រាជធានីភ្នំពេញ ៖ រឿងប្រមាថ នៅទីបំផុតបុរសម្នាក់បានយល់ព្រមចេញមុខសុំទោសជាសាធារណៈទៅកាន់អតីតតារាចម្រៀងអ្នកនាង យ៉ុង ចាន់កន្និកា ចំពោះការប្រើប្រាស់ពាក្យពេចន៍អសុរសក្នុងពេលដែលនាងកំពុងតែធ្វើការឡាយផ្ទាល់លក់ផលិតផលដែលជាទម្លាប់របស់នាង ។ ការចេញមកសុំទោសពីបុរសរូបនេះបានធ្វើឡើង បន្ទាប់ពីស្វាមីរបស់អ្នកនាង…
រាជធានីភ្នំពេញ ៖ រឿងប្រមាថ នៅទីបំផុតបុរសម្នាក់បានយល់ព្រមចេញមុខសុំទោសជាសាធារណៈទៅកាន់អតីតតារាចម្រៀងអ្នកនាង យ៉ុង ចាន់កន្និកា ចំពោះការប្រើប្រាស់ពាក្យពេចន៍អសុរសក្នុងពេលដែលនាងកំពុងតែធ្វើការឡាយផ្ទាល់លក់ផលិតផលដែលជាទម្លាប់របស់នាង ។
ការចេញមកសុំទោសពីបុរសរូបនេះបានធ្វើឡើង បន្ទាប់ពីស្វាមីរបស់អ្នកនាង យ៉ុង ចាន់កន្និកា បានធ្វើការព្រមានជាសាធារណៈមួយទៅកាន់បុរសរូបនេះ ជុំវិញការជេប្រមាថខាងលើនេះ មុនពេលដែលលោកចាត់វិធានការតាមផ្លូវច្បាប់ ។
ស្វាមីរបស់អ្នកនាង យ៉ុង ចាន់កន្និកា ដែលត្រូវបានគេស្គាល់ថា ជាមន្ត្រីប៉ូលិសថ្នាល់ឧត្តមសេនីយ៍មួយរូបនៅក្រសួងមហាផ្ទៃ បានធ្វើការប្រកាសតាមរយៈហ្វេសប៊ុករបស់ខ្លួនទៅកាន់គណនេយ្យហ្វេសប៊ុកបុរសម្នាក់ដែលមានឈ្មោះថា sokvuthy chean ឲ្យចេញមុខសុំទោសភរិយារបស់លោកក្នុងអំឡុងរយៈពេល៣ថ្ងៃ ជុំវិញការប្រើប្រាស់ពាក្យពេចន៍ប្រមាថមួយនេះ ។
បន្ទាប់ពីបានឃើញសារព្រមានពីស្វាមីរបស់អ្នកនាង យ៉ុង ចាន់កន្និកា នេះរួចមកបុរសដែលមានឈ្មោះខាងលើនេះ បានយល់ព្រមចេញមុខមកសុំទោសទៅកាន់អតីតតារាចម្រៀងរូបនេះ ឆ្លើយតបទៅតាមការចង់បានពីស្វាមីរបស់នាង ។
បុរសខាងលើនេះ បានសរសេរសារសុំទោសជាសាធារណៈថា ជូនដល់បងស្រី យ៉ុង ចាន់កន្និកា និង បង chan chamnan (ស្វាមី) ដោយយោងតាមការបង្ហោះសារលើហ្វេសបុកផេករបស់បង ដោយប្រើពាក្យអសុរសដែលធ្វើឱ្យប៉ះពាល់ដល់កិត្តិយស និងភាពថ្លៃថ្នូររបស់បងនោះឱ្យប្អូនសុំអភ័យទោសយ៉ាងជ្រាលជ្រៅអស់ពីចិត្ត ដោយហេតុហួសវិស័យដែលប្អូនធ្វេសប្រហែស បណ្តាលឱ្យជនអាណាមិកចូលមកធ្វើប្រតិបត្តិកាផ្តេសផ្តាសធ្វើឱ្យប៉ះពាល់ដល់កិត្តិយសបងទាំងពីរ ហើយប្អូនទើបនឹងបានដឹងពេលឃើញបងបង្ហោះសារនឹងឯង ។ ដោយយោងតាមកម្មវត្ថុខាងលើ សូមបងមេត្តាអភ័យទោសដោយអនុគ្រោះ ប្អូនសង្ឃឹមថាបងទាំងពីរនឹងយល់ ហើយអធ្យាស្រ័យដល់ប្អូន ។
បន្ទាប់ពីបានឃើញសារសុំទោសពីបុរសខាងលើនេះ ស្វាមីរបស់អ្នកនាង យ៉ុង ចាន់កន្និកា ក៏បានធ្វើការឆ្លើយតបទៅវិញថា មិនថាហេតុផលបែបណា តែបងប្រុសគាត់បានទទួលខុសត្រូវខ្ពស់ ។ ខ្ញុំនឹងបញ្ចប់រឿងនេះ ហើយក៏សូមអរគុណ បងប្អូន មិត្តភ័ក្កទាំងអស់ដែលបាន ចូលរួម like and comment ចូលក្នុងការផុសនៅក្នុងអាខោនហ្វេសបុករបស់ខ្ញុំ ទាំងការគាំទ្រ និងការរិ:គន់ក្នុងន័យស្ថាបនា ។
ចំណែកអតីតតារាចម្រៀងអ្នកនាង យ៉ុង ចាន់កន្និកា វិញ ក៏បានបង្ហោះសារនៅលើហ្វេសប៊ុករបស់ខ្លួនផងដែរថា អគុណបងប្រុសសម្រាប់ការសុំទោសជាសាធារណៈ អរគុណបង សូមបងប្អូនប្រុងប្រយ័ត្នឱ្យបានខ្ពស់សម្រាប់អាខោនផ្ទាល់ខ្លួន កុំឱ្យមានបញ្ហាត្រូវគេហេកដូចបងប្រុសទៀត ។
ជាការកត់សម្គាល់រឿងរ៉ាវខាងលើនេះ មិនមែនជាលើកទីមួយទេ ដែលអតីតារាចម្រៀង និងជាម្ចាស់បទ «វាចាស្រីឡង់សេ» អ្នកនាង យ៉ុង ចាន់កន្និកា ត្រូវបានទទួលរងនូវការជេរប្រមាថបែបនេះ ពោលកន្លងមកនាងក៏ធ្លាប់ទទួលការរិះគន់ផងដែរ ជុំវិញការ Live លក់ផលិតផល ដែលមហាជនទាំងនោះយល់ថា មានការស្លៀកពាក់មិនសមរម្យ ។
យ៉ាងណាអតីតតារាចម្រៀងរូបនេះ ហាក់មិនសូវជាបានចាប់អារម្មណ៍ច្រើនឡើយជុំវិញការរិះគន់ពីមហាជនមួយចំនួន ក្នុងពេលដែលនាង គឺជាអ្នកលក់ឡេ និងគ្រឿងសម្អាង ហើយបច្ចុប្បន្ននាងក៏បានបញ្ចប់អាជីពជាអ្នកសិល្បៈរួចហើយដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ