមួយរវាងងារជា«ឧកញ៉ា» ឬតួនាទីក្នុងក្របខណ្ឌជាកងកម្លាំងប្រដាប់អាវុធ ។ រាជរដ្ឋាភិបាលនឹងបន្ត ពង្រឹងការធ្វើទំនើបកម្មប្រព័ន្ធបច្ចេកវិទ្យាព័ត៌មានវិទ្យាក្នុងការផ្ដល់សេវាសាធារណៈ ដើម្បីជាផ្នែកមួយក្នុងការចូលរួមប្រយុទ្ធប្រឆាំងអំពើពុករលួយនៅកម្ពុជាផងដែរ។
សូមជម្រាបថា ការបញ្ជារបស់ប្រមុខរាជរដ្ឋាភិបាលនេះ បន្ទាប់ពីសមត្ថកិច្ចបានបង្ក្រាបបទល្មើសតាមប្រព័ន្ធបច្ចេកវិទ្យាជាបន្តបន្ទាប់ ក្នុងនោះគេសង្កេតឃើញថាជនជាតិចិនភាគច្រើនត្រូវសមត្ថកិច្ចចាប់បាន ហើយបញ្ជូនទៅស្រុកកំណើតវិញ ។ ទាក់ទងនឹងល្បែងភ្នាល់នេះដែរ គេក៏សង្កេតឃើញថា នៅតាមហាងកាហ្វេទាំងនៅជនបទនិងទីក្រុងមានអ្នកភ្នាល់ល្បែងបញ្ជល់មាន់យ៉ាងច្រើន នៅក្រោមរូបភាពផឹកកាហ្វេ ។
វត្តមានជនជាតិចិនថយចុះជាបណ្តើៗនៅប៉ោយប៉ែត
ខេត្តបន្ទាយមានជ័យ ៖ មិនមែនតែខេត្តព្រះសីហនុទេ វត្តមានជនជាតិចិននៅក្រុងប៉ោយប៉ែតក៏បានថយចុះស្ទើរ៥០ភាគរយមួយរយៈចុងក្រោយនេះ ។ ជាការកត់សម្គាល់ជនជាតិចិនដែលកន្លងមកគេឃើញដើរប្រសេចប្រសាចរកជួលអគារនិងបន្ទប់ក្នុងតម្លៃថ្លៃៗ ឯទីតាំងជួលភាគច្រើនគេបើកជាល្បែងអនឡាញ ព្រោះឃើញមានយានយន្តចតត្រៀបត្រានោះពេលនេះហាក់ស្ងប់ស្ងាត់និងបិទទីតាំងដែលជួលជាបណ្តើៗ អាចជាការនាំគ្នាចាកចេញពីក្រុងប៉ោយប៉ែតទៅប្រទេសកំណើត តែប្រភពខ្លះសង្ស័យទៅជ្រកតាមទីតាំងកាស៊ីណូផ្សេងៗ ។
ប្រភពពីសមត្ថកិច្ចមួយចំនួនសុំមិនបញ្ចេញឈ្មោះប្រាប់ថា កន្លងមកនៅអំឡុងម៉ោង៨ទៅ៩ជារៀងរាល់ព្រឹកគេតែងឃើញជនជាតិចិនប្រុសស្រីយ៉ាងតិច២០ទៅ៣០រ៉ឺម៉កម៉ូតូកង់បី (តុកតុក) និងខ្លះតាមរថយន្តឆ្លងកាត់ពីតាមអគារស្នាក់នៅទៅកាន់ទីតាំងពួកគេបើកអាជីវកម្មក្នុងទឹកដីកាស៊ីណូមួយចំនួន ហើយចាប់ពីម៉ោង៦ល្ងាចទៅក្រុមជនជាតិចិន ធ្វើដំណើរតាមយានយន្តនិងថ្មើរជើងប្រសាចចេញពីទឹកដីកាស៊ីណូ និងផ្លូវដើមពុទ្ទ្រានិងដងផ្លូវនានាទៅរកកន្លែងស្នាក់នៅវិញ ។ ថ្មីៗនេះ គេឃើញនគរបាលជំនាញរបស់អន្តរក្រសួង បានចុះពិនិត្យការស្នាក់នៅរបស់ជនបរទេសក្នុងខេត្តបន្ទាយមានជ័យ ពិសេសក្រុងប៉ោយប៉ែត តាមសណ្ឋាគារ និងទីតាំងស្នាក់នៅក្នុងទឹកដីកាស៊ីណូ ។
លោក អេង លីហួ ស្នងការរងទទួលផែនអន្តោប្រវេសន៍នៃស្នងការដ្ឋាននគរបាលខេត្តបានប្រាប់កោះសន្តិភាពតាមទូរស័ព្ទថា ជនជាតិចិនបានថយចុះមែនប៉ុន្តែលោកមិនទាន់អាចដឹងលម្អិតថាប៉ុន្មានភាគរយទេ ព្រោះពេលនេះខាងលោកនិងអន្តរក្រសួងបាននិងកំពុងចុះធ្វើការបន្តនៅឡើយ ។ លោកបន្តថា ការចុះពិនិត្យការស្នាក់នៅជនបរទេស និងធ្វើឡើងរហូតដល់ចុងខែធ្នូ ២០១៩ ទើបបិទបញ្ចប់ ។
ស្នងការរងរូបនេះប្រាប់ថា បើតាមទិន្ន័យមិនទាន់យកជាបានការមានជនជាតិចិន រស់នៅក្នុងក្រុងប៉ោយប៉ែតជាង១ម៉ឺននាក់នេះ មិនគិតដល់ជនបរទេសផ្សេងៗទៀតឡើយ ហើយថារកឃើញជនជាតិចិនចំនួន៩៦០នាក់ ស្នាក់នៅគ្មានសៀភៅការងារហៅថា(Work permmit)ត្រូវបានផាកពិន័យចូលថវិការដ្ឋម្នាក់១២៥ដុល្លារ ឬស្មើនឹង៥០ម៉ឺនរៀល ។
ការថយចុះនៃវត្តមានជនជាតិចិននៅក្រុងប៉ោយប៉ែត អាចមកពីវិធានការរបស់រាជរដ្ឋាភិបាលដែលសម្តេចតេជោនាយករដ្ឋមន្ត្រី ហ៊ុន សែន បានចេញបទបញ្ជាកាលពីពេលថ្មីនេះ ក្នុងកិច្ចប្រជុំនៅគណៈរដ្ឋមន្ត្រីឲ្យបញ្ឈប់អាជីវកម្មល្បែងភ្នាល់តាមរយៈអុីនធើរណេត អនឡាញឲ្យអស់ត្រឹមដំណាច់ឆ្នាំ២០១៩ ។ ប្រភពទាំងនេះលើកឡើងបន្តថា វត្តមានជនជាតិចិនភាគច្រើននៅក្រុងប៉ោយប៉ែតគ្មានអ្វីក្រៅពីបើកល្បែងស៊ីសងតាមរយៈអុីនធើរណេត អនឡាញនិងមួយចំនួនតូចបើកហាងរកស៊ីលក់ដូរព្រោងព្រាតរហូតបើកទាំងគ្លីនិកទៀតផង ។
ក្រុងបាវិតមានការស្ងប់ស្ងាត់ជនជាតិចិនដូចគ្នាដែរ
ខេត្តស្វាយរៀង ៖ តាមការផ្តល់ព័ត៌មានឱ្យដឹងនាព្រឹកថ្ងៃទី៣ កញ្ញាឱ្យដឹងថាជាការកត់សម្គាល់ជនជាតិចិនដែលដើរប្រសេកប្រសាចចេញចូលតាមតំបន់កាស៊ីណូ បានស្ងាត់មិនឃើញមានដើររហេតរហូតនោះទេ ។ តាមប្រភពថា គេបានឃើញក្រុមជនជាតិចិនរាប់រយនាក់ បាននាំគ្នាជិះរថយន្តក្រុងធំៗឆ្ពោះទៅរាជធានីភ្នំពេញ ។ ចំនួនជនជាតិចិនដែលមិនទាន់រាប់ជាផ្លូវការមានពី៣ទៅ៤ម៉ឺននាក់ តែបើតួលេខផ្លូវការតាមរយៈមន្ត្រីមន្ទីរការងារបានឱ្យដឹងថា មានតែជាង១ម៉ឺននាក់ប៉ុណ្ណោះ ។
កន្លងមកនេះ មានការឃាត់ខ្លួនក្រុមជនជាតិចិនជាង៣០០នាក់ ដែលក្នុងនោះ២៧នាក់ជាជនសង្ស័យ តាមរកចាប់ខ្លួននៅប្រទេសចិន ក្រៅពីនេះជាក្រុមជនជាតិចិនដែលចូលមកមិនមានលិខិតស្នាមអ្វីទាំងអស់ ។ ក្រុមជនជាតិចិនទាំងនោះត្រូវបានថៅកែកាស៊ីណូចេញមុខធានាផងដែរ ៕
ចែករំលែកព័តមាននេះ