រាជធានីភ្នំពេញ ៖ នៅក្នុងវិស័យអចលនទ្រព្យនាពេលបច្ចុប្បន្ន គេសង្កេតឃើញថាវិនិយោគិនជនជាតិចិន គឺជាអ្នកដាក់ទុនវិនិយោគច្រើនជាងគេ ជាក់ស្ដែងគម្រោងធំៗមួយចំនួនធំ ជាពិសេសគម្រោងសំណង់អាគារខ្ពស់ៗ នៅក្នុងរាជធានីភ្នំពេញនិងខេត្តសក្ដានុពល ជាពិសេសខេត្តព្រះសីហនុ គឺជាគម្រោងរបស់វិនិយោគិនចិន ។ តែយ៉ាងណាក៏ដោយបើនិយាយពីវិនិយោគិនបរទេសនៅកម្ពុជា ជប៉ុនគឺជាអ្នកវិនិយោគច្រើនជាងគេបន្ទាប់ពីចិន ដូច្នេះ ការទាក់ទាញវិនិយោគិនជប៉ុនមកបណ្ដាក់ទុននៅកម្ពុជា គឺជារឿងល្អប្រសើរនិងផ្ដល់ប្រយោជន៍ច្រើនដល់កម្ពុជា ពីព្រោះជប៉ុនគឺជាអ្នកវិនិយោគដ៏ម៉ត់ចត់ ។
នៅក្នុងដំណើរចេញទៅប្រជុំនៅប្រទេសជប៉ុនរបស់សមាជិកសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា កាលពីរាត្រីថ្ងៃទី០១ ខែកញ្ញា ឆ្នាំ២០១៩ នេះលោក ច្រឹក សុខនីម ប្រធានសមាគមបានប្រសាសន៍ថា នៅក្នុងកិច្ចប្រជុំសន្និសីទ អចលនទ្រព្យពិភពលោកនៅប្រទេសជប៉ុនលើកនេះ លោករំពឹងថានឹងហុចផលមកកម្ពុជាច្រើន ជាពិសេសក្នុងវិស័យអចលនទ្រព្យ ហើយសមាជិករបស់សមាគមដែលនឹងចូលរួមប្រជុំនេះ ក៏បានត្រៀមរួចជាស្រេច ក្នុងការផ្សព្វផ្សាយនិងបង្ហាញពីសក្ដានុពលវិស័យអចលនទ្រព្យដល់វិនិយោគិនដែលចូលរួមក្នុងសន្និសីទនោះដែរ ក្នុងនោះជប៉ុនគឺជាគោលដៅសម្រាប់ការផ្សព្វផ្សាយរបស់ពួកយើង។ លោកបានបន្តថា វិនិយោគិនជប៉ុន គឺជាអ្នកវិនិយោគ ដ៏ម៉ត់ចត់ ហើយមុននឹងគេដាក់ទុនវិនិយោគលើអ្វី មួយគេបានសិក្សាច្បាស់លាស់ ពីទីផ្សារនិងសក្ដានុពលនៃវិស័យដែលគេបំរុងនឹងវិនិយោគនោះ ។ លោកបានបញ្ជាក់ថា « កត្តាទាំងនេះហើយ ជំរុញអោយពួកយើងត្រូវទាក់ទាញវិនិយោគិនជប៉ុនមកវិនិយោគអោយបានច្រើននៅក្នុងប្រទេសកម្ពុជា ដើម្បីផ្ដល់នូវប្រាក់ចំណូលដល់ជាតិរបស់យើង ក៏ដូចជាប្រាក់ចំណូលដល់ប្រជាពលរដ្ឋកម្ពុជាផងដែរ » ។
លោក ច្រឹក សុខនីម បានអោយបន្ថែមទៀតថា យើងនឹងយកប្រធានបទ ហេតុអ្វីត្រូវវិនិយោគនៅកម្ពុជា ក្នុងនោះយើងត្រៀមក្នុងការពន្យល់ពួកគេឱ្យយល់ពីកម្ពុជា ។ បច្ចុប្បន្ន កម្ពុជា មានលំហូរសាច់ប្រាក់ល្អ ហើយការផ្ដល់អាទិភាពឱ្យវិនិយោគិនបរទេសនៅកម្ពុជា ក៏មានលក្ខណៈខុសពីប្រទេសដទៃទៀតក្នុងតំបន់អាស៊ានដែរ ហើយចំនុចសំខាន់ដែលវិនិយោគិនបរទេសគួរតែចូលមកកម្ពុជានោះ គឺជនបរទេសអាចបើកក្រុមហ៊ុននិងមានសិទ្ធិកាន់កាប់ភាគហ៊ុន១០០ភាគរយ ។ ទាំងនេះហើយដែលវិនិយោគិនបរទេសគួរតែមកវិនិយោគ រកស៊ីនៅក្នុងប្រទេសកម្ពុជា ។
គួរបញ្ជាក់ផងដែរថា នៅក្នុងប្រទេសកម្ពុជាបច្ចុប្បន្ន មានគម្រោងរបស់ជប៉ុនធំៗមួយចំនួន ដែលជាគម្រោងទទួលបានការគាំទ្រពីរដ្ឋាភិបាល និងប្រជាជនដូចជាគម្រោងផ្សារទំនើបអ៊ីអនម៉ល ដែលរហូតមកដល់ពេលនេះ ផ្សារទំនើបអ៊ីអនម៉លបានដំណើរការពីរកន្លែងហើយ និងកំពុងរៀបចំដំណើរការសាងសង់មួយកន្លែងទៀតដែលជាគម្រោងផ្សារទំនើបអ៊ីអនទី៣ ដែលប្រភពព័ត៌មានថានៅប៉ែកខាងត្បូងនៃរាជធានីភ្នំពេញ ។ នៅមានគម្រោងវិនិយោគជាច្រើនទៀតដែលជប៉ុនបានបោះទុនវិនិយោគនៅក្នុងប្រទេសកម្ពុជា ហើយក៏ទទួលបានការគាំទ្រពី ប្រជាពលរដ្ឋកម្ពុជាផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ