រាជធានីភ្នំពេញ ៖ ការរើសគូស្រករកាលពីសម័យមុន សម័យដែលមិនសូវជឿនលឿនវិញ នារីនិងបុរសភាគច្រើន មិនសូវជាមានសិទ្ធិក្នុងការរើសមនុស្សដែលខ្លួនស្រលាញ់ដោយខ្លួនឯងនោះទេ ។ អ្នកដែល
អាចសម្រេចបានថា ត្រូវរើសយកមនុស្សបែបណាជាគូគាប់របស់ពួកគេ គឺឪពុក-ម្ដាយជាអ្នកសម្រេចតែប៉ុណ្ណោះ ។
ផ្នត់គំនិតចាស់ៗតែងគិតថា គូស្រករដែលពួកគាត់ជាអ្នករើសអោយកូនៗរបស់ពួកគាត់ គឺពិតជាស័ក្តិសមបំផុតមិនថាឋាន: ឬអត្តចរិតនោះទេ ។ ផ្ទុយទៅវិញមកដល់បច្ចុប្បន្ន ផ្នត់គំនិតដែលឪពុកម្ដាយសម័យ
មុនធ្លាប់មានទាំងអស់នោះក៏បានរសាត់បាត់ម្ដងបន្តិចៗ ដោយពួកគាត់បានផ្ដល់សិទ្ធិសេរីភាពអោយកូន
ចៅរបស់គាត់ជ្រើសរើសមនុស្សដែលខ្លួនពេញចិត្តដោយខ្លួនឯង និងទទួលខុសត្រូវលើអ្វីដែលខ្លួនបាន សម្រេច ។
កញ្ញាដារីណែត អាយុ២១ឆ្នាំ ជាបុគ្គលិកផ្នែកគណនេយ្យ នៅក្រុមហ៊ុនឯកជនមួយកន្លែង បានប្រាប់ឱ្យដឹងថា “ ឪពុកម្ដាយរបស់ខ្ញុំបានផ្ដល់សិទ្ធិសេរីភាព សម្រាប់ជីវិតគូរបស់ខ្លួន ដោយពួកគាត់លើកឡើងថា កូនគាត់ជាមនុស្សដែលមានការងារអាចពឹងពាក់ខ្លួនឯងបានស្គាល់មនុស្សក្នុងសង្គមបានច្រើន ហើយមានទំនួលខុសត្រូវលើជិវិតរបស់ខ្លួនឯងខ្ពស់” ។
អ្វីដែលសំខាន់ដារីណែតបញ្ជាក់យ៉ាងច្បាស់ថា “ប្ដីរបស់ខ្ញុំ គឺខ្ញុំជាអ្នករួមរស់ជាមួយ ដូច្នេះហើយសុខទុក្ខបែបណា ខ្ញុំជាអ្នកទទួលខុសត្រូវ” ។ ចំណែកលោក សំ ជាហេង អាយុ២២ ជាបុគ្គលិកផ្នែកកាត់ត នៅក្រុមហ៊ុនឯកជនបាននិយាយថា សម្រាប់លោកការជ្រើសរើសគូស្រករវាអាស្រ័យទៅលើវ័យ និងកាល:ទេស: ។ បើសិនជាគាត់មានវ័យជាង២០ឆ្នាំ គាត់បានជួបមនុស្សដែលគាត់ពេញចិត្ត គាត់នឹងធ្វើតាមបេះដូងរបស់គាត់ ជាងធ្វើតាមឪពុកម្ដាយរបស់គាត់ ។
សរុបមក មនុស្សគ្រប់គ្នាតែងមានផ្លូវដើររៀងៗខ្លួន មុននឹងយើងចង់ជ្រើសផ្លូវមួយណាយកមកដើរ ត្រូវតែគិតពិចារណា អោយបានច្បាស់លាស់ ចៀសវាងមានការសោកស្ដាយនៅពេលក្រោយ ៕ (សម្រួលដោយ៖ ស្រីណា)
ចែករំលែកព័តមាននេះ