ខេត្តប៉ៃលិន ៖ ឆ្លើយតបទៅនឹងសំណូមពររបស់ពលរដ្ឋក្រុងប៉ៃលិន កាលពីថ្ងៃទី០១ ខែកញ្ញានេះ អាជ្ញាធរខេត្តប៉ៃលិនដឹកនាំមន្ត្រីជំនាញពាក់ព័ន្ធបានចាប់ផ្តើមដំណើរការឈូសឆាយបើកផ្លូវ ដើម្បីធ្វើការស្ថាបនាផ្លូវបេតុង១ខ្សែប្រវែង២០០ម៉ែត្រ ស្ថិតក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ក្នុងគោលបំណងសម្រួលដល់ការធ្វើចរាចរណ៍របស់ពលរដ្ឋ និងបង្កើនសោភ័ណភាពទីក្រុង ។
លោក ផាន់ ចាន់ធុល អភិបាលខេត្តបានមានប្រសាសន៍ថា ផ្លូវស្ពាន គឺជាសរសៃឈាមនៃសេដ្ឋកិច្ចជាតិ និងគ្រួសារ ។ ដូច្នេះមានផ្លូវ គឺមានក្តីសង្ឃឹម ហើយការធ្វើផ្លូវ១ខ្សែនេះ គឺពិតជាបានបំពេញនូវសេចក្តីត្រូវការរបស់ប្រជាពលរដ្ឋ ដោយងាយស្រួលក្នុងការធ្វើចរាចរណ៍ និងជីវភាពរស់នៅប្រចាំថ្ងៃ ជាពិសេសបានផ្តល់នូវភាពងាយស្រួលដល់ការដឹកកសិផលទៅលក់ដូរនៅទីផ្សារ និងសិស្សានុសិស្សបានធ្វើដំណើរទៅសាលារៀនទាន់ពេលវេលា ។
លោកអភិបាលខេត្តបានបញ្ជាក់ថា រាជរដ្ឋាភិបាលកម្ពុជាខិតខំប្រឹងប្រែងដោះស្រាយនូវរាល់ការលំបាក និងសំណូមពររបស់ប្រជាពលរដ្ឋព្រមទាំងបានខិតខំកសាងអភិវឌ្ឍន៍ប្រទេសជាតិឱ្យមានការរីកចម្រើនលើគ្រប់វិស័យ ជាពិសេសការកសាងហេដ្ឋារចនាសម័ន្ធរូបវ័ននានាដូចជា ៖ ផ្លូវ ស្ពាន សាលារៀន មន្ទីរពេទ្យ ជាដើម ។ ក្នុងឱកាសនោះផងដែរ លោកក៏បានផ្តាំផ្ញើដល់ប្រជាពលរដ្ឋដែលប្រើប្រាស់ផ្លូវទាំងអស់មេត្តាផ្តល់កិច្ចសហការ និងសម្របសម្រួលនូវផលប៉ះពាល់នានាក្នុងការស្ថាបនាផ្លូវនេះឱ្យបានឆាប់រហ័សទៅតាមផែនការគ្រោងទុក ព្រមទាំងចូលរួមជួយថែរក្សា ដើម្បីធានាឱ្យការប្រើប្រាស់បានយូរអង្វែង ។
សូមបញ្ជាក់ថា ផ្លូវបេតុង១ខ្សែដែលចាប់ផ្តើមស្ថាបនានាពេលនេះ គឺមានប្រវែង២០០ម៉ែត្រ ទទឹង៨ម៉ែត្រ ចាប់ពីផ្លូវប៊េតុងចំណុចរង្វង់មូលវិមានឯករាជ្យចុះទៅផ្លូវបេតុងចំណតរថយន្តថ្មី ស្ថិតក្នុងភូមិអូរតាពុកក្រោម សង្កាត់ទួលល្វាក្រុងប៉ៃលិន ខេត្តប៉ៃលិនដោយប្រើប្រាស់កញ្ចប់ថវិកាគម្រោងអភិវឌ្ឍន៍ខេត្ត ៕ កែសម្រួលដោយ ៖ សុឃាក់
ចែករំលែកព័តមាននេះ