ខេត្តកណ្តាល ៖ សេចក្តីរាយការណ៍បឋមបានឲ្យដឹងថា គ្រោះថ្នាក់ចរាចរណ៍មួយបានកើតឡើងធ្វើអោយមនុស្សម្នាក់បានស្លាប់ នៅក្រោមរថយន្តយ៉ាងអាណោចអាធម្ម និងមនុស្សពីរនាក់ទៀតរងរបួសធ្ងន់ស្រាល ខណៈបើកម៉ូតូវ៉ាជែងរថយន្តក្នុងទិសដៅស្របគ្នាមិនប្រុងប្រយ័ត្ន រួចរអិលដួលផ្លោងទៅចូលក្រោមរថយន្តមួយគ្រឿងទៀត កំពុងបើកបញ្ច្រាសទិស ។
ហេតុការណ៍គ្រោះថ្នាក់ចរាចរណ៍នេះបានកើតឡើង នៅថ្ងៃទី០២ ខែកញ្ញា ឆ្នាំ២០១៩ វេលាម៉ោង១៦និង៣០នាទីនៅលើកំណាត់ផ្លូវជាតិលេខ២១ ចំណុចខាងជើងស្ពានព្រែករស់ (ទី ៧០) ស្ថិតនៅក្នុងភូមិកំពង់ថ្កុល ឃុំសំពៅពូន ស្រុកកោះធំ ខេត្តកណ្តាល ។ អ្នកបើកបរម៉ូតូឈ្មោះ សាន ប៊ុន ភេទប្រុស អាយុ៣៥ឆ្នាំ មុខរបរកម្មករសំណង់ មានទីលំនៅភូមិត្រឡោកបែក ឃុំលើកដែក ស្រុកកោះធំ ខេត្តកណ្តាល ស្លាប់នៅនឹងកន្លែងកើតហេតុ ។
អ្នករួមដំណើរចំនួន២នាក់ ទី០១-ឈ្មោះ មាន ម៉ុន ភេទប្រុស អាយុ៥៦ឆ្នាំ មុខរបរកម្មករសំណង់ អត់ពាក់មួក រងរបួសស្រាល មានទីលំនៅភូមិឃុំជាមួយគ្នា ទី០២- ឈ្មោះ បាន គី ភេទប្រុស អាយុ៥៥ឆ្នាំ មុខរបរកម្មករសំណង់ អត់ពាក់មួករងរបួសស្រាល មានទីលំនៅ ភូមិឃុំជាមួយគ្នា ។
សាក្សីបានអោយដឹងថា នៅមុនពេលកើតហេតុមានម៉ូតូម៉ាកហុងដា សេ១២៥ សេរី២០១៩ ពណ៌ខ្មៅ ពាក់ស្លាកលេខកណ្ដាល 1AF. 7227 មានកញ្ចក់ អត់មួក បើកបរមានទិសដៅពីត្បូងទៅជើង ជ្រៃធំ តាខ្មៅ មានឌុបអ្នករួមដំណើរចំនួន២នាក់ លុះមកដល់ចំណុចកើតហេតុបានបុកប៉ះជាមួយរថយន្តម៉ាក HiNO ពណ៌សលាយប្រផេះ មានសណ្ដោងរ៉ឺម៉ក ពាក់ស្លាកលេខ ភ្នំពេញ 3B .2643 បើកបរមានទិសដៅពីជើងទៅត្បូង តាខ្មៅ ជ្រៃធំ បញ្ច្រាសទិសគ្នា អ្នកបើកបរមិនស្គាល់អត្តសញ្ញាណរត់គេចខ្លួនបាត់មុនពេលសមត្ថកិច្ចយើងទៅដល់ ។
នគរបាលចរាចរណ៍ស្រុកកោះធំបញ្ជាក់ប្រាប់ថា ករណីនេះបង្កឡើងដោយអ្នកបើកបរម៉ូតូបើកបរមានទិសដៅស្របគ្នាបានវ៉ាជាមួយរថយន្តមួយគ្រឿងមិនស្គាល់ម៉ាក គាប់ជួនពេលនោះមានរថយន្តមួយគ្រឿងទៀតបើកបញ្ច្រាសទិសធ្វើអោយអ្នកបើកបរម៉ូតូបានជាន់ហ្វ្រាំង ដួលរអិលទាំងមនុស្សទាំងម៉ូតូទៅចូលចំណែកផ្លូវរបស់រថយន្តដែលមានទិសដៅបញ្ច្រាស បណ្ដាលឲ្យរថយន្តកិនចំក្បាលស្លាប់តែម្ដង ចំណែកអ្នករួមដំណើរពីនាក់បានខ្ទាតចេញពីម៉ូតូទៅខាងស្ដាំដៃរបស់ខ្លួនរងរបួសស្រាល ។
កម្លាំងជំនាញ និងកម្លាំងប៉ុស្តិ៍បានចុះទៅដល់កន្លែងកើតហេតុធ្វើការវាស់វែង ហើយបានយកមធ្យោបាយដែលពាក់ព័ន្ធមករក្សាទុកបណ្ដោះអាសន្ននៅអធិការដ្ឋាននគរបាលស្រុកកោះធំ ដើម្បីបន្តចាត់ការតាមនីតិវិធី ។ ចំណែកសពយើងបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕ កែសម្រួលដោយ ៖ សុឃាក់
ចែករំលែកព័តមាននេះ