ខេត្តសៀមរាប ៖ ជនជាតិឥណ្ឌាលក់ខោអាវទាំង៦នាក់បានវាយទាត់ធាក់ទៅលើជនជាតិប៉ាគីស្ថានម្នាក់ បណ្តាលឱ្យរបួសធ្ងន់ ខណៈទាស់ពាក្យសំដីគ្នាបន្តិចបន្តួចត្រូវបានកម្លាំងនគរបាលការិយាល័យស៊ើបអង្កេត និងអនុវត្តនីតិវិធី ឃាត់ខ្លួនបាននៅវេលាម៉ោង២២និង១០នាទីយប់ ថ្ងៃទី៣១ ខែសីហា ឆ្នាំ២០១៩ ត្រង់ចំណុចមុខសណ្ឋាគារតាណី ក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប រួចបញ្ជូនយកមកសួរនាំនៅការិយាល័យជំនាញ ។
តាមប្រសាសន៍របស់លោកឧត្តមសេនីយ៍ត្រី ជា គឹម សាន ស្នងការរងទទួលផែនការងារអន្តោប្រវេសន៍ និងលោកវរសេនីយ៍ឯក តូច សុគន្ធ នាយការិយាល័យនគរបាលស៊ើបអង្កេត និងអនុវត្តនីតិវិធីខេត្តសៀមរាបបានប្រាប់ឱ្យដឹង នៅព្រឹកថ្ងៃទី៣ ខែកញ្ញា ឆ្នាំ២០១៩នេះថា ជនបរទេសដែលបង្កទាំង០៦នាក់នោះមាន ទី១-ឈ្មោះ AMANPREET SINGH ភេទប្រុស ជនជាតិឥណ្ឌា មុខរបរទិញលក់ខោអាវ ស្នាក់នៅបន្ទប់ជួលភូមិ ស្ទឹងថ្មី សង្កាត់ ស្វាយដង្គំ ក្រុង-ខេត្តសៀមរាប ។ ទី២-ឈ្មោះ ANKUSH ភេទប្រុស ជនជាតិឥណ្ឌា មុខរបរទិញលក់ខោអាវ ស្នាក់នៅបន្ទប់ជួលភូមិស្ទឹងថ្មី សង្កាត់ស្វាយដង្គំ ក្រុង-ខេត្តសៀមរាប ។ ទី ៣-ឈ្មោះ DASS GOPAL ភេទប្រុស ជនជាតិឥណ្ឌា ទិដ្ឋាការប្រភេទទេសចរណ៍ស្នាក់នៅបន្ទប់ជួលភូមិស្ទឹងថ្មី សង្កាត់ស្វាយដង្គំ ក្រុង-ខេត្តសៀមរាប ។ ទី៤-ឈ្មោះ SUKHDEEP SINGH ភេទប្រុស កើតថ្ងៃទី០៣-១២-១៩៨០ ជនជាតិឥណ្ឌាទិដ្ឋាការប្រភេទទេសចរណ៍ ស្នាក់នៅបន្ទប់ជួលភូមិស្ទឹងថ្មី សង្កាត់ស្វាយដង្គំ ក្រុង-ខេត្តសៀមរាប ។ ទី៥-ឈ្មោះ SINGH TARSEM ភេទប្រុស ជនជាតិឥណ្ឌា សញ្ជាតិអាហ្សង់ទីន ទិដ្ឋាការស្នាក់នៅប្រភេទទេសចរណ៍ (ផុតសុពលភាពថ្ងៃទី៣០-០៦-២០១៩) ស្នាក់នៅនៅបន្ទប់ជួលភូមិស្ទឹងថ្មី សង្កាត់ ស្វាយដង្គំ ក្រុងខេត្តសៀមរាប ។ និងទី៦-ឈ្មោះ SURENDER KUMAR ភេទប្រុស ជនជាតិឥណ្ឌា កាន់លិខិតឆ្លងដែនលេខ P ០៨ ៦៣៥១៨ មានមុខរបរទិញ លក់ខោអាវ ស្នាក់នៅបន្ទប់ជួល ភូមិស្ទឹងថ្មី សង្កាត់ស្វាយដង្គំ ក្រុង-ខេត្តសៀមរាប ។
ចំណែកជនរងគ្រោះឈ្មោះ MASIH KASHIF ភេទប្រុស ជនជាតិប៉ាគីស្ថាន មិនមានលិខិតឆ្លងដែនជាប់ខ្លួន មុខរបរគ្មាន ស្នាក់នៅផ្ទះសំណាក់ ភូមិវត្តដំណាក់ សង្កាត់សាលាកំរើក ក្រុង-ខេត្តសៀមរាប ។
លោកបានបញ្ជាក់ថា ក្រោយពីកម្លាំងជំនាញបានធ្វើការសាកសួរទៅលើជនសង្ស័យរួចមក ជនសង្ស័យបានឆ្លើយសារភាពនៅចំពោះមុខសមត្ថកិច្ចយើងថា មុនពេលកើតហេតុនៅ រសៀលថ្ងៃទី៣១ ខែសីហា ឆ្នាំ២០១៩ ស្ថិតនៅចំណុចមុខសណ្ឋាគារតាណី សង្កាត់ស្វាយដង្គំ ក្រុង-ខេត្តសៀមរាប ពួកគេ(ជនសង្ស័យ)ទាំង៦នាក់ បានធ្វើសកម្មភាពវាយទៅលើជនរងគ្រោះជាច្រើនដៃ រួចយកខ្សែក្រវាត់ចងដៃជនរងគ្រោះទៅក្រោយ ហើយលើកដាក់លើ រ៉ឺម៉កម៉ូតូទៀត ប៉ុន្តែត្រូវបានសមត្ថកិច្ចជួយអន្តរាគមន៍ និងឃាត់ខ្លួនបានជាបន្តបន្ទាប់ រួចបញ្ជូនយកមកសាកសួរនៅស្នងការដ្ឋាននគរបាលខេត្តតែម្តង ។
មូលហេតុផឹកស៊ីទាស់ពាក្យសម្តីគ្នា បច្ចុប្បន្នជនសង្ស័យ (ជនបរទេស)ទាំង០៦នាក់ និង ជនរងគ្រោះត្រូវបានលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប សម្រេចឱ្យឃាត់ខ្លួន និងរៀបចំកសាងសំណុំរឿងបញ្ជូនទៅសាលាដំបូងខេត្តនៅព្រឹកថ្ងៃទី៣ ខែកញ្ញា ឆ្នាំ២០១៩ ដើម្បីចាត់ការបន្តតាមនីតិវិធីច្បាប់ រួចបញ្ជូនបន្តទៅដាក់ពន្ធនាគារបណ្តោះអាសន្ននៅថ្ងៃដដែល ៕ កែសម្រួលដោយ ៖ សុឃាក់
ចែករំលែកព័តមាននេះ