រាជធានីភ្នំពេញ៖ តារាច្រើនគូមកហើយបានប្រកាសកាត់ផ្តាច់ចំណងស្នេហ៍របស់ពួកគេយ៉ាងកក្រើកពិភពសិល្បៈ ខណៈតារាខ្លះមានកូនជាមួយគ្នា ។ ទោះជាយ៉ាងណាក្ដីតារាខ្លះបន្ទាប់ពីបែកបាក់គ្នាហើយនោះ នៅតែរក្សាការរាប់អានគ្នាជាធម្មតា តែខ្លះទៀតមើលមុខគ្នាមិនចំទេ ។
បើនិយាយពីតារាចម្រៀងសុគន្ធ និសា និងលោកសុខ ជំនោរ បានកាត់ផ្តាច់ការទាក់ទងគ្នាទាំងស្រុង ក្រោយពេលអ្នកទាំងពីរសម្រេចចែកផ្លូវគ្នាដើរ រៀងៗខ្លួនកាលពីអំឡុងឆ្នាំ ២០១២ ។ បើគិតមកដល់ឆ្នាំ២០១៩ នេះមានរយៈពេលជិត១០ឆ្នាំមកហើយ ដែលអ្នកទាំងពីរមិនស្ដីរកគ្នា សូម្បីតែពួកគេរៀបការក៏មិនបានអញ្ជើញគ្នាទៅវិញទៅមកឲ្យចូលរួមដែរ ។
តារសម្តែងលោកប៉ែន ចំរ៉ុង បានដាក់ពាក្យប្ដឹងសុំលែងលះជាមួយ ភិន សុដាលីស ទៅកាន់សាលាដំបូងរាជធានីភ្នំពេញ កាលពីថ្ងៃទី២៩ ខែ មេសា ឆ្នាំ២០១៦ ក្រោមហេតុផលរស់នៅមិនចុះសម្រុងនឹងគ្នា ។ តុលាការក៏សម្រេចឲ្យអ្នកទាំងពីរលែងលះគ្នា បន្ទាប់ពីផ្សះផ្សាច្រើនលើក។ ក្រោយចែកផ្លូវគ្នាមក ពួកគេមើលមុខគ្នាមិនចំទេ ក្នុងពេលដែលពួកគេមានកូនស្រីម្នាក់ ។ យ៉ាងណាក្ដីរហូតមកដល់ពេលនេះទាំងលោក ប៉ែន ចំរ៉ុង និងនាងភិន សុដាលីស បានបង្ហាញមុខគូស្នេហ៍ថ្មី រៀងៗខ្លួន ។
តារាសម្តែងលោកយ៉ែម សំអូន បានសម្រេចចែកផ្លូវគ្នាជាមួយភរិយាគឺអ្នកនាងយ៉ាន លីនដា កាលពីថ្ងៃទី៣ ខែឧសភា ឆ្នាំ២០១៥ ។ ដើមហេតុនៃការបែកបាក់គ្នានេះដោយសារតែនាងលីនដា ចោទថាបានតាមទាន់ស្វាមីទាក់ទងស្នេហាភេទដូចគ្នា ហើយរហូតមកដល់ពេលនេះអ្នកទាំងពីរកាត់ផ្ដាច់ការទាក់ទងទាំងស្រុង លែងជាអ្វីជាមួយគ្នាតទៅទៀត សូម្បីតែចំណងមិត្តភាពក៏គ្មានដែរ ខណៈពេលដែលអ្នកនាងយ៉ាន លីនដា គឺជាអ្នកទទួលបីបាច់ថែរក្សាកូនស្រីដែលជាតំណក់ឈាមរួមគ្នា ។
ចំណងអាពាហ៍ពិពាហ៍រវាងតារសម្តែងនាង ឈិន សុធារី និងលោកសុវណ្ណ មករា បានដល់ផ្លូវបំបែក បន្ទាប់ពីពួកគេបានសម្រេចចូលរោងការកាលពីថ្ងៃទី ២១ ខែតុលា ឆ្នាំ ២០១៥ និងបង្កើតបានកូនភ្លោះប្រុសស្រី កាលពីអំឡុងខែកុម្ភៈ ឆ្នាំ ២០១៦ ។ បើទោះបីជាចំណងអាពាហ៍ពិពាហ៍របស់ពួកគេបានឈានដល់ទីបញ្ចប់ ដោយហេតុផលលោកសុវណ្ណ មករា បានលបលួចទៅមានស្រីថ្មីនោះក៏ដោយ ប៉ុន្តែអ្នកទាំងពីរនៅតែជួបមុខគ្នាម្តងម្កាល ពោលគឺថ្ងៃដែលរៀបចំខួបកំណើតកូនភ្លោះរបស់ពួកគេ។
តារាចម្រៀង និងសម្តែងអ្នកនាងឆ័យលីដាឡែន បានផ្តាច់ចំណងអាពាហ៍ពិពាហ៍របស់នាងជាមួយស្វាមីដែលជាអ្នកសិល្បៈដូចគ្នា គឺលោករិទ្ធី ឧត្តមស៊ីដារ៉ា កាលពីពេល ថ្មីៗនេះបន្ទាប់ពីបានរៀបការជាមួយគ្នាកាលពីថ្ងៃទី២៣ ខែមករា ឆ្នាំ២០១៥ ដោយមានកូនប្រុសម្នាក់ ។
ដំណឹងពីការបែកបាក់ស្នេហ៍របស់អ្នកនាងឆ័យលី ដាឡែន ត្រូវគេដឹងថា បានកើតឡើងប្រមាណជាងមួយខែនេះ ហើយអ្នកទាំងពីរនៅតែរង់ចាំពីការសម្រេចរបស់តុលាការប៉ុណ្ណោះ ក្រោយពីបានផ្សះផ្សាគ្នាជាច្រើនដង ហើយមិនទទួលបានលទ្ធផលល្អ ។
ចំណែកគូអាពាហ៍ពិពាហ៍លោកយុត្ថារ៉ា ឆានី និងអ្នកនាងចន ច័ន្ទលក្ខិណា ក៏ចែកផ្លូវគ្នាដែរ តែអ្នកទាំងពីរនៅរាប់អានគ្នា ៕ (កែសម្រួលដោយ ៖ បុប្ផា)
ចែករំលែកព័តមាននេះ