ខេត្តស្វាយរៀង ៖ រថយន្តដឹកទំនិញធុនយក្សយីឌុបភ្លៅប្រាំចំនួន៨គ្រឿង ផ្ទុកទំនិញពេញទ្រុងហើយគ្របប៉ាតង់ជិត ត្រៀមឆ្លងដែនទៅប្រទេសវៀតណាម តាមច្រករបៀងជាប់សាលាក្រុងបាវិត (ឯខាងវៀតណាមគេហៅថា ច្រកកេមែ័រ) ស្ថិតក្នុងភូមិតាបិប សង្កាត់បាវិត…
ខេត្តស្វាយរៀង ៖ រថយន្តដឹកទំនិញធុនយក្សយីឌុបភ្លៅប្រាំចំនួន៨គ្រឿង ផ្ទុកទំនិញពេញទ្រុងហើយគ្របប៉ាតង់ជិត ត្រៀមឆ្លងដែនទៅប្រទេសវៀតណាម តាមច្រករបៀងជាប់សាលាក្រុងបាវិត (ឯខាងវៀតណាមគេហៅថា ច្រកកេមែ័រ) ស្ថិតក្នុងភូមិតាបិប សង្កាត់បាវិត ក្រុងបាវិត ដែលមហាជនដាក់ការសង្ស័យថា មានបង្កប់ទំនិញខុសច្បាប់ ។ រថយន្តធុនយក្សទាំង៨គ្រឿងនេះបម្រុងឆ្លងដែន នៅវេលាល្ងាចថ្ងៃទី២ កញ្ញា ដោយចតនៅជាប់ទីស្នាក់ការប៉ុស្តិ៍ព្រំដែនច្រករបៀងនេះ ។ ទាក់ទិនករណីនេះដែរ អ្នកសារព័ត៌មានយើងបានសួរទៅមន្ត្រីយោធាម្នាក់ដែលប្រចាំការនៅច្រករបៀងសាលាក្រុងនោះដែរ ក៏ប៉ុន្តែមន្ត្រីរូបនោះប្រាប់ថា រូបគេមិនអាចឆ្លើយបានទេ មេមិននៅ ចាំសួរមេទៅ !
មន្ត្រីយោធារូបនោះ គ្រាន់តែប្រាប់រថយន្ត៨គ្រឿងនេះ សុំដឹកទំនិញឆ្លងដែនចូលទៅប្រទេសវៀតណាម ហើយភាគីវៀតណាមមិនទាន់អនុញ្ញាត ទើបរង់ចាំអ្នករត់ការដោះស្រាយនិងបានបញ្ជាក់ទៀតថា រថយន្ត៨គ្រឿងនេះ មកចតនៅច្រកទ្វារនៃច្រករបៀងនេះ២យប់២ថ្ងៃមកហើយភាគីវៀតណាមមិនទាន់ឱ្យចូល ។
ចំណែកអ្នកបើកបររថយន្តវិញបាននិយាយថា គេមិនដឹងច្បាស់ទេ គ្រាន់តែឮម្ចាស់ឡានប្រាប់ថា ដឹកកំទេចក្រណាត់រោងចក្រទៅលក់នៅប្រទេសវៀតណាម។ទ ាក់ទិនករណីនេះដែរ យើងមិនអាចទំនាក់ទំនងសុំការបំភ្លឺពីមន្ត្រីគយនិងរដ្ឋាករប្រចាំការនៅក្រុងបាវិតបានទេ គិតត្រឹមថ្ងៃទី៣ កញ្ញា នេះ។
មហាជនបានបង្ហើបឲ្យដឹងថា រថយន្តធុនយក្សយីឌុបទាំងនេះ បានដឹកទំនិញច្រើនកំពស់កប់ពពកបានបំផ្លាញផ្លូវខូចអស់ក្នុងមួយថ្ងៃៗចាប់ពី១០ទៅ១៥គ្រឿង ឆ្លងដែនទៅប្រទេសវៀតណាមតាមច្រករបៀងគ្មានឈ្មោះមួយនេះ សូមលោកអភិបាលក្រុងបាវិតមើល ។ (សម្រួលដោយ៖ ស្រីណា)
ចែករំលែកព័តមាននេះ