ប្រទេសអុីស្រាអែល-លីបង់ ៖ កងទ័ពអុីស្រាអែល និងក្រុមហេសប៊ុលឡាហ៍លីបង់ កាលពីថ្ងៃទី១កញ្ញា បានបាញ់តតាំងគ្នាដោយគ្រាប់មីស៊ីលឆ្លងកាត់ព្រំដែនរវាងអុីស្រាអែលនិងលីបង់ ក្នុងពេលមានភាពតានតឹងយ៉ាងខ្លាំង។
ក្រុមហេសប៊ុលឡាហ៍នាវេលារសៀលថ្ងៃទី១កញ្ញាអះអាងថា បានកម្ទេចរថយន្តយោធាមួយគ្រឿងរបស់កងទ័ពអុីស្រាអែល ក្នុងតំបន់AVIVIMភាគខាងជើងអុីស្រាអែលក្បែរព្រំដែន។ ការវាយប្រហារទាំងនោះនាំឲ្យមានការតបតវិញ របស់កងទ័ពអុីស្រាអែលនៅភាគខាងត្បូងលីបង់។ យោងតាមអុីស្រាអែលថា ការបាញ់មីស៊ីលប្រឆាំងរថក្រោះរបស់ពួកហេសប៊ុលឡាហ៍ បានត្រូវចំរថយន្តសង្គ្រោះយោធាមួយគ្រឿង តែពុំបណ្ដាលឲ្យមានអ្នករងគ្រោះឡើយ ដែលផ្ទុយពីការអះអាងរបស់ពួកហេសប៊ុលឡាហ៍។
អ្នកនាំពាក្យយោធាអុីស្រាអែលម្នាក់និយាយនាល្ងាចថ្ងៃទី១កញ្ញាថា ការបាញ់តតាំងគ្នាប្រហែលជាបញ្ចប់។ តាមប្រភពជិតដិតនឹងពួកហេសប៊ុលឡាហ៍ថា ការបាញ់មីស៊ីលរបស់ពួកគេ ជាការតបតចំពោះការវាយប្រហាររបស់អុីស្រាអែល កាលពីថ្ងៃទី២៤សីហាសម្លាប់សមាជិក២នាក់របស់ពួកគេនៅស៊ីរី។
កងទ័ពអុីស្រាអែលកាលពីថ្ងៃទី១កញ្ញាបានវាយប្រហារតបតវិញ ចំពោះការបាញ់មីស៊ីលរបស់ពួកហេសប៊ុលឡាហ៍ ដោយវាយប្រហារលើតំបន់មួយនាភាគខាងត្បូងលីបង់ ចាត់ទុកជាប្រភពនៃការវាយប្រហារ។ នាយករដ្ឋមន្ត្រីអុីស្រាអែលលោកបេនចាមីននេតាន់យ៉ាហ៊ូអះអាងថា យើងបានបាញ់គ្រាប់ផ្លោង១០០គ្រាប់និងវាយប្រហារតាមអាកាសតបតវិញ។
ការបាញ់តតាំងគ្នាទាំងនោះកើតមាន ពេលកំពុងមានភាពតានតឹងខ្លាំងរវាងអុីស្រាអែលនិងក្រុមហេសប៊ុលឡាហ៍ដែលកាលពីថ្ងៃទី២៥សីហា ក៏បានចោទប្រកាន់អុីស្រាអែលដែរថា បានធ្វើ្វការវាយប្រហារដោយដ្រូនលើទីតាំងរបស់ខ្លូននៅជាយក្រុងខាងត្បូងនៃក្រុងបេរូត៕ (កែសម្រួលដោយ ៖ បុប្ផា)
ចែករំលែកព័តមាននេះ