ខេត្តបន្ទាយមានជ័យ ៖ មនុស្សចំនួន៣នាក់បានស្លាប់ និង៣នាក់ផ្សេងទៀតបានរងរបួសធ្ងន់ក្នុងគ្រោះថ្នាក់ចរាចរណ៍ចំនួន៣ករណីដាច់ដោយឡែកពីគ្នា តែកើតឡើងក្នុងយប់ថ្ងៃតែមួយ គឺនៅយប់ថ្ងៃទី១ ខែកញ្ញា ឆ្នាំ២០១៩ នៅក្នុងស្រុកចំនួន២ គឺស្រុកមង្គលបូរីមាន២ករណី…
ខេត្តបន្ទាយមានជ័យ ៖ មនុស្សចំនួន៣នាក់បានស្លាប់ និង៣នាក់ផ្សេងទៀតបានរងរបួសធ្ងន់ក្នុងគ្រោះថ្នាក់ចរាចរណ៍ចំនួន៣ករណីដាច់ដោយឡែកពីគ្នា តែកើតឡើងក្នុងយប់ថ្ងៃតែមួយ គឺនៅយប់ថ្ងៃទី១ ខែកញ្ញា ឆ្នាំ២០១៩ នៅក្នុងស្រុកចំនួន២ គឺស្រុកមង្គលបូរីមាន២ករណី និង១ករណីទៀតនៅស្រុកស្វាយចេក ខេត្តបន្ទាយមានជ័យ។
ករណីទី១-តាមប្រភពព័ត៌មានពីនគរបាលស្រុកមង្គលបូរីបានឲ្យដឹងថា កាលពីវេលាម៉ោង៦និង៥០នាទីយប់ថ្ងៃទី១ ខែកញ្ញា ឆ្នាំ២០១៩ មានគ្រោះថ្នាក់ចរាចរណ៍មួយបានកើតឡើងរវាងម៉ូតូមួយគ្រឿងបុកពីក្រោយរថយន្តមួយគ្រឿង បណ្តាលឱ្យបុរសម្នាក់ជាអ្នកបើកបរម៉ូតូស្លាប់នៅលើផ្លូវជាតិលេខ១៥៩c ត្រង់ចំណុចមុខមណ្ឌលសុខភាពសឿ ស្ថិតក្នុងភូមិបុស្សឡោក ឃុំសឿ ស្រុកមង្គលបូរី ខេត្តបន្ទាយមានជ័យ ។
ជនរងគ្រោះដែលស្លាប់ឈ្មោះ សំ សាវិន ភេទប្រុស អាយុ៥២ឆ្នាំ នៅភូមិភ្នំតូចត្បូង ឃុំភ្នំតូច ស្រុកមង្គលបូរី ជាអ្នកបើកបរម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០០៩ ពណ៌ខ្មៅ ពាក់ស្លាក់លេខ បាត់ដំបង ១D-៨០០៣ ។ ចំណែករថយន្តមួយគ្រឿងម៉ាក FUSO ពណ៌ខៀវ ពាក់ផ្លាក់លេខ កំពង់ចាម ៣A-២៦២៣ អ្នកបើកបរមិនស្គាល់ឈ្មោះ បានរត់គេចខ្លួនបាត់ ។
ក្រោយពេលកើតហេតុ ទាំងម៉ូតូនិងរថយន្តត្រូវបានសមត្ថកិច្ចយករក្សាទុកនៅអធិការដ្ឋាននគរបាលស្រុកមង្គលបូរី ។
ករណីទី២-តាមប្រភពព័ត៌មានពីនគរបាលស្រុកមង្គលបូរីបានឲ្យដឹងថា កាលពីវេលាម៉ោង៧និង៥នាទីយប់ថ្ងៃទី១ ខែកញ្ញា ឆ្នាំ២០១៩ មានគ្រោះថ្នាក់ចរាចរណ៍រវាងម៉ូតូមួយគ្រឿងបុកជាមួយគោយន្តកន្ត្រៃ បណ្តាលអោយស្លាប់ម្នាក់ និងរបួសធ្ងន់ម្នាក់ នៅលើផ្លូវជាតិលេខ១៥៩c ត្រង់ចំណុចភូមិរោងគោចុង ឃុំចំណោម ស្រុកមង្គលបូរី ខេត្តបន្ទាយមានជ័យ ។
ម៉ូតូមួយគ្រឿងខាងលើជិះគ្នា២នាក់ ម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ បន្ទាយមានជ័យ ១J-៥០១៧ បើកបរដោយឈ្មោះ ខន វុទ្ធី ភេទប្រុស អាយុ២៤ឆ្នាំ នៅភូមិចំណោមកើត ឃុំចំណោម ស្រុកមង្គលបូរី ខេត្តបន្ទាយមានជ័យ បានស្លាប់ និងអ្នករួមដំណើរម្នាក់ឈ្មោះ ភាស់ ម៉ានុត ភេទប្រុស អាយុ២៣ឆ្នាំ នៅភូមិរង្វាន់លិច ឃុំចំណោម ស្រុកមង្គលបូរី ខេត្តបន្ទាយមានជ័យ បានរងរបួសធ្ងន់ ។ ចំណែកគោយន្តកន្ត្រៃមានសណ្តោងរ៉ឺម៉ក អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ ។
ក្រោយពេលកើតហេតុ ម៉ូតូនិងគោយន្តកន្ត្រៃត្រូវបានសមត្ថកិច្ចយករក្សាទុកនៅអធិការដ្ឋាននគរបាលស្រុកមង្គលបូរី ។
ករណីទី៣-តាមប្រភពពីនគរបាលស្រុកស្វាយចេកបានឱ្យដឹងថា កាលពីវេលាម៉ោង៨យប់ថ្ងៃទី១ ខែកញ្ញា ឆ្នាំ២០១៩ មានគ្រោះថ្នាក់ចរាចរណ៍មួយបានកើតឡើងរវាងម៉ូតូបុកជាមួយ ម៉ូតូក្នុងទិសដៅបញ្ច្រាគ្នា បណ្តាលឱ្យស្លាប់ម្នាក់ និងរបួសធ្ងន់២នាក់ នៅលើផ្លូវលំ ត្រង់ចំណុចខាងជើងភូមិគោកអំពិល ឃុំស្លក្រាម ស្រុកស្វាយចេក ។
ភាគីខាងម៉ូតូមួយគ្រឿងជិះគ្នា៣នាក់ ម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ សៀមរាប ១B-១៩៤២ បើកបរដោយឈ្មោះ លាង ជ័យ ភេទប្រុសអាយុ៣៤ឆ្នាំ បានស្លាប់ និងអ្នករួមដំណើរចំនួន២នាក់ ក្នុងនោះម្នាក់ឈ្មោះ លឹម រ៉ន ភេទប្រុស អាយុ៦៤ឆ្នាំ រងរបួសធ្ងន់ និងម្នាក់ទៀតឈ្មោះ រ៉ាន់ ឆៃគឿង ។ អ្នកទាំង៣រស់នៅក្នុងភូមិកំណប់ ឃុំស្លក្រាម ស្រុកស្វាយចេក បន្ទាយមានជ័យ ។
ចំណែកភាគីខាងម៉ូតូមួយគ្រឿងទៀតជិះគ្នា២នាក់ ម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ បាត់ដំបង ១L-៦៣៥៨ បើកបរដោយឈ្មោះ សេង ដា ភេទប្រុស អាយុ១៩ ឆ្នាំ បានរងរបួសធ្ងន់ និងអ្នករួមដំណើរម្នាក់ឈ្មោះ វី រុន ភេទប្រុស អាយុ១១ឆ្នាំ ។ អ្នកទាំង២រស់នៅក្នុងភូមិខ្លែងពណ៌ត្បូង ឃុំស្លក្រាម ស្រុកស្វាយចេក ខេត្តបន្ទាយមានជ័យ។
ក្រោយពេលកើតហេតុ ម៉ូតូទាំង២គ្រឿងត្រូវបានសមត្ថកិច្ចយកមករក្សាទុកនៅអធិការដ្ឋាន រង់ចាំធ្វើការដោះស្រាយនៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ