រាជធានីភ្នំពេញ ៖ មុខសញ្ញាចែកចាយថ្នាំញៀនម្នាក់ ត្រូវបានកម្លាំងគណៈបញ្ជាការឯកភាពខណ្ឌមានជ័យ ធ្វើការឃាត់ខ្លួនភ្លាមៗ ក្រោយឆែកឆេររកឃើញមានថ្នាំញៀននៅក្នុងខ្លួន បន្ទាប់ពីរូបគេជិះម៉ូតូឆ្លងកាត់គោលដៅត្រួតពិនិត្រអាវុធជាតិផ្ទុះ និងអនុវត្តច្បាប់ចរាចរណ៍ជើងគោករបស់គណៈបញ្ជាការឯកភាពខណ្ឌមានជ័យ ដែលដឹកនាំកម្លាំងដោយលោកឌី រ័ត្នខេមរុណ…
រាជធានីភ្នំពេញ ៖ មុខសញ្ញាចែកចាយថ្នាំញៀនម្នាក់ ត្រូវបានកម្លាំងគណៈបញ្ជាការឯកភាពខណ្ឌមានជ័យ ធ្វើការឃាត់ខ្លួនភ្លាមៗ ក្រោយឆែកឆេររកឃើញមានថ្នាំញៀននៅក្នុងខ្លួន បន្ទាប់ពីរូបគេជិះម៉ូតូឆ្លងកាត់គោលដៅត្រួតពិនិត្រអាវុធជាតិផ្ទុះ និងអនុវត្តច្បាប់ចរាចរណ៍ជើងគោករបស់គណៈបញ្ជាការឯកភាពខណ្ឌមានជ័យ ដែលដឹកនាំកម្លាំងដោយលោកឌី រ័ត្នខេមរុណ អភិបាលរងខណ្ឌ កាលពីវេលាម៉ោង៧និង៣០នាទីយប់ថ្ងៃទី២ ខែកញ្ញា ឆ្នាំ២០១៩ នៅតាមបណ្តោយផ្លូវលេខ២៧១ កែងស្តុប៣៧១ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
ជនសង្ស័យម្នាក់ខាងលើឈ្មោះ ប៊ូ ងួន ភេទប្រុស អាយុ២៥ឆ្នាំ មុខរបរលក់ចាហ៊ួយ មានស្រុកកំណើតនៅភូមិបឹងព្រាវ ឃុំបឹងព្រាវ ស្រុកស្រែអំបិល ខេត្តកោះកុង ។
តាមប្រភពព័ត៌មានអោយដឹងថា នៅវេលាកើតហេតុខាងលើ គឺកម្លាំងគណៈបញ្ជាការឯកភាពខណ្ឌមានជ័យបានដាក់គោលដៅឆែកឆេរអាវុធជាតិផ្ទុះ និងអនុវត្តច្បាប់ចរាចរណ៍នៅចំណុចខាងលើ ដើម្បីបង្ការទប់ស្កាត់នូវបទល្មើសផ្សេងៗ ពិសេសគឺការរឹតបណ្តឹងច្បាប់ចរាចរណ៍លើដងផ្លូវសាធារណៈអោយកាន់តែមានប្រសិទ្ធិភាព ។
តាមប្រភពព័ត៌មានបានបន្តថា ស្របពេលកម្លាំងសមត្ថកិច្ចកំពុងត្រួតពិនិត្យនោះ ស្រាប់តែមានជនសង្ស័យម្នាក់ខាងលើបានជិះម៉ូតូមួយគ្រឿងម៉ាកកាវ៉ាសាគី ពណ៌ត្រួតចេក ពាក់ស្លាកលេខ ភ្នំពេញ ១GE-៤៨៤៨ ធ្វើដំណើរតែម្នាក់ឯងតាមបណ្តោយផ្លូវលេខ២៧១ បានបើកបរម៉ូតូឆ្លងកាត់គោលដៅត្រួតពិនិត្យខាងលើ ក៏ត្រូវកម្លាំងចម្រុះបានឃាត់ដើម្បីសុំធ្វើការឆែកឆេរ ព្រោះពេលនោះជនសង្ស័យក៏មានស្ពាយសាក់កាដូធំមួយផងដែរ ។
តាមប្រភពព័ត៌មានបានបន្តទៀតថា ពេលដែលសមត្ថកិច្ចសុំធ្វើការឆែកឆេរនោះ ជនសង្ស័យពុំព្រមអោយសមត្ថកិច្ចឆែកឡើយ និងឈរនិយាយតវ៉ាជាមួយកម្លាំងសមត្ថកិច្ចមួយសន្ទុះ លុះមិនបានប៉ុន្មានផង ជនសង្ស័យក៏ទម្លាក់សាក់កាដូនោះចុះ ហើយព្យាយាមរត់គេចពីសមត្ថកិច្ចតែម្តង ជាហេតុធ្វើការកម្លាំងសមត្ថកិច្ចជាច្រើននាក់រត់ដេញប៉ផាប់ចាប់ពផីង ទើបចាប់ឃាត់ខ្លួនជនសង្ស័យម្នាក់នោះបានមកវិញ ។
ក្រោយពេលឃាត់ខ្លួនបានហើយនោះ សមត្ថកិច្ចបានធ្វើការឆែកឆេរក្នុងសាក់កាដូររបស់ជនសង្ស័យ ស្រាប់តែឃើញមានថ្នាំញៀនចំនួន៣កញ្ចប់ធំ និងវត្ថុតាងពាក់ព័ន្ធនឹងគ្រឿងញៀនមួយចំនួនផងដែរ ទើបសម្រេចឃាត់ខ្លួនបញ្ចូនទៅកាន់អធិការដ្ឋាននគរបាលខណ្ឌមានជ័យ ដើម្បីធ្វើការសាកសួរនាំនិងចាត់ការបន្តតាមនីតិវិធីតែម្តង ។
បច្ចុប្បន្ន ជនសង្ស័យ និងវត្ថុតាង ត្រូវឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌមានជ័យ រង់ចាំកសាងសំណុំរឿងបញ្ចូនទៅតុលាការចាត់ការតាមនីតិវិធី ។
សូមបញ្ជាក់ថា នៅក្នុងការដាក់គោលដៅត្រួតពិនិត្យឆែកឆេរអាវុធជាតិផ្ទុះ និងអនុវត្តច្បាប់ចរាចរណ៍ខាងលើនេះ កម្លាំងចម្រុះបានត្រួតពិនិត្រលើរថយន្តតូចធំដែលបានធ្វើដំណើរឆ្លងកាត់សរុបចំនួន១២៥គ្រឿង ក្នុងនោះម៉ូតូសរុប២៧០គ្រឿង, រថយន្តដែលត្រូវបកស្កុតខ្មៅលើកញ្ចក់១គ្រឿង, ម៉ូតូគ្មានស្លាកលេខចំនួន២១គ្រឿង ត្រូវអប់រំ និងផាកពិន័យចំពោះម៉ូតូគ្មានកញ្ចក់ និងមួកសុវត្ថិភាពចំនួន២០គ្រឿងផងដែរ ។ ក្នុងការដាក់គោលដៅត្រួតពិនិត្យខាងលើ គឺរកពុំឃើញមានអាវុធជាតិផ្ទុះឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ