ខេត្តព្រះវិហារ៖ ចាប់តាំងពីថ្ងៃទី១៩ ខែសីហា ឆ្នាំ២០១៩មក មន្ត្រីជំនាញរបស់អាជ្ញាធរជាតិព្រះវិហារបាន និងកំពុងអង្កេត និងស្រង់ទិន្នន័យហានិភ័យប្រាសាទនានាក្នុងតំបន់រមណីយដ្ឋានប្រាសាទកោះកែរ ។ យោងតាមការផ្សាយរបស់ផេកហ្វេសប៊ុកក្រសួងវប្បធម៌ និងវិចិត្រសិល្បៈថាតំបន់ការពាររមណីយដ្ឋានប្រាសាទកោះកែរមានប្រាសាទចំនួន៥៤…
ខេត្តព្រះវិហារ៖ ចាប់តាំងពីថ្ងៃទី១៩ ខែសីហា ឆ្នាំ២០១៩មក មន្ត្រីជំនាញរបស់អាជ្ញាធរជាតិព្រះវិហារបាន និងកំពុងអង្កេត និងស្រង់ទិន្នន័យហានិភ័យប្រាសាទនានាក្នុងតំបន់រមណីយដ្ឋានប្រាសាទកោះកែរ ។
យោងតាមការផ្សាយរបស់ផេកហ្វេសប៊ុកក្រសួងវប្បធម៌ និងវិចិត្រសិល្បៈថាតំបន់ការពាររមណីយដ្ឋានប្រាសាទកោះកែរមានប្រាសាទចំនួន៥៤ ស្ថិតក្នុងតំបន់ស្នូល តំបន់ទ្រនាប់ និងតំបន់រណប ។ តំបន់ស្នូលមានប្រាសាទចំនួន២៤ដែលមានលក្ខណៈពិសេស ហើយកំពុងស្ថិតក្នុងស្ថានភាពខូចខាតដោយសារការបំផ្លាញពីកត្តា ផ្សេងៗនាពេលកន្លងមក ។
ក្នុងដំណាក់កាលដំបូងនេះ មន្ត្រីជំនាញបានបញ្ចប់ការចុះអង្កេត និងចងក្រងឯកសារហានិភ័យប្រាសាទក្នុងតំបន់ស្នូល នៅតាមប្រាសាទមួយចំនួន ដូចជាប្រាសាទប្រាំ ប្រាសាទនាងខ្មៅ ប្រាសាទបាក់ ប្រាសាទអោបនាង ប្រាសាទខ្នារ ចម្លាក់នៅត្រពាំងខ្នារ ប្រាសាទអណ្តូងគុកឬប្រាសាទគុកគ្រង ប្រាសាទខ្ទុំ ប្រាសាទដំរី ប្រាសាទ លាក់នាង ប្រាសាទច្រាប ប្រាសាទបន្ទាយពីរជាន់ ប្រាសាទបេង ប្រាសាទក្រចាប់ ប្រាសាទស្រឡៅ ប្រាសាទលិង្គទី១ ប្រាសាទលិង្គទី២ ប្រាសាទលិង្គទី៣ ប្រាសាទលិង្គទី៤ ប្រាសាទគោកខ្មោច ប្រាសាទចិន និងកំពុងអង្កេតលើប្រាសាទធំទាំងមូល ។
ការរៀបចំឯកសារផែនទីហានិភ័យប្រាសាទនៅរមណីយដ្ឋានប្រាសាទកោះកែរ នេះគឺជាកិច្ចការដ៏សំខាន់មួយសម្រាប់លើកផែនការគ្រប់គ្រង និងអភិរក្សដ៏ចាំបាច់របស់អាជ្ញាធរជាតិព្រះវិហារ ហើយក៏ជាផ្នែកមួយនៅក្នុងការរៀបចំផែនការគ្រប់គ្រងរួមសម្រាប់ការចុះបញ្ជីប្រាសាទនៅរមណីយដ្ឋានប្រាសាទកោះកែរជាសម្បត្តិបេតិកភណ្ឌពិភពលោកនាពេលខាងមុខ ៕ (កែសម្រួលដោយ ៖ បុប្ផា)
ចែករំលែកព័តមាននេះ